ق ر ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ "ەڭبەك رەسۋرستارىن دامىتۋ ورتالىعى" اق-نىڭ ۇجىمىنا جاڭا باسشى تامارا دۇيسەنوۆانى تانىستىردى دەپ حابارلايدى Qamshy.kz اقپارات اگەنتتىگى مينيسترلىكتىڭ سايتىنا سىلتەمە جاساپ.
مينيستر تامارا دۇيسەنوۆانىڭ الەۋمەتتىك-ەڭبەك سالاسىنداعى ءتيىستى ءبىلىمى مەن مول تاجىريبەسىن اتاپ ءوتىپ، ءبىرىنشى كەزەكتە تۇرعان ءبىرقاتار ماسەلەلەردى مىندەتتەدى.
«تامارا قاسىم قىزى الەۋمەتتىك-ەڭبەك سالاسىن دامىتۋعا ەلەۋلى ۇلەس قوستى، بۇگىنگى كۇنى ەڭبەك نارىعىنىڭ تيىمدىلىگى مەن ەڭبەك رەسۋرستارىنىڭ ساپاسىن ارتتىرۋ، الەۋمەتتىك جانە زەينەتاقىمەن قامتاماسىز ەتۋ، حالىقتى جۇمىسپەن قامتۋ، الەۋمەتتىك-ەڭبەك سالاسىن سيفرلاندىرۋ جانە ەل باسشىلىعى قويعان باسقا دا تاپسىرمالاردى ورىنداۋدا مول تاجىريبەسى بار»، - دەپ اتاپ ءوتتى مينيستر.
تامارا دۇيسەنوۆا تاشكەنت حالىق شارۋاشىلىعى ينستيتۋتىن بىتىرگەن. ەكونوميكا عىلىمدارىنىڭ كانديداتى. ءار جىلدارى جاۋاپتى باسشىلىق لاۋازىمداردا جۇمىس ىستەگەن. شىمكەنت قالاسى اكىمىنىڭ ءبىرىنشى ورىنباسارى، وڭتۇستىك قازاقستان وبلىسى اكىمىنىڭ ورىنباسارى، ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ ۆيسە-مينيسترى، جاۋاپتى حاتشىسى، ق ر دەنساۋلىق ساقتاۋ جانە الەۋمەتتىك دامۋ ءمينيسترى، ق ر ەڭبەك جانە حالىقتى الەۋمەتتىك قورعاۋ ءمينيسترى، «Nur Otan» پارتياسىنىڭ حاتشىسى قىزمەتتەرىن اتقاردى.
ورتالىقتىڭ بۇرىنعى باسشىسى ەربول وسپانوۆ «ەردو» اق-نىڭ ءبىرىنشى ۆيسە-پرەزيدەنتى قىزمەتىنە اۋىستى.
پىكىر قالدىرۋ