قازاقستاندا 3 مىڭ ۇستاز بەن دارىگەرگە پاتەر بەرىلەدى. اتالعان باستامانى قازاقستانىڭ يپوتەكالىق كومپانياسى قولعا الىپ وتىر دەپ حابارلايدى Qamshy.kz اقپارات اگەنتتىگى Sputnik قازاقستان سايتىنا سىلتەمە جاساپ.

كومپانيا باسشىسى ءادىل مۇحامەدجانوۆتىڭ ايتۋىنشا، باعدارلاما شارتتارىنا سايكەس، ءاربىر پاتەر 20 جىلعا جالعا بەرىلەدى. الايدا باسپانانى كەز كەلگەن ۋاقىتتا ەشبىر ايىپپۇلسىز مەرزىمىنەن بۇرىن ساتىپ الۋعا بولادى. كىرىستىڭ كولەمى جەتكىلىكسىز بولسا، كەپىلگەرلەردى تارتۋعا مۇمكىندىك بار. باستاپقى جارنا سالۋدىڭ قاجەتى جوق.

وسى باعدارلاما قاتىساتىن ازاماتتاردىڭ ءتىزىمىن مينيسترلىكتەر جاسايدى. ال قازاقستاننىڭ يپوتەكالىق كومپانياسى ۇمىتكەرلەردىڭ تولەم قابىلەتتىلىگىن تەكسەرىپ، جالداۋ كەلىسىمشارتتارىن راسىمدەيدى. جوسپار بويىنشا الداعى ەكى جىلدا 3 000 ارەندالىق پاتەر تاراتىلادى. ول ۇستازدار مەن دارىگەرلەر اراسىندا تەڭ بولىنەدى.

"ءبىز الدىمەن مينيسترلىكتەردىڭ ءتىزمىن كۇتەمىز. ودان كەيىن دايىن پاتەرلەرلى ساتىپ الامىز دا، ءتىزىم بويىنشا تاراتامىز. پاتەرلەردى ساتىپ الۋعا 40 ميلليارد تەڭگەمىز بار. بۇل – بيۋدجەتتىك ەمەس قاراجات. ءبىر پاتەردىڭ اۋدانى 80 شارشى مەتردەن اسپايدى. سوسىن نۇر-سۇلتان مەن الماتى قالالارىندا ءبىر شارشى مەتردىڭ باعاسى  260 000 تەڭگەدەن اسپاۋى ءتيىس. ال ايماقتاردا اتالعان كورسەتكىش 220 000 تەڭگەدەن ارتىق بولماۋى شارت"، - دەيدى مۇحامەدجانوۆ ەلوردادا وتكەن باسپا ءسوز ءماسليحاتىندا.

رەسمي مالىمەتكە سايكەس، 50 شارشى مەتردى قۇرايتىن ارەندالىق پاتەردىڭ ورتاشا باعاسى 13 ميلليون تەڭگە بولسا، 20 جىلدىڭ ىشىندە اي سايىن 60-70 مىڭ تەڭگە تولەۋ كەرەك.

"سوسىن پاتەردى راسىمدەگەنى ءۇشىن 1 پروسەنتتىك تولەماقى بار. ماسەلەن، 13 ميلليون تەڭگەنىڭ 1 پروسەنتى – 130 000 تەڭگە. بۇل كوپ اقشا ەمەس دەپ ويلايمىن. وسى سومانى ءبىزدىڭ جۇمىسىمىز ءۇشىن تولەۋ كەرەك. ال جالپى جىلدىق مولشەرلەمە 3 پروسەنتتى قۇرايدى. سەبەبى ءبىز پاتەرلەردى ساتىپ العاندا اقشانى قارىزعا الامىز. ول شىعىنداردى دا وتەۋىمىز كەرەك"، - دەپ اتاپ كورسەتتى ول.

ايتا كەتەيىك، بۇگىندە دەنساۋلىق ساقتاۋ سالاسىندا 15 000 قىزمەتكەر باسپاناعا ءزارۋ. ال  ءبىلىم سالاسىندا 10 000 مامان پاتەرسىز ءجۇر.