كوپبالالى وتباسىنىڭ باسپاناسىن تەگىن جوندەپ بەرەتىن "اناشىم، ءبىز ۇيدەمىز" اتتى جاڭا تەلەجوبا ءوز ءىسىن باستاماقشى. وعان قالاي قاتىسۋعا بولاتىنى جونىندە اقپارات جانە قوعامدىق دامۋ ءمينيسترى داۋرەن ابايەۆ ايتىپ بەردى دەپ حابارلايدى Qamshy.kz اقپارات اگەنتتىگى sputniknews.kz سايتىنا سىلتەمە جاساپ. 

مينيستر اتاپ وتكەندەي، تۇرمىسى ناشار وتباسىلارعا قولداۋ كورسەتۋ - مەملەكەتتىڭ باستى مىندەتتەرىنىڭ ءبىرى.

"اقپارات جانە قوعامدىق دامۋ مينيسترلىگى كوپبالالى وتباسىلارعا بايلانىستى باستامالاردى قولداۋعا ءاردايىم دايىن. وسى ورايدا مەملەكەتتىك تاپسىرىس اياسىندا "31 ارنامەن" بىرىگىپ "اناشىم، ءبىز ۇيدەمىز" اتتى جاڭا جوبانى كورەرمەنگە ۇسىنىپ وتىرمىز. مەملەكەتتەن بۇل جوباعا 130 ميلليون تەڭگە ءبولىندى. بۇل قارجى جىلدىڭ سوڭىنا دەيىن ەسەپتەلگەن. قالعان قاراجاتتى ارنا باسشىلىعى ءوزى قوسادى"، - دەدى داۋرەن ابايەۆ ورتالىق كوممۋنيكاسيالار قىزمەتىندە وتكەن بريفينگتە.

سونىمەن قاتار، ۆەدومستۆو ءمينيسترى تەلەجوبا اياسىندا 20-دان استام وتباسىنىڭ ءۇيى جوندەلەتىنىن ايتىپ، باعدارلامانىڭ شارتتارىن ءتۇسىندىردى.

"باعدارلاماعا قاتىسۋ ءۇشىن وتباسىندا 4 جانە ودان كوپ بالا بولۋى كەرەك. ولار "31" تەلەارناعا ءوتىنىش بەرەدى. ارناداعى كوميسسيا مۇشەلەرى اقىلداسا كەلە، ءتيىستى شەشىمدى قابىلدايدى. ءبىز تەلەارناعا تولىعىمەن سەنەمىز. جوبا اياسىندا 20-دان استام وتباسىنىڭ ءۇيى جوندەلەدى. سونداي-اق تەلەجوبا نۇر-سۇلتان، الماتىدا عانا ەمەس، بارلىق ءوڭىردى قامتيدى. ەگەر وتباسىنىڭ تاريحى، جازعان حاتى تەلەارنانىڭ رەداكسياسىنا ۇناسا، ءتۇسىرۋ توبى اۋىلدارعا دا بارادى"، - دەدى مينيستر.

وسى ورايدا ونىڭ ءسوزىن "31 ارنانىڭ" باس ديرەكتورى يۋريي برودسكيي تولىقتىردى.

"بۇگىن الەۋمەتتىك ماڭىزى بار "اناشىم، ءبىز ۇيدەمىز" جوباسىنىڭ تۇساۋىن كەسكەلى وتىرمىز. ونىڭ ماقساتى - كوپبالالى جانە تۇرمىسى ناشار وتباسىلاردىڭ ءۇيىن جوندەپ بەرۋ جانە تۇرمىسىن جاقسارتۋ. باعدارلامانىڭ ءبىرىنشى ماۋسىمى 24 بولىمنەن تۇرادى. باعدارلاما قازاقستاننىڭ بارلىق وڭىرىندە تۇسىرىلەدى. ياعني جوباعا 24 وتباسى قاتىسا الادى. باعدارلاما ودان ءارى جالعاسادى دەگەن ۇمىتتەمىز"، - دەدى باس ديرەكتور.

ارنا باسشىسى باعدارلامانى ءتۇسىرۋ وڭاي ەمەستىگىن دە اتاپ ءوتتى.

"سەبەبى لوگيستيكانى، ەكسپەديسيانى، قۇرالداردى جەتكىزۋدى ەسەپكە الىڭىز. ءبىز ءۇشىن ەڭ ماڭىزدىسى – مەملەكەتتىڭ كومەگىمەن وتباسىلاردى باقىتتى ەتۋ. ياعني ولاردىڭ باسپاناسىن جوندەپ بەرىپ، جاڭا ءومىر سىيلاۋ. ەكىنشىدەن، ءبىز كورەرمەنگە ءپوزيتيۆتى كوڭىل-كۇي سىيلاعىمىز كەلەدى. جوبامىزدىڭ ءساتتى شىققانىن قالايمىز"، - دەپ تۇيىندەدى ءسوزىن ول.

ايتا كەتسەك، "اناشىم، ءبىز ۇيدەمىز" باعدارلاماسى بيىل 11 تامىزدان باستاپ "31 ارنادان" كورسەتىلەدى.

وقي وتىرىڭىز، ♦ەلىمىزدە "اناشىم، ءبىز ۇيدەمىز" اتتى الەۋمەتتىك تەلەجوبا باستالادى (ۆيدەو)

ۇسىنعان: ماقپال سەمباي