قاشپاق بولعان بىرنەشە ادام مينا باسىپ مەرت بولدى. ءبىرازىن سنايپەرلەر اتىپ تاستادى. "جۋسان" وپەراسياسى كەزىندە سيريادان ەلگە جەتكىزىلگەن وتانداستارىمىز سوعىس وشاعىندا ءجۇرىپ، كورگەن قورلىقتارىمەن ءبولىستى. سودىرلار ەرەسەكتەردى بىلاي قويعاندا،  بالالارعا دا قارۋ كەزەنگەن ەكەن. اباقتىعا دا قاماعان دەپ جازادى Qamshy.kz اقپارات اگەنتتىگى ەۋرازيا ءبىرىنشى ارناسىنىڭ دەرەگىن نەگىزگە الىپ.

سوعىس وشاعىنان كەلگەن بالا ءتۇرلى-تۇستى سۋرەت سالۋعا بولاتىنىن بىلمەيتىندەي كورىنەدى. بۇل - "جۋسان" وپەراسياسى شەڭبەرىندە ەلگە ورالعان 156 بالانىڭ بارلىعىنا ورتاق جايت. بۇلدىرشىندەر ءۇيدى دە، دالانى دا تەك قارا ءتۇستى قارانداشپەن بەدەرلەگەن. پسيحولوگتار مۇنى "تەرەڭ دەپرەسسيانىڭ بەلگىسى" دەيدى.

"العاش كەلگەندە بالالار ۇشاقتى كورىپ قاشاتىن. ۇستەلدىڭ، ورىندىقتىڭ استىنا تىعىلىپ وتىراتىن. كەي بالالاردىڭ اقىل-ەسىندە كەمىستىگى بارى انىقتالدى. وعان انالارىنىڭ جۇكتىلىگى ادام توزگىسىز جاعدايدا وتكەنى سەبەپ بولعان. ولار دارىگەردىڭ كومەگىنسىز قاراڭعى جەرتولەدە بوسانعاندارىن ايتقان ەدى"، - دەيدى لولا شاكيموۆا اتتى پسيحولوگ.

وڭالتۋ ورتالىعىنداعى پسيحولوگتىڭ مۇنداي بايلام جاساۋىنا نە تۇرتكى بولعانى ورالعان ايەلدەردىڭ سوزىنەن كەيىن اڭعارىلادى. شام جەرىنە اياق باسقان ادام ەلگە قايتۋ تۋرالى ۇمىتۋى شارت. بولماسا وققا ۇشاسىڭ.

وق تەك ايەلدەرگە عانا ەمەس، بالالارعا دا اتىلعان سەكىلدى. ويتكەنى ەلگە قايتقان كىشكەنتاي وتانداستارىمىز ويىننان ەمەس، قارۋدان جارالانعانى بەلگىلى بولدى.

"سەگىز-توعىز جاستاعى بالالاردىڭ دياگنوزى "وگنەسترەلنوە رانەنيە". سونىمەن جاتقان بالالار بار"، - دەيدى مۇنايلى اۋداندىق ەمحاناسىنىڭ دارىگەر-پەدياترى البينا ايتپاعامبەتوۆا. 

كەيىن قايتقىسى كەلەتىندەر ءۇشىن تۇرمە دە بولعان سياقتى. اسىر سالىپ ويناۋدىڭ ورنىنا بۇلدىرشىندەر تەمىر توردىڭ ار جاعىن كورۋمەن جۇرگەن ەكەن. 

"كاسرا دەيتىن جەرگە اپاردى تۇرمەگە. سول جاقتا 12 كۇن وتىردىق. سوسىن ءبىزدى حولعا جىبەردى. سول حولدا 4 اي وتىردىق. سول جەردە شامامەن 5 اي بولدىق"، - دەيدى سوعىس وشاعىندا بولعان ءجاسوسپىرىم. 

باعىنباعانى اباقتى، ەركىندىكتەگىسى اتىلعان وق پەن بومبانى كورگەن، سوزدەرىنە سەنسەك. "توزاقتان شىعاتىن جول بولمايدى" دەگەندەردىڭ ەندى ءۇمىتى پايدا بولدى.

"ۇشاققا وتىرعان ساتتە جىلاي باستادىم. جان-جاعىمداعىلار "نەگە جىلايسىڭ؟" دەپ سۇرادى. "قۋانعاننىڭ اسەرى" دەدىم. بالالارىم ءۇشىن قۋاندىم. ەندى ەمىن-ەركىن وينايدى. ۇيىقتاۋعا جاتقاندا ەرتەڭ ويانامىز با، جوق پا، بىلمەيتىنبىز. ول قورقىنىش ەندى ارتتا قالادى دەپ ويلايمىن"، -دەيدى ول.

ەندى قاباعى تۇسكەن بالالاردىڭ ەزۋىنە دە كۇلكى ۇيالادى...

ۇسىنعان: اسەل بولات قىزى