اقتاۋدا كوشە تازالىقشىلارى مەن كوممۋنالدىق ارنايى تەحنيكالاردىڭ جۇرگىزۋشىلەرى جۇمىسقا شىقپاي قويدى. «قالا جولدارى» كوممۋنالدىق  مەملەكەتتىك كاسىپورنىنىڭ جۇمىسشىلارى ءساۋىر ايىنداعى جالاقىلارىن تولەۋدى تالاپ ەتتى، دەپ حابارلايدى Qamshy.kz اقپارات اگەنتتىگى lada.kz سايتىنا سىلتەمە جاساپ.

وبلىس ورتالىعىندا 400-گە جۋىق جۇمىسشى قالا كوشەسىن تازالاۋدان باس تارتقان. اقتاۋ قالاسىنىڭ اكىمدىگى  جۇمىسشىلار جالاقىسىنىڭ كەشىكتىرىلۋىن بيۋدجەتكە تۇسەتىن سالىق ءتۇسىمىنىڭ ناشارلاۋىمەن بايلانىستىرىپ وتىر.

ال نارازىلىق بىلدىرگەن جۇمىسشىلار سوڭعى التى ايدا  ءوز اقشالارىن داۋ-جانجالمەن الىپ جۇرگەندەرىن ايتتى.

«ءبىز ىلعي «ايلىق قاشان تۇسەدى» دەپ ايقاي كوتەرىپ، ءوز جالاقىمىزدى تالاپ ەتەمىز. ولار ءار كۇنى "ەرتەڭ"دەپ ۋادە ەتەدى. جالاقىمىزدى تولەۋ ءۇشىن ديرەكتور ءتىپتى نەسيە الدى» - دەپ شاعىمداندى ايناش يديبايەۆا.

جۇمىسشىلاردىڭ ايتۋىنشا، سىپىرعىش، قولعاپ سياقتى كۇندەلىكتى جۇمىسقا قاجەتتى زاتتاردى دا وزدەرى ساتىپ الۋعا ءماجبۇر ەكەن.

«بىزگە قايتا-قايتا ۋادە بەرىپ، اقىر اياعى جالاقىمىز 10 كۇن، 15 نەمەسە 20  كۇن كەشىكتىرىلەدى. ال ءبىزدىڭ بارلىعىمىزدا نەسيە بار، كەيبىرىمىز پاتەر جالداپ تۇرامىز. ودان قالسا،ءارقايسىمىزدىڭ ۇيىمىزدە تاماق كۇتىپ وتىرعان بالا-شاعامىز بار عوي، ولار كۇتە المايدى ەمەس پە؟» - دەيدى ناۋرىزباي كەتەبايەۆ.

ال «قالا جولدارى» مەملەكەتتىك كومۋنالدىق كاسىپورنىنىڭ ديرەكتورى قايرات حايرۋشيەۆتىڭ ايتۋىنشا، ول بۇل جۇمىستى بۇرىنعى باسشىلىقتان بىرنەشە ميلليون قارىزدارىمەن قابىلداپ العان.

«مەن وسى جەرگە كەلگەننەن كاسىپورىندى ساقتاپ قالۋعا كىرىستىك. ماعان دەيىن جاسالعان ساتىپ الۋدى تولىعىمەن قاراپ شىقتىم. كەيبىر تەحنيكا مەن قۇرال-جابدىقتار ساتىپ الىنىپ، مۇراجايدىڭ ەكسپوناتىنداي پايدالانىلماي تۇرعان. سونداي-اق، جالعا الىنعان كەيبىر ءۇي-جايلاردىڭ باعاسى وتە جوعارى بولىپ، قىزمەتكەرلەر شتابى ءبارىن قايتا قارادى. وسىنداي جۇمىستاردىڭ ارقاسىندا، 421 ميلليون قارىزدى 170 ميلليون تەڭگەگە دەيىن قىسقارتتىق. ال جالاقى ماسەلەسى تەك اقپاندا باستالدى. ءبىراق مەن ول كەزدە جۇمىسشىلاردىڭ جالاقىسىن بەرۋ ءۇشىن نەسيە الدىم. ال ءقازىر جالاقىنىڭ ۋاقىتىلى تۇسپەۋى اقتاۋ بيۋدجەتىنەن قارجىلاندىرۋدىڭ بولماۋىنا بايلانىستى تۋىنداپ وتىر» - دەدى قايرات حايرۋشيەۆ. 

ءوز كەزەگىندە اقتاۋدىڭ شەندىلەرى بۇل ماسەلەنى جوققا شىعارمادى، الايدا قاي كەزدە ناقتى شەشىمىن تاباتىنىن دا ايتپادى. 

«ءيا، «قالا جولدارى» كاسىپورنىنا قارىزىمىز بار. بۇگىنگى كۇنگە قارىز سوماسى 2،5 ايعا 150 ميلليون تەڭگەنى قۇراپ وتىر. بۇل قارىزدى سالىق تۇسىمدەرى جەتكىلىكتى تۇسكەندە تولىعىمەن تولەيمىز. جۇمىسشىلارعا قارىز ەكەنىمىزدى جوققا شىعارمايمىز، ولارعا جاعدايدى تۇسىندىرۋدەمىز، ءبىراق ولار تۇسىنۋگە تىرىسپاۋدا» - دەدى اقتاۋ قالاسى اكىمىنىڭ ورىنباسارى جانگەلدى اۋباكىروۆ.   

 اۋدارعان: ميات كاشىباي