مامىر ايىنىڭ 28-31 كۇندەرى "جۋسان" وپەراسياسىنىڭ سوڭعى كەزەڭى جۇزەگە اسىرىلدى. بۇل تۋرالى 31 مامىردا قازاقستان پرەزيدەنتى قاسىم-جومارت توقايەۆ مالىمدەدى دەپ حابارلايدى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ.

قازاقستان ازاماتتارىن سيريادان قايتارۋ «جۋسان" ارنايى وپەراسياسىنىڭ ءۇشىنشى كەزىندە سيريادان 67 ايەل ادام، 171 بالا، ونىڭ ىشىندە، توعىزى جەتىم، ەلگە قايتارىلعان. ولار ءبىراز ۋاقىت وڭالتۋ ورتالىعىندا بولادى. اقوردانىڭ باسپا ءسوز قىزمەتى ءۇش كەزەڭنەن تۇرعان "جۋسان" وپەراسياسىنىڭ اياقتالعانىن حابارلادى.

بۇعان دەيىن 9 قاڭتاردا بۇرىنعى پرەزيدەنت نۇرسۇلتان نازاربايەۆ "جۋسان-1" ارنايى وپەراسياسى ناتيجەسىندە قازاقستاننىڭ 47 ازاماتى سيريادان ورالعانىن مالىمدەگەن. 7 جانە 9 مامىر كۇندەرى "جۋسان-2" وپەراسياسى اياسىندا سيريادان قازاقستاننىڭ 231 ازاماتى ەلگە جەتكىزىلگەن. ولاردىڭ 159-ى – بالا.

ق ر پرەزيدەنتى قاسىم-جومارت توقايەۆ «جۋسان-3» وپەراسياسىنىڭ ءساتتى اياقتالعانى تۋرالى مالىمدەمە جاسادى.

"مەنىڭ تاپسىرمام بويىنشا 28-31 مامىردا «جۋسان» ارنايى گۋمانيتارلىق اكسياسىنىڭ سوڭعى كەزەڭى تابىستى ءوتتى. سيريادان وتانداستارىمىزدىڭ كەزەكتى توبى ورالدى. قازاقستاننىڭ مەملەكەتتىك قۇرىلىمدارىنىڭ جۇيەلى جۇمىستارىنىڭ جانە شەتەلدىك سەرىكتەستەرمەن تىعىز ىقپالداستىقتىڭ ارقاسىندا قاقتىعىس ايماعىنان 171 بالا شىعارىلدى. قازاقستانعا ورالعان سوڭ، ولار وڭالتۋ شارالارىنان ءوتىپ، بارلىق قاجەتتى كومەك الاتىن ارنايى بەيىمدەۋ ورتالىعىنا ورنالاستىرىلدى.

جۋسان» گۋمانيتارلىق وپەراسياسى – اۋقىمدى اكسيا. بۇل باستامانى تۇڭعىش پرەزيدەنت – ەلباسى نۇرسۇلتان نازاربايەۆ ۇسىندى جانە بىلتىردان بەرى جۇزەگە اسىرىلۋدا. كەشەندى شارالار ناتيجەسىندە قاقتىعىس ايماعىنان وتانىمىزعا 357 بالا قايتارىلدى. بالالاردىڭ قاۋىپسىزدىگىن قامتاماسىز ەتۋ «جۋسان» وپەراسياسىنىڭ باستى ماقساتى بولدى.

«جۋسان» گۋمانيتارلىق وپەراسياسىنىڭ قورىتىندىلارى مەملەكەتىمىزدىڭ وتە كۇردەلى مىندەتتەردى ءتيىمدى شەشۋگە قابىلەتتى ەكەنىن كورسەتتى.

وسى وپەراسياعا قاتىسقان ارنايى قىزمەت وكىلدەرىنىڭ، ديپلوماتتاردىڭ، اسكەريلەردىڭ بارىنە تاپسىرىلعان جاۋاپتى ميسسيانى ابىرويمەن ورىنداعانى ءۇشىن العىس بىلدىرەمىن.

ەلگە ورالعان وتانداستار جاڭا ءومىر باستاۋعا، ال بالالار بەيبىت ءومىر سۇرۋگە مۇمكىندىك الدى.

ءبىز ءوز ازاماتتارىمىزدىڭ قۇقىقتارى مەن قاۋىپسىزدىگىن الداعى ۋاقىتتا دا قورعايتىن بولامىز" دەگەن مەملەكەت باسشىسى مالىمدەمەسىندە. 

«جۋسان-3» وپەراسياسى سيريادان قازاقستاندىق» ازاماتتاردى ەلگە جەتكىزۋ بويىنشا كەشەندى گۋمانيتارلىق وپەراسياسى بارىسىندا ەلگە جالپى 516 قازاقستاندىق جەتكىزىلدى. ونىڭ 357ء-سى بالا.

ۇسىنعان: ماقپال سەمباي