16 مامىر كۇنى نۇر-سۇلتان قالاسىندا كوپ بالالى جانە جالعىزباستى انالاردىڭ نارازىلىعى ءوتتى، دەپ جازادى Qamshy.kz اقپارات اگەنتتىگى. 

نارازىلىق قالاي باستالدى؟

ازاتتىق راديوسىنىڭ ايتۋىنشا، انالاردىڭ نارازىلىعى قالالىق اكىمدىككە قىرىققا جۋىق انا كەلىپ، باسپانا مەن جاردەماقى ماسەلەسىنە شاعىمدانۋىنان باستالعان. نارازىلار اراسىندا كوپ بالالى، جالعىزىلىكتى جانە مۇگەدەك بالا باعىپ وتىرعاندار بار.

نارازىلار بيلىكتىڭ باسپانا ماسەلەسىن شەشۋ ءۇشىن ۇسىنعان باعدارلامالارى ءتيىمسىز دەپ ساناپ، ۇكىمەتتەن ءۇيدى العاشقى جارناسىز، بانك كوميسسياسىنسىز بەرۋدى سۇرايدى. باسپانا مەن اتاۋلى الەۋمەتتىك كومەك الۋ ءۇشىن قۇجات دايىنداعاندارىن ايتقان انالار كەدەرگىلەر كوپتىگىن دە ايتتى.

جينالعاندار وتكەن ايدا بالالارعا بەرىلەتىن جاردەماقىنى كوبەيتۋ، الەۋمەتتىك جەڭىلدىكتەر جاساۋ سياقتى ونداعان تالابىن جازىپ، قازاقستان پرەزيدەنتى قاسىم-جومارت توقايەۆ پەن پرەمەر-مينيستر اسقار مامينگە، پارلامەنت دەپۋتاتتارىنا حات جولداعان. اكىمدىككە جينالعان انالار وزدەرىنىڭ حاتى قايىرىلعان بيلىك وكىلدەرىنە ەمەس، ەڭبەك جانە حالىقتى الەۋمەتتىك قورعاۋ مينيسترلىگىنە جەتكەنىنە نارازى.

اكىمدىك الدىنا 10.30 شاماسىنا جينالعان انالارعا قالا اكىمى دە، ورىنباسارلارى دا شىقپاعان سوڭ نارازىلار استانا ەكونوميكالىق فورۋمى ءوتىپ جاتقان كونگرەسس ورتالىعىنا بەت العان. نارازىلار فورۋمعا بارا جاتقان سوڭ اكىمدىك وكىلى شىعىپ، قالا اكىمى باقىت سۇلتانوۆتىڭ ورىنباسارلارى انالاردى كەزدەسۋگە شاقىرعانىن ايتتى. ءبىراق انالار "ولاردىڭ ەشتەڭە شەشپەيتىنىن" مالىمدەپ، اكىمدىككە قايتۋعا كەلىسپەگەن.

"ەلباسى كەلسىن"

نارازى انالار حالىقارالىق ەكونوميكالىق فورۋم ءوتىپ جاتقان اتالمىش عيماراتتىڭ الدىنا جينالىپ، قازاقستاننىڭ بۇرىنعى پرەزيدەنتى ن.نازاربايەۆتىڭ بيلىككە  كەلىپ، ءوزى ۋادە ەتكەن اتاۋلى الەۋمەتتىك كومەكتى بەرۋىن تالاپ ەتتى. ولاردى قالالىق پوليسيا دەپارتامەنتىنىڭ وكىلى باقىتجان مالىبايەۆ تاراپ كەتۋگە شاقىردى. ءبىراق انالار نارازىلىقتارىن ءبىلدىرىپ، تاراماي تۇرىپ الدى.

"ويتكەنى ونىڭ قارنى توق"

ولار "بيلىكتەگىلەر حالىقتىڭ جاعدايىن ويلامايدى، مەملەكەتتىڭ اقشاسى ۇستاعاننىڭ قولىندا، تىستەگەننىڭ اۋزىندا كەتىپ جاتىر" دەپ اشىندى.

"ەلباسى بىزگە تەلەديداردان پيار جاساپ، اتاۋلى الەۋمەتتىك كومەك، باسپانا ۋادە ەتتى عوي. ءبىراق قاراساڭىزدار، ەلباسىنىڭ وسى سوزىنەن كەيىن 1 مامىردان باستاپ انالار قانشا ءۇي الدى؟ مەن مىسالى، كەزەكتە ون مىڭىنشىمىن، 10 جىل بولدى ءقازىر سەگىز مىڭىنشى ورىنعا كەلدىم. سوندا نە،10 جىلدا 2000 ادام عانا ءۇي الدى ما؟ ونىڭ ءبارى وتىرىك. ەلدىڭ ءبارىن الداپ-الداپ، حالىقتىڭ قاراجاتىن ۇكىمەت ءوزى يەمدەنىپ جاتىر. ءبىزدىڭ شاحتەرلارىمىزدىڭ، مۇنايشىلارىمىزدىڭ، تەمىرجولشىلارىمىزدىڭ اقشاسى باسقا بىرەۋدىڭ قالتاسىندا كەتىپ جاتىر. وسىنىڭ بارلىعى حالقىمىزدىڭ مومىندىعىنان، ءيتى دە، ءبيتى دە باسىمىزعا شىقتى. ۇستاعاننىڭ قولىندا، تىستەگەننىڭ اۋزىندا كەتىپ جاتىر. مەن مىنا انالاردىڭ قانداي جاعدايدا ءومىر ءسۇرىپ جاتقانىن كورگەندە، جۇرەگىم قارس ايرىلادى. جەيتىن نان، ىشەتىن ءسۇت تاپپاي، سابيلەرى قارا سۋ ءىشىپ، قارا نان جەپ وتىر. ونى ەلباسى بىلە مە ەكەن، بىلمەيدى! ويتكەنى ونىڭ قارنى توق. ونى ءبىز بىلەمىز"، - دەدى نارازى انالاردىڭ بىرەۋى.

اكىم مەن مينيستر انالاردى ىمىراعا شاقىردى

"بالالارعا ءۇي بەرىلسىن!"، "باسپانا" دەپ ايقايلاعان انالارمەن سويلەسۋگە فورۋم ءوتىپ جاتقان عيماراتتىڭ ىشىنەن نۇر-سۇلتان قالاسىنىڭ اكىمى باقىت سۇلتانوۆ پەن ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ كەلىپ، ولاردى اۆتوبۋسپەن قالا اكىمدىگىنىڭ عيماراتىنا بارىپ، ءوز ماسەلەلەرىن ايتۋعا شاقىردى.

اكىمدىك قىزمەتكەرلەرى نارازى توپپەن بىرگە جۋرناليستەردىڭ اۆتوبۋسقا مىنۋىنە كەدەرگى كەلتىرگەن. الايدا، انالار "اۆتوبۋسقا جۋرناليستەر مىنسە عانا، اكىمدىككە بارامىز" دەپ تالاپ قويدى. انالاردىڭ تالابىنا امالسىزدان كەلىسكەن ولار جۋرناليستەردىڭ بىرگە بارۋىنا كەلىسكەن. الايدا، اكىمدىك عيماراتىنا جەتكەن سوڭ عيمارات ىشىنە ب ا ق وكىلدەرىنىڭ كىرۋىنە تاعى دا قارسىلىق ءبىلدىرىلدى. "جۋرناليستەر كىرمەسە، ءبىز دە كىرمەيمىز" دەگەن انالارعا بەردىبەك ساپاربايەۆ "سىزدەردىڭ ماسەلەلەرىڭىز عوي، جۋرناليستەردىڭ قانداي قاتىسى بار؟" دەپ ءۋاجىن ايتتى.

سۇلتانوۆ سۇراقتارعا جاۋاپ بەردى

بۇدان كەيىن قالا اكىمى بەرىك سۇلتانوۆ نارازى انالاردى اكىمدىك عيماراتىندا قابىلدادى. ءبىراق وعان ەڭبەك جانە حالىقتى الەۋمەتتىك قورعاۋ ءمينسترى ساپاربايەۆ قاتىسقان جوق. قابىلداۋ بارىسىندا انالار باسپانا جانە اتاۋلى الەۋمەتتىك كومەك ماسەلەسىن كوتەرىپ، سۇراقتارىن قويدى.

جينالعانداردىڭ كەيبىرى باسپانا الۋ ءۇشىن بانككە العاشقى جارنا تولەۋ تالابىن الىپ تاستاۋدى سۇرادى. سۇلتانوۆ "العاشقى جارنا تولەۋ تالابىن الىپ تاستاۋ - بانكتى قۇلدىراتۋ دەگەن ءسوز" دەدى. باسپانا كەزەگىنىڭ باياۋ جىلجيتىنىنا شاعىنعان انالارعا سۇلتانوۆ "ماسەلەنىڭ شەشىلىپ جاتقانىن" ايتىپ جاۋاپ بەردى.

- كەزەكتە تۇرعاندارعا بەرىلەتىن باسپانا سانىن كوبەيتۋگە تىرىسامىز. ۇكىمەت ءتۇرلى باعدارلامالار ارقىلى الماتى دا، شىمكەنتتە دە وسى ماسەلەنى شەشۋگە تىرىسىپ جاتىر. سەبەبى بىزدە ماسەلە راسىمەن كوپ. كەزەككە تۇرا الماي جاتقاندار دا بار، - دەدى اكىم.

قالا اكىمى باسپا ءسوز قىزمەتىنىڭ حابارلاۋىنشا، جيىنعا 70-كە تارتا انا كەلگەن. ولار سۇلتانوۆتىڭ اتىنا جەكە باسىنداعى ماسەلەسىن جازىپ، ارنايى  جازبا قالدىردى. ءبىراق كوكەيدە ءبىر سۇراق بار: قالا باسشىسى باقىت سۇلتانوۆ پەن اكىمدىكتەگىلەر وسى ۋاقىتقا دەيىن قايدا قاراعان؟ ماسەلەنىڭ شەشىلۋى ءۇشىن انالار مىندەتتى تۇردە ميتينگكە شىعۋى كەرەك پە؟