قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ باسشىلىعىمەن وتكەن ۇكىمەتتىڭ كەڭەيتىلگەن وتىرىسىندا سىرتقى ىستەر ءمينيسترى بەيبىت اتامقۇلوۆ كوپتىڭ كوكەيىندە مايداي كىلكىگەن ماسەلەنى جايىپ سالدى دەپ جازادى Qamshy.kz اقپارات اگەنتتىگى.
مەملەكەتتىڭ سىرتقى ساياساتىنا تىكەلەي قاتىسى بار اتقامىنەر ەل شۋلاپ، جۇرت جىرلاپ جاۋىر قىلعان تاقىرىپتى پرەزيدەنت قۇلاعىنا جەتكىزۋگە مۇددەلى بولدى. بىرنەشە جىل بويى قايتالانىپ، قازىرگى ۋاقىتتا تامىر جايىپ ۇلگەرگەن بۇل ءۇردىستى شەكتەۋ - جاۋاپتىلاردىڭ مىندەتى.
"ءبىزدىڭ ەكسپورت جولىمىز قيىن، سانكسيالىق سوعىستاردىڭ سالقىنى بار، ونىڭ ۇستىنە يران ارقىلى شىعاتىن ترانزيتتىك جول دا ءوزىنىڭ كەرى اسەرىن تيگىزۋدە. كاسپيي تەڭىزى ارقىلى جۇرەتىن ترانزيتتىك جولدىڭ باعاسى ءوستى. ءقازىر بىزدە بۇدان دا بولەك ماسەلەلەر بارشىلىق. مىنا نارسەگە باسا نازار اۋدارعىم كەلەدى: بىرنەشە جىل بويى قازاقستاننىڭ كاپيتالى سىرتقا كەتىپ جاتىر. ءوزىمىز وسىرگەن، ءوزىمىز قولداعان كاسىپكەرلەردىڭ ءقازىر كوپتەگەن جاڭا باستامالارعا ينۆەستور بولا الاتىن شاماسى بار. ءبىراق ولار بارلىعىن شەتەلگە تاسيدى. نەگە؟ مىنە، وسىنىڭ ءبارىن، ىشكى ماسەلەلەردى رەتتەيتىن زاڭ قاجەت"، - دەدى بەيبىت اتامقۇلوۆ.
ال جەلى قولدانۋشىلارى سىرتقى ىستەر ءمينيسترىنىڭ كوتەرگەن ماسەلەسىن كۇن تارتىبىندەگى ەڭ ماڭىزدى ماسەلە دەپ تانىپ، قولپاشتاپ، قىزۋ قولداپ جاتىر.
پىكىر قالدىرۋ