سولتۇستىك كورەيا پرەزيدەنتى  كيم چەن ىننىڭ اعاسىن ولتىرگەن ۆەتنام ازاماتشاسى  زوان تحي حىون بوستاندىققا شىقتى.  بۇل تۋرالى Reuters اقپارات اگەنتتىگى حابارلادى.

بۇگىن تاڭەرتەڭ تۇرمەدەن ازات بولعان ول ەندى مالايزيا ارقىلى ءوز ەلى ۆەتنامعا جول تارتپاق. جازاسىن وتەپ جاتقان ايەلدى نە ءۇشىن مەرزىمىنەن بۇرىن بوساتتى، ول جاعى اشىپ ايتىلعان جوق.

اتاپ وتەر بولساق، ول 3 جىل 4 ايعا باس بوستاندىعىنان ايرىلعانى بەلگىلى. وعان «ءقاۋىپتى زاتپەن دەنساۋلىققا زيان كەلتىرۋ ماقساتىندا قاساقانا كىسى ءولتىردى» دەپ ايىپ تاعىلدى.

ارينە قىلمىسكەر ءوز ايىبىن مويىندادى. جالپى مالايزيادا كىسى ولتىرگەن ادام ءولىم جازاسىنا كەسىلەدى. الايدا ونىڭ جولى بولعان. وسىدان بىرەر اي بۇرىن تاعى ءبىر ايىپ تاعىلعان كۇدىكتى اباقتىدان بوساتىلعان. ونىڭ دا كيم چەن ىننىڭ اعاسىنىڭ ولىمىنە قاتىسى بولعان. ءبىراق تەكسەرۋ بارىسىندا ولار ادام ولتىرگەنىن مويىنداعانىمەن، سولتۇستىك كورەيا اگەنتتەرىنىڭ الداۋىنا ءتۇسىپ قالعان. ولار «قانداي دا ءبىر شوۋعا، تەلەباعدارلامانىڭ ويىنىنا ءتۇسىپ جاتىرمىز» دەپ ويلاعان. ءسويتىپ،  كۋالا-لۋمپۋر اۋەجايىندا بەلگىسىز ازاماتتىڭ دەنەسىنە اق ۇلپا ءدارى جاققان. ال اتالعان ءدارى حالىقارالىق كونۆەنسيا بويىنشا رۇقسات ەتىلمەگەن حيميالىق ءدارى بولىپ شىققان. وسىنىڭ سالدارىنان بەلگىسىز ازامات قايتىس بولعان. ال ول كيم چەن ىننىڭ اعاسى كيم چەن نام بولىپ شىققانى بەلگىلى.