بيىل ۇلتتىق ءبىرىڭعاي تەستىلەۋدىڭ (ۇبت) وتكىزىلۋ فورماتىنا قاتىستى ەشقانداي وزگەرىستەر بولماعانىمەن، ءبىلىم بەرۋ گرانتتارىن ءبولۋ ۇردىسىنە ءبىرقاتار وزگەرىستەر ەنگىزىلدى دەپ حابارلايدى Qamshy.kz اقپارات اگەنتتىگى ءبىلىم جانە عىلىم مينيسترلىگىنە سىلتەمە جاساپ.

بۇرىن-سوڭدى جوو مەملەكەتتىك گرانتتارى ماماندىق بويىنشا بولىنەتىن بولسا، ەندىگى كەزەكتە ءبىلىم بەرۋ باعدارلامالارىنىڭ توپتارى بويىنشا بولىنەتىن بولادى. اتالمىش توپتارعا جوعارى وقۋ ورىندارىنىڭ ءبىر نەمەسە بىرنەشە ءبىلىم بەرۋ باعدارلامالارى كىرەدى.  بارلىعى 97 توپ بار. 

ماسەلەن، ماۋسىم ايىنداعى ۇلتتىق ءبىرىڭعاي تەستىلەۋدەگى سىناقتى تالاپكەر «ماتەماتيكا» + «فيزيكا» پاندەرىنىڭ كومبيناسياسى بويىنشا تاپسىرادى دەلىك. سايكەسىنشە، تالاپكەر ءۇشىن ءبىلىم بەرۋ باعدارلاماسىنىڭ توبىن ۇسىنىلعان 25 باعدارلامانىڭ ىشىنەن تاڭداپ الۋ مۇمكىندىگى تۋىندايدى. تومەندە پاندەر كومبيناسياسى مەن سايكەسىنشە ءبىلىم بەرۋ باعدارلامالارى توپتارىنىڭ كولەمى ۇسىنىلعان:   
"بيولوگيا" + "گەوگرافيا" - 9 
"دۇنيەجۇزى تاريحى" + "گەوگرافيا" - 4 
"ماتەماتيكا" + "فيزيكا" - 25 
"حيميا" + "بيولوگيا" - 16 
"گەوگرافيا" + " دۇنيەجۇزى تاريحى " - 1 
"قازاق ءتىلى" + "قازاق ادەبيەتى" - 3 
"ورىس ءتىلى" + "ورىس ادەبيەتى" - 3 
"شەت ءتىلى" + " دۇنيەجۇزى تاريحى" - 5 
"ماتەماتيكا" + "گەوگرافيا" - 9 
"دۇنيەجۇزى تاريحى" + "ادام. قوعام. زاڭ" - 2 
"حيميا" + "فيزيكا" - 1 
"گەوگرافيا" + "شەت ءتىلى" – 2  
شىعارماشىلىق ەمتيحان + شىعارماشىلىق ەمتيحان (ءبىلىم بەرۋ باعدارلامالارى توپتارىنىڭ سانى - 9).  

جوعارىدا ايتىلعانداردى قورىتىندىلاي كەلە، تۇلەكتەر ءۇشىن وزدەرى تاڭداعان جوو-عا وڭاي تۇسۋگە قوسىمشا مۇمكىندىك بەرەتىن جاڭاشىلدىقتارعا تاعى ءبىر مارتە توقتالىپ كەتكىمىز كەلەدى: ۇبت-نى ەندى جىلىنا 4 رەت تاپسىرۋعا بولادى. تەستىلەۋدى تاپسىرعان سايىن ءار ءتۇرلى پاندەر كومبيناسياسىن تاڭداۋعا بولادى. ءبىلىم بەرۋ گرانتتارىن جەڭىپ الۋ ءۇشىن تالاپكەر مىندەتتى تۇردە جازعى ۇبت تاپسىرۋى قاجەت. 

تەحنيكالىق جانە كاسىبي ءبىلىم بەرۋ ۇيىمدارىنىڭ تۇلەكتەرى ۇبت تاپسىرماي-اق، ءوز ماماندىعى بويىنشا قىسقارتىلعان باعدارلاما بويىنشا وقۋىن جالعاستىرا وتىرىپ، جوو-عا اقىلى نەگىزدە تۇسە الادى. وقۋعا ءتۇسۋ ءۇشىن جوو ەمتيحاندارىنىڭ ناتيجەلەرى جەتكىلىكتى.سونىمەن قاتار، كەشەندى تەستىلەۋ (كت) ۇبت-مەن بىرىكتىرىلدى.