قازاقستاندىق جاس ءانشى ەرجان ماكسيم رەسەيدە وتكەن "گولوس.دەتي" شوۋىنىڭ جەڭىمپازى اتىندى دەپ جازادى Qamshy.kz اقپارات اگەنتتىگى.
بۇل تۋرالى اتالعان شوۋدى ۇيىمداستىرۋشى "ءبىرىنشى ارنا" ديرەكتورى كونستانتين ەرنەست شوۋدىڭ ارنايى شىعارىلىمىندا مالىمدەدى.
"گولوس.دەتي" شوۋىنىڭ فينالىنا شىققان قاتىسىۋشىلاردىڭ بارلىعى جەڭىمپاز. ولاردىڭ ءارقايسىنا 1 ميلليون رۋبل سىياقى جانە "يۋنيۆەرسال ميۋزيك" ستۋدياسىندا ءان جازۋعا مۇمكىندىك بەرىلەدى"، - دەدى ەرنەست.
جەڭىمپازعا بەرىلەتىن مۇسىنشەنى ءبىرىنشى بولىپ ەرجان ماكسيمگە تاپسىرعان ەرنست وعان "ءبىرىنشى ارنادا ەشتەڭە ساتىلمايتىنىن سەن ەندى بىلەتىن بولاسىڭ" دەدى.
سونىمەن قاتار كونستانتين ەرنست "گولوس.دەتي" شوۋى جالعاساتىنىن ايتتى.
ەستەرىڭىزدە بولسا، 26 ساۋىردە "ءبىرىنشى ارنا" تىكەلەي ەفيرىندە "گولوس دەتي" شوۋىنىڭ فينالى ءوتىپ، رەسەيلىك ءانشى السۋدىڭ قىزى ميكەللا ابراموۆا 56،5 پايىز داۋىسپەن جەڭىسكە جەتكەن. قازاقستاندىق ەرجان ماكسيم 27،9 پايىز داۋىسپەن – ەكىنشى، ۆالەريي كۋزاكوۆ 15،6 پايىز داۋىسپەن ءۇشىنشى ورىن العان.
بۇل ناتيجەگە كوڭىلدەرى تولماعان رەسەيلىك انشىلەر مەن اكتەرلەر، جەلى قولدانۋشىلارى كونكۋرس داۋىس بەرۋ ناتيجەسىن قايتا قاراۋدى تالاپ ەتكەن.
ۇسىنعان: ميات كاشىباي
