جامبىل وبلىسىندا تۇرعىنداردىڭ الەۋمەتتىك، ەكونوميكالىق جاعدايىن جاقسارتۋعا باعىتتالعان پيلوتتىق جوبا قولعا الىنىپ جاتىر.
بۇل جوبانىڭ باستى ماقساتى – قيىن جاعدايدا جۇرگەن ادامدارعا، وتباسىلارعا الەۋمەتتىك قىزمەتتەر مەن الەۋمەتتىك كومەك كورسەتۋدىڭ ىقپالداستىرىلعان ۇلگىسىن ەنگىزۋ بويىنشا كەشەندى تۇردە كومەك كورسەتۋ. وسى ماقساتتا ۆەدومستۆوارالىق كوميسسيا قۇرىلعان.
تارازدا اتالعان ۆەدومستۆوارالىق كوميسسيانىڭ العاشقى وتىرىسى ءوتتى. وندا توپ مۇشەلەرى ءار وتباسىنىڭ جاعدايىن جەتە تالقىلاپ، قانداي كومەكتىڭ شىنايى پايداسى تيەتىنىن زەردەلەدى. سونىڭ ناتيجەسىندە، وبلىستا ومىرلىك قيىن جاعدايداعى 12 وتباسى انىقتالعان. جۇمىسشى توپتىڭ العاشقى وتىرىسىندا كەشەندى كومەك كورسەتۋگە الىنعان 12 وتباسىنىڭ ىشىنەن تورتەۋىنىڭ جەكە جوسپارلارى جان-جاقتى قارالدى. جالپى، قۇرىلعان جۇمىسشى توپتىڭ قۇرامىندا جۇمىسپەن قامتۋ، ءبىلىم بەرۋ، قۇقىق قورعاۋ ورگاندارى، حالىقتى الەۋمەتتىك قورعاۋ، دەنساۋلىق ساقتاۋ سالالارىنىڭ وكىلدەرى بار
جيىندا ولارعا كورسەتىلەتىن كومەك بويىنشا باعدارلامالار جان-جاقتى تالقىلاندى. بۇل وتباسىلارداعى باستى ماسەلە – باسپاناسى جوق، بالاباقشاعا ورنالاستىرىلماعان كىشكەنتاي بالالارى، دەنساۋلىقتارىنا بايلانىستى ماسەلەلەرى بار. تاعى وسى سەكىلدى جاعدايلارىنا قاراي ولارعا جان-جاقتى كومەك كورسەتىلەتىن بولادى.
جاعدايى قيىن دەپ باعالانعان 12 وتباسىنىڭ كەيبىرنىڭ، ءتىپتى، تۇرعىلىقتى تىركەلگەن مەكەنجايى دا، باسپانا، جۇمىسى دا جوق. ارالارىندا توزىعى جەتكەن باراك تيپتەس ۇيدە تۇراتىندار دا بار. ءتىپتى، كەيبىرىنىڭ بۇنداي ۇيلەرى دە ءوز يەلىكتەرىندە ەمەس ەكەن.ال قيىن جاعدايداعى تاعى ءبىر وتباسى 5 بالاسىمەن قويمادا تۇرىپ جاتىر. وتاعاسى سول جەردىڭ قاراۋىلى بولعاندىقتان، اۋماعى 12 شارشى مەتر جالعىز بولمەدە 7 ادام كۇنەلتۋدە. ەدەنى بەتون، سىز، سۋىق بولمەدە مۇلىكتەن جالعىز كەرەۋەت بار. وزگەلەرى سىز تارتقان تاس ەدەندە جاتىپ ۇيىقتايدى. بالالاردىڭ اناسى بالا كۇتىمىنە اي سايىن 20 مىڭ تەڭگە، كوپبالالى وتباسى رەتىندە 10000 تەڭگە الادى. وسىدان باسقا ءتۇسىپ تۇرعان تابىس جوق.
اتالعان قيىن جاعدايعا دۋشار بولعان وتباسىلارعا ءتيىستى جاردەماقى الۋلارىنا جانە بالالارىنىڭ بالاباقشاعا قابىلدانىپ، ەرەسەكتەرىنىڭ جۇمىسقا تۇرۋىنا جانە دەنساۋلىقتارىن كۇتۋلەرىنە پيلوتتىق جوبا اياسىندا بارىنشا كومەك كورسەتىلمەك.
قۋانىش كەۋىلىمجاي
پىكىر قالدىرۋ