15 مامىردا پەتروپاۆلدا ۆاگون شىعارۋمەن اينالىساتىن "زيكستو" زاۋىتىنىڭ جۇمىسشىلارى ءۇش ايعا جاقىن جالاقىلارىن الماعاندارىن ايتىپ، نارازىلىق ءبىلدىردى. 14.30-عا قاراي 300-گە تارتا جۇمىسشى ەڭبەكاقىلارىن تالاپ ەتىپ، زاۋىت اكىمشىلىگىنىڭ الدىنا جينالدى، دەپ جازادى Qamshy.kz اقپارات اگەنتتىگى azattyq.org سايتىنا سىلتەمە جاساپ.

زاۋىت جۇمىسى بيىل قاڭتاردان بەرى توقتاپ تۇر. جينالعاندار سوزىنشە، اكىمشىلىك ناۋرىزعا دەيىن جالاقىلارىنىڭ جارتىسىن عانا تولەپ كەلگەن. "ناۋرىزدان باستاپ اقشا تولەۋدى مۇلدە توقتاتتى" دەيدى ولار.

نارازىلار نەسيەلەرىنىڭ پايىزى ءوسىپ، قارىزدارىنىڭ كوبەيىپ جاتقانىن ايتىپ شاعىمداندى.

ازاتتىق ءتىلشىسىنىڭ ايتۋىنشا، ماڭايدا پوليسيا اۆتوبۋستارى تۇرعان. بەس-التى پوليسەي نارازىلاردى باقىلاپ جۇرگەن. زاۋىت قىزمەتكەرلەرى جينالعان سوڭ اكىمشىلىك نارازىلار اراسىنان ون شاقتى ادامدى ىرىكتەپ، عيمارات ىشىندە سويلەستى. ءبىر ساعاتقا جۋىق ۋاقىتتان سوڭ زاۋىت ديرەكتورى نارازىلار الدىنا شىعىپ، 31 مامىردا جالاقىنىڭ تولىق تولەنەتىنىن ۋادە ەتتى.

- وسىعان دەيىن زاۋىتتا جاسالعان كەلىسىمشارتتار ءتيىمسىز بولىپ شىقتى. رەسەيدەگى قۇرامداس بولشەكتەر 2-2،5 ەسە قىمباتتاپ كەتتى. ول جاقتاعى باسشىلار باعانىڭ كوتەرىلۋى بويىنشا كەلىسىمشارتتى قايتا قارايمىز دەپ ءسوز بەردى. وسىدان كەيىن زاۋىتتاعى جۇمىس جالعاسادى. ەكى ايدىڭ جالاقىسىن 31 مامىرعا دەيىن تولەيمىز، - دەيدى "زيكستو" زاۋىتىنىڭ باس ديرەكتورى رەنات شامسۋتدينوۆ.

"زيكستو" زاۋىتىندا 800-گە جۋىق ادام جۇمىس ىستەيدى. زاۋىت دەرەگىنشە، مەكەمەنىڭ جالپى قارىزى - 95 ميلليون تەڭگە.

ۇسىنعان: ميات كاشىباي