ءماجىلىس دەپۋتاتتارى ءبىلىم جانە عىلىم مينيسترلىگىنەن اعىلشىن ءتىلىن بىلمەيتىن مۇعالىمدەرگە ۇستەماقى تولەمەۋدى تالاپ ەتتى، دەپ حابارلايدى Qamshy.kz اقپارات اگەنتتىگى Sputnik قازاقستان تىلشىسىنە سىلتەمە جاساپ.
بۇگىن ماجىلىستە ۇكىمەت پەن رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ 2018 جىلعى رەسپۋبليكالىق بيۋدجەتتىڭ اتقارىلۋى تۋرالى ەسەپتەرى قارالدى. سۇراق-جاۋاپ بارىسىندا دەپۋتات ءجاميلا نۇرمامبەتوۆا مەكتەپتەردە ۇشتىلدىلىككە كوشۋ ماقساتىندا مۇعالىمدەرگە اعىلشىن ءتىلىن وقىتۋ ماسەلەسىن كوتەردى.
"ۇكىمەتتىڭ ەسەبىنە سايكەس، 2018 جىلى تىلدىك كۋرستان وتكەنى تۋرالى سەرتيفيكات العان 6740 مۇعالىمگە ۇستەماقى تولەۋ ءۇشىن رەسپۋبليكالىق بيۋدجەتتەن 1،6 ميلليارد تەڭگەدەن اسا قارجى ءبولىندى. 6740 ءمۇعالىمنىڭ ءبارى B جانە ودان جوعارى دەڭگەيدەگى سەرتيفيكات العان. الايدا ولاردىڭ تەك 818ء-ى عانا، بۇل ءنابارى 12 پروسەنت، ساباقتى تولىعىمەن اعىلشىن تىلىندە بەرىپ ءجۇر. ال قالعان 5922 پەداگوگ تەك جارىم-جارتىلاي عانا، ياعني ساباقتىڭ تەك جەكەلەگەن ەلەمەنتتەرى عانا اعىلشىنشا وتەدى. ءبىراق، وسى ەكى ساناتتاعى مۇعالىمدەر ايىنا بىردەي ۇستەماقى – 35 394 تەڭگە الادى"، - دەدى دەپۋتات.
نۇرمامبەتوۆانىڭ ايتۋىنشا، قولدارىندا سەرتيفيكاتى بار مۇعالىمدەردىڭ دەنى اعىلشىن ءتىلىن جەتىك مەڭگەرمەگەندىكتەن، ساباقتى باستان-اياق اعىلشىنشا وتكىزۋگە كوشە الماي وتىر. مۇعالىمدەردىڭ دەنى اعىلشىن ءتىلىن جەتىك مەڭگەرمەسە دە، 1،6 ميلليارد تەڭگە ۇستەماقى تولەنگەن.
"ەڭ قىزىعى، مۇنى ەشكىم پروبلەما رەتىندە قاراستىرىپ وتىرعان جوق، ءتىپتى مۇعالىمدەردىڭ ءوزى. وسىدان كەيىن ۇستەماقى الۋدىڭ جالعىز كريتەرييى ءبىلىم ساپاسى ەمەس، سەرتيفيكات قانا ما دەپ قالاسىڭ. وسىعان بايلانىستى ايتىڭىزشى، اعىلشىن ءتىلىن ءارتۇرلى دەڭگەيدە وقىتاتىن مۇعالىمدەر نەگە بىردەي اقشا الادى؟"، - دەپ سۇرادى ول ءبىلىم جانە عىلىم مينيسترىنەن.
ءشامشيدينوۆا مەكتەپتەردە پاندەردى اعىلشىن تىلىندە وقىتۋعا قاتىستى كوپ ماسەلە تۋىنداعانىن اتاپ ءوتتى.
"اعىلشىن تىلىندە وقىتۋ، تىم قۇرىعاندا، ەكى شارتتى ورىنداعان كەزدە باستالۋى ءتيىس ەدى. ءبىرىنشىسى – مۇعالىمدەر دايىن بولعان كەزدە، ەكىنشىسى وقۋشىلاردىڭ دايىندىق دەڭگەيى جەتكىلىكتى بولعاندا. سول سەبەپتى بيىل 352 مەكتەپتە عانا پاندەر تولىعىمەن اعىلشىنشا وتەدى"، - دەدى مينيستر.
پىكىر قالدىرۋ