2019 جىلدان باستاپ كوپتەگەن ەلدەردە تۋريستەر جاڭا شەكتەۋلەر مەن قاتاڭ ءارى قىزىقتى زاڭدارعا تاپ كەلۋى مۇمكىن. تارتىپكە باعىنباعاندارعا جوعارى مولشەردە ايىپپۇل سالۋدان باستالىپ، ءولىم جازاسىنا كەسۋگە دەيىنگى قاتاڭ جازالاۋ تۇرلەرى بەكىتىلگەن ەلدەر دە جوق ەمەس. Qamshy.kz اقپارات اگەنتتىگى الەم ەلدەرىندەگى وسىنداي قىزىقتى زاڭداردىڭ ءبىرقاتارىن نازارلارىڭىزعا ۇسىنادى.

مىسالى، يتاليالىڭ كاپري ارالىندا 1-مامىردان باستاپ پلاستيكالىق ىدىستاردىڭ بارلىق ءتۇرىن قولدانۋعا تىيىم سالىندى. ءتارتىپ بۇزۋشىلار 500 ەۋرو كولەمىندە ايىپپۇل تولەۋگە ءتيىس. دەمالىس ماۋسىمىنىڭ ناعىز قىزعان شاعىندا ارالعا كۇنىنە 20 مىڭنان استام تۋريست كەلىپ، سوڭدارىنان وتە كوپ مولشەردە پلاستيك قالدىقتارىن قالدىرادى. وسى جايلاردى ەسكەرە وتىرىپ كاپري دە مارتينو قالاسىنىڭ مەرى جاڭا ءتارتىپ ەنگىزۋ تۋرالى شەشىم شىعارعان.

ال فرانسيا استاناسى پاريجدە قىركۇيەك ايىنان باستاپ جاياۋ جۇرگىنشىلەر جولى مەن تروتۋارلاردا ەلەكترلى سكۋتەرمەن، موپەدتەرمەن جۇرسەڭىز 135 ەۋرو ايىپپۇل تولەۋگە ءتيىسسىز.

تايلاندتاعى پحۋكەت ارالىندا ورنالاسقان ماي كحاو جاعاجايىندا ۇشىپ بارا جاتقان نەمەسە اۋەجايعا قونىپ جاتقان ۇشاقتاردى سۋرەتكە تۇسىرۋگە جانە ولارمەن سەلفي جاساۋعا تىيىم سالىنباق. سەبەبى، دەمالىس ورنى اۋەجايعا تىم جاقىن ورناسقان. ال جاقىن قاشىقتىقتان فوتوعا ءتۇسىرۋ ۇشاقتاردىڭ باسقارۋ جۇيەسىنە كەدەرگى كەلتىرۋى مۇمكىن. تىيىم سالىنعان اۋماقتا سۋرەتكە تۇسۋشىلەرگە ۇلكەن كولەمدەگى ايىپپۇلدان باستاپ اباقتىعا جابۋ، ءتىپتى، ءولىم جازاسىنا دەيىنگى جازالار قاراستىرىلعان. جەرگىلىكتى بيلىكتىڭ ايتۋىنشا، ەڭ اۋىر جازا ءتۇرى ۇشاقتاردىڭ باسقارۋ جۇيەسىنە كەدەرگى كەلتىرگەن ءتارتىپ بۇزۋشىلارعا قولدانىلادى.

يتاليانىڭ چينكۆە-تەررە ۇلتتىق ساياباعىندا ساياحاتشىلار ءۇشىن جەڭىل كيىلىپ-شەشىلەتىن اياق كيىمدەرءدى كيۋگە تىيىم سالىنادى. تاۋلى ايماقتىڭ جەر بەدەرىنە سايكەس كەلمەيتىن اياق كيىم كيگەن تۋريستەر ۇنەمى كەلەڭسىز جاعدايلارعا ۇرىنادى دا، قۇتقارۋشىلار توبىن شاقىرۋعا ءماجبۇر بولادى. ەندى جاڭا ءتارتىپ بويىنشا، تىيىم سالىنعان اياق كيىم كيگەندەرگە 50 ەۋرو ايىپپۇل سالىنادى، ال قۇتقارۋ قىزمەتىنىڭ قۇنى 2 500 ەۋروعا دەيىن قىمباتتايدى.

Qamshy.kz اقپارات اگەنتتىگى ءوز وقىرماندارىنا دەمالىستى جوسپارلاعان ساتتەن باستاپ-اق، ساپارلاپ بارعالى جاتقان ەلىڭىزدىڭ زاڭدارى مەن ىشكى تارتىپتەرى تۋرالى تولىق اقپارات الۋعا كەڭەس بەرەدى. بۇل دەمالىسىڭىزدىڭ جوعارى دەڭگەيدە ءوتىپ، جاقسى اسەر قالدىرۋىنا ءوز سەپتىگىن تيگىزەدى. "تارتىپكە باعىنعان قۇل بولمايتىنىن" دا ەسكەرە جۇرگەيسىز!