Samsung كومپانياسى 2018-2019 وقۋ جىلىنىڭ قورىتىندىسى بويىنشا الماتى Coding Lab باعدارلامالىق مەكتەبىنىڭ ۇزدىك ونەرتاپقىشتارى اراسىندا جەڭىمپازداردى انىقتادى دەپ حابارلايدى Qamshy.kz اقپارات اگەنتتىگى.
قاتىسۋشىلار ءوز جۇمىستارىن ءۇش ءبولىم بويىنشا قورعادى: الەۋمەتتىك قوسىمشالار، ويىندار جانە باعدارلامالاۋ. بارلىعى 14 جوبا تانىستىرىلدى.
جەڭىمپازدار: ەرىك سەرىكباي – كومەككە مۇقتاج جانداردى وڭاي تابۋعا كومەكتەسەتىن Komek قوسىمشاسى، (الەۋمەتتىك قوسىمشا)؛ دميتريي پاۆلوۆ - Dig & Run (ويىندار)؛ دەنيس موتين - تاگال ءتىلىنىڭ سوزدىگى (باعدارلامالاۋ). ولاردىڭ ءارقايسىسىنا سىيلىققا Galaxy A50 سمارتفوندارى بەرىلدى.
قاتىسۋشىلار جاساعان جوبالاردىڭ اراسىندا ادامداردىڭ ءومىرىن جاقسارتۋعا ارنالعان قوسىمشالار وتە كوپ. مىسالى، قوسىمشالار ارقىلى دۇكەندەردىڭ باعالارىن سالىستىرا الاسىڭ، شەتەل ءتىلىن تەز مەڭگەرۋگە بولادى، ۇبت-عا ءتيىمدى دايىندالۋعا بولادى، ەلەكتروندى كىتاپتار وقي الاسىڭ.
ستۋدەنتتەردىڭ جۇمىسىن Samsung كوممۋنيكاسيالىق كومپانياسىنىڭ IT-شەشىمدەرىن ازىرلەۋگە جاۋاپتى Cheil Kazakhstan شىعارماشىلىق اگەنتتىگىنىڭ قىزمەتكەرلەرى باعالادى. باستى تالاپ – تەحنيكالىق ورىنداۋ شەبەرلىگى، ينتەرفەيس جانە ىڭعايلىلىق.
وسىلايشا، جوعارعى سىنىپ وقۋشىلارى ءۇشىن 2017 جىلى تەگىن Coding Lab باعدارلامالاۋ مەكتەبىن اشقان Samsung كومپانياسى 2018-2019 جىلعا ارنالعان كەزەكتى توعىز ايلىق وقۋ جوباسىن اياقتادى.
Coding Lab – باعدارلامالاۋدى ۇيرەنىپ، سۇرانىسقا يە مامان بولىپ شىعۋعا مۇمكىندىك بەرەدى. بۇل جەردەن Java تىلىندە باعدارلامالاۋ، Android پلاتفورماسىندا قوسىمشا ازىرلەۋ، Java ءتىلىنىڭ قۇرىلىمى مەن دەرەكتەرىن باعدارلامالاۋ، ءموبيلدى قوسىمشالاردىڭ سەرۆەرلىك بولىگىن دامىتۋ نەگىزدەرى، كومپيۋتەرلىك گرافيكا نەگىزدەرى جانە ديزاينى سىندى كوپتەگەن كەرەكتى ماعلۇماتتاردى ۇيرەنۋگە بولادى.
Coding Lab ءبىلىم بەرۋ ورتالىعىندا ورتا مەكتەپتەردىڭ جانە كوللەدجدەردىڭ 14 جاستان 18 جاسقا دەيىنگى كەز كەلگەن وقۋشىسى وقي الادى. وقۋ مەرزىمى قىركۇيەكتەن باستالىپ مامىر ايىنا دەيىن جالعاسادى. وقۋ اپتاسىنا ەكى رەت 110 مينۋتتان Samsung كومپانياسىنىڭ ءال-فارابي اتىنداعى قازاق ۇلتتىق ۋنيۆەرسيتەتىنىڭ يننوۆاسيالىق اكادەمياسىندا وتەدى. جوباعا قاتىسۋشى بارلىق ۇستازدار – جوعارى بىلىكتى ماماندار. وقۋدىڭ تولىق كۋرسىنان وتكەن وقۋشى ارنايى سەرتيفيكات الىپ شىعادى. جوباعا ىرىكتەۋ كۋرس اياقتالعانشا جۇرەدى.
دايىنداعان: مارجان سابەت
پىكىر قالدىرۋ