بۇگىن نۇر-سۇلتان قالاسىنىڭ اكىمى باقىت سۇلتانوۆ ەلورداداعى كوپبالالى انالارمەن كەزدەستى. قالا باسشىسى كوپ بالالى انالاردىڭ تالاپ-تىلەكتەرىن تىڭداپ، اكىمشىلىك جالپى مەملەكەت تاراپىنان اتقارىلىپ جاتقان شارالار مەن كومەكتەر تۋرالى بايانداپ بەردى دەپ حابارلايدى Qamshy.kz اقپارات اگەنتتىگى ەلوردا ينفو سايتىنا سىلتەمە جاساپ.

بۇگىن نۇر-سۇلتان قالاسىندا "حيلتون" عيماراتىنىڭ الدىندا ءبىر توپ انالار شوعىرلانىپ، وزدەرىنىڭ نارازىلىقتارىن ءبىلدىردى. "باسپانا" دەپ ايقايلاعان قالىڭ توپتىڭ ارىنى جۋىردا باسىلا قويماعان. انالارمەن مامىلەگە كەلۋ ءۇشىن  ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ پەن نۇر-سۇلتان قالاسىنىڭ اكىمى باقىت سۇلتانوۆ ارنايى ۋاقىت ءبولدى. 

باس كوتەرۋدىڭ ارتىنشا ەلوردا اقپارات سايتىندا تومەندەگىدەي مالىمەتتەرگە تۇنعان ماتەريال جارىق كوردى. "كوزىقاراقتى وقىرمان مەن كوپ بالالى انالار وزدەرىنە قانداي جاعداي قاراستىرىلعانىن بىلە ءجۇرسىن" دەگەن نيەتپەن جازبانى جاريالاپ وتىرمىز. 

نۇر-سۇلتان قالاسى اكىمىنىڭ شەشىمىمەن ەلوردا تۇرعىندارىنىڭ ءومىر ساپاسىن جاقسارتۋ ماقساتىندا كەشەندى جوسپار ازىرلەنگەن.

ونىڭ ىشىندە كوممۋنالدىق قىزمەت تولەمدەرىنە كومەك؛ مۇمكىندىگى شەكتەۋلى جانداردى الىپ جۇرەتىن ادامداردىڭ جولاقىسىن تولەۋ؛ مۇمكىندىگى شەكتەۋلى بالالارعا كومەك كورسەتۋ؛ كوپبالالى وتباسىلارىنىڭ بالالارىنىڭ كوللەدجدە تەگىن وقۋى؛ تۇرعىن ءۇي سەرتيفيكاتتارى؛ كوپبالالى وتباسىلارىنىڭ مەكتەپ، كوللەدجدە وقيتىن ستۋدەنتتەرىنىڭ جولاقىسىن تولەۋ؛ كوپبالالى وتباسىلارىنىڭ بالالارىن مەكتەپتە تەگىن تاماقتاندىرۋ؛ ساۋىقتىرۋ لاگەرلەرىنە جولداما بەرۋ؛ مەكتەپ فورماسى مەن كانسەلياريالىق تاۋارلارمەن قامتاماسىز ەتۋ؛ بالاباقشالاردان ورىن بەرۋ؛ جوو كوپبالالى وتباسىلارىنىڭ بالالارى ءۇشىن گرانت ءبولۋ؛ كوپبالالى انالار بيۋدجەت ەسەبىنەن ءتىسىن ەمدەپ، سالدىرۋ؛ جەر ۇيدە تۇراتىن كوپبالالى وتباسىلارىن قىستا وتىمەن قامتاماسىز ەتۋ سياقتى كومەك تۇرلەرى بار.

الەۋمەتتىك تۇرعىدان از قامتىلعان جانە كوپبالالى وتباسىلاردى قولداۋ ءۇشىن قوسىمشا 13 شارا قولعا الىنىپ، وعان 6،5 ملرد تەڭگە ءبولىندى.

بيىلعى جىلى نۇر-سۇلتان قالاسىندا الەۋمەتتىك سالاعا بولىنگەن قارجى سوماسى 150 ملرد تەڭگەنى قۇراپ وتىر. 2019 جىلدىڭ ساۋىرىنەن باستاپ قالاداعى ەمحانالاردا ءار سەنبى سايىن كوپبالالى وتباسىلاردى قابىلداۋ ۇيىمداستىرىلعان. مۇمكىندىگى شەكتەۋلى بالالاردىڭ ۇيلەرىنە بارىپ كومەك كورسەتۋگە قاراستىرىلاتىن قارجى 6،5 اەك-تەن 10 اەك (25250 تەڭگە) دەيىن ارتتى. بۇل شارامەن 228 ادامدى قامتۋ كوزدەلىپ وتىر. سونىمەن قاتار بۇعان دەيىن حابارلاعانىمىزداي، ءبىلىم بەرۋ قورىنان دا الەۋمەتتىك كومەك الۋعا بولادى.

جەرگىلىكتى اتقارۋشى ورگان الەۋمەتتىك از قامتىلعان وتباسىلاردى جان-جاقتى قولداۋ ءۇشىن 30-دان استام تولەم جۇرگىزۋدى قولعا العان. بۇل ماقساتقا بولىنگەن قارجى 12،2 ملرد تەڭگە. باسپانا ماسەلەسىن شەشۋگە تولەنەتىن تولەمدەر ورتاشا العاندا 18 % ارتتى، ول ءۇشىن تاعى 34 ملن تەڭگە بولىنگەن. كوپبالالى 1300 وتباسى مامىر ايىندا قونىس تويىن تويلايدى. 1300 ءبىلىم بەرۋ، دەنساۋلىق ساقتاۋ سالاسى مەن پوليسيا دەپارتامەنتى قىزمەتكەرلەرىنىڭ باسپانا ماسەلەسىن شەشۋگە 2 مىڭ تۇرعىن ءۇي سەرتيفيكاتىن بەرۋ كوزدەلگەن.

جەرگىلىكتى بيۋدجەت ەسەبىنەن الەۋمەتتىك ءالسىز توپقا قوسىمشا قولداۋ كورسەتىلەتىن بولادى. الەۋمەتتىك جوبا اياسىندا اۋتيزممەن اۋىراتىن بالالارعا ارنايى قىزمەت كورسەتۋ ءۇشىن بيۋدجەتتەن 40 ملن تەڭگە قاراستىرىلعان. قازىرگى تاڭدا نۇر-سۇلتان قالاسىندا 100-دەي بالاعا وسىنداي كومەك كورسەتىلەدى.

جۇمىسپەن قامتۋ باعدارلاماسى اياسىندا 2019 جىلى 1،2 ملرد تەڭگە ءبولىندى. سونىڭ ناتيجەسىندە قوعامدىق جۇمىسقا تارتىلاتىن ازاماتتار سانى 500-دەن 1 مىڭ ادامعا دەيىن ارتادى. قوعامدىق جۇمىستارمەن قامتاماسىز ەتىلگەن ادامداردىڭ جالاقىسى 48 مىڭنان 84 مىڭعا دەيىن كوبەيدى.

اتاۋلى الەۋمەتتىك كومەككە قاتىستى سۇراقتاردى Smart Astana قوسىمشاسىنان بىلۋگە بولادى.

ۇسىنعان: ادىلەت مادەنيەت