Nur Otan پارتياسىنىڭ ەكس-حاتشىسى تامارا دۇيسەنوۆا جاڭا لاۋازىمعا يە بولدى دەپ حابارلايدى Qamshy.kz اقپارات اگەنتتىگى ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ.
تامارا دۇيسەنوۆا "ەڭبەك رەسۋرستارىن دامىتۋ ورتالىعىنىڭ" (ەردو) پرەزيدەنتى بولىپ تاعايىندالدى.
15 شىلدەدە ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپاربايەۆ "ەڭبەك رەسۋرستارىن دامىتۋ ورتالىعى" اق ۇجىمىنا جاڭا باسشىنى تانىستىردى.
ورتالىقتىڭ بۇرىنعى باسشىسى ەربول وسپانوۆ "ەردو" اق ءبىرىنشى ۆيسە-پرەزيدەنتى قىزمەتىنە اۋىستى.
"تامارا قاسىم قىزى الەۋمەتتىك-ەڭبەك سالاسىن دامىتۋعا ەلەۋلى ۇلەس قوستى، بۇگىندە ءتيىمدى ەڭبەك نارىعىن دامىتۋ، ەڭبەك رەسۋرستارىنىڭ ساپاسىن ارتتىرۋ، الەۋمەتتىك جانە زەينەتاقىمەن قامتاماسىز ەتۋ، حالىقتى جۇمىسپەن قامتۋ، الەۋمەتتىك-ەڭبەك سالاسىن سيفرلاندىرۋ جانە ەل باسشىلىعى قويعان باسقا دا تاپسىرمالار ءۇشىن قاجەتتى تاجىريبەسى بار"، - دەپ اتاپ ءوتتى مينيستر.
بۇعان دەيىن تامارا دۇيسەنوۆانىڭ باسقا جۇمىسقا اۋىسۋىنا بايلانىستى Nur Otan پارتياسىنىڭ حاتشىسى قىزمەتىنەن كەتكەنى حابارلانعان. ول بۇل قىزمەتتى 2018 جىلدىڭ اقپانىنان باستاپ اتقاردى.
تامارا دۇيسەنوۆا تاشكەنت حالىق شارۋاشىلىعى ينستيتۋتىن بىتىرگەن. ەكونوميكا عىلىمدارىنىڭ كانديداتى. ءار جىلدارى جاۋاپتى باسشى لاۋازىمدارىن اتقاردى. شىمكەنت قالاسى اكىمىنىڭ ءبىرىنشى ورىنباسارى، وڭتۇستىك قازاقستان وبلىسى اكىمىنىڭ ورىنباسارى، ەڭبەك جانە حالىقتى الەۋمەتتىك قورعاۋ مينيسترلىگىنىڭ ۆيسە-مينيسترى، جاۋاپتى حاتشىسى، دەنساۋلىق ساقتاۋ جانە الەۋمەتتىك دامۋ ءمينيسترى، ەڭبەك جانە حالىقتى الەۋمەتتىك قورعاۋ ءمينيسترى بولىپ جۇمىس ىستەدى.
پىكىر قالدىرۋ