تۇرمەدەگى بالاسىنا اياق كيىمگە ەسىرتكى جاسىرىپ وتكىزبەك بولعان ايەل ۇستالدى. قىزىلوردا وبلىسى قىلمىستىق-اتقارۋ جۇيەسى دەپارتامەنتىنىڭ قىزمەتكەرلەرى سوتتالعاندارعا تىيىم سالىنعان زاتتار مەن بۇيىمداردىڭ مەكەمە اۋماعىنا ءوتۋ جولدارىن دەر كەزىندە انىقتادى، دەپ حابارلايدى Qamshy.kz اقپارات اگەنتتىگى inform.kz سايتىنا سىلتەمە جاساپ.

قىزىلوردا وبلىسى قىلمىستىق-اتقارۋ جۇيەسى دەپارتامەنتىنىڭ حابارلاۋىنشا، زك-169/1 مەكەمەسى رەجىم جانە كۇزەت ءبولىمىنىڭ قىزمەتكەرلەرى سول مەكەمەدە ق ر قىلمىستىق كودەكسىنىڭ 106-بابىنىڭ 3-بولىگىمەن قاماۋدا وتىرعان بالاسىنا كەلگەن ازاماتشانى تەكسەرۋ بارىسىندا وندا جاسىل ءتۇستى وتكىر ءيىستى كەپتىرىلگەن ءشوپ تارىزدەس زات بار ەكەنى انىقتالدى. ايەل ونى بالاسىنا الىپ كەلگەن سپورتتىق اياق كيىم ارقىلى وتكىزبەك بولعان. وقيعا ورنىنا قىزىلوردا قالاسى پوليسيا باسقارماسى جەدەل-تەرگەۋ توبى شاقىرىلدى. اتالمىش تىيىم سالىنعان زات تاركىلەنىپ، ول ساراپتاماعا جىبەرىلدى.  

«سوت-مەديسينالىق ساراپتاما ناتيجەسى بويىنشا ونىڭ ماريحۋانا ەكەنى انىقتالدى. اتالعان دەرەك بويىنشا سوتقا دەيىنگى تەرگەپ-تەكسەرۋ امالدارى جۇرگىزىلۋدە»، - دەپ ءمالىم ەتتى قىزىلوردا وبلىستىق قىلمىستىق-اتقارۋ جۇيەسى دەپارتامەنتىنىڭ باسپا ءسوز قىزمەتى.   

ۇسىنعان: ميات كاشىباي