جامبىل وبلىسىندا دەنساۋلىق ساقتاۋ سالاسىندا اعىمداعى جىلى قالىپ وتىرعان 65 ەلدى مەكەندى العاشقى مەديسينالىق كومەك كورسەتەتىن نىساندارمەن قامتۋ ماسەلەسى 100 پايىزعا شەشىلەدى. بۇل تۋرالى وبلىس اكىمى  اسقار مىرزاحمەتوۆ وبلىستىق ءماسليحاتتىڭ كەزەكتەن تىس وتكەن سەسسياسىندا بەرگەن ەسەبىندە ايتتى.

مىرزاحمەتوۆتىڭ مالىمەتىنشە، وبلىستاعى ءولىم-جىتىم كورسەتكىشى (وبلىس – 6،78 پروميل) ورتاشا رەسپۋبليكالىق ورتاشا كورسەتكىشتەن (7،39 پروميل) تومەن. ونىڭ ىشىندە انا ءولىمى دە تومەندەپ وتىر.

«جەدەل مەديسينالىق كومەكتىڭ قولجەتىمدىلىگىن جاقسارتۋ ءۇشىن 44 سانيتارلىق اۆتوكولىك ساتىپ الىنىپ جاتىر. تاراز قالاسىندا جەدەل جاردەم قىزمەتىن باعالايتىن «كومەك» اقپاراتتاندىرۋ جۇيەسى ەنگىزىلدى، اۋداندارعا 1 تامىزعا دەيىن ەنگىزىلەدى»، – دەدى وبلىس اكىمى.

سونىمەن قاتار، اسقار مىرزاحمەتوۆ ءوز ەسەبىندە وبلىستاعى كوپتەگەن ون وزگەرىستەردى ايتتى.

«جاستار جىلىنا وراي «جاستار اللەياسى» اشىلدى. وندا بىرنەشە نىساندار بوي كوتەردى. ونىڭ ءبىرى «جاستار قابىلەت ورتالىعى».

«قامقور» ۆولونتەرلىك-قايىرىمدىلىق جوباسى قولعا الىندى. 2 مىڭعا جۋىق ەرىكتىلەر دەرەكقورى جاسالدى. تاراز قالاسىندا 3 قايىرىمدىلىق دۇكەنى اشىلدى.

(اتالعان دۇكەندەر 977 وتباسىعا 4 تونناعا جۋىق كيىم-كەشەك ۇلەستىرىپ، 609 وتباسىعا 3،2 ميلليون تەڭگەگە ازىق-تۇلىكپەن كومەك كورسەتىلدى.)

بۇگىندە «قامقوردىڭ» 30 مۇشەسى ارىس قالاسىن قالپىنا كەلتىرۋ جۇمىستارىنا دا كومەك كورسەتۋدە.

جاڭا بيزنەس-يدەيالاردى ىسكە اسىرۋ ءۇشىن وبلىستىق بيۋدجەتتەن 300 ميلليون تەڭگە، ال رەسپۋبليكالىق بيۋدجەتتەن 166 ميلليون تەڭگە گرانت ءبولىنىپ، 466 جاستىڭ قۇجاتى قارالۋدا.

وسى جىلى 11 مىڭ جاس جۇمىسپەن قامتۋدىڭ بەلسەندى شارالارىنا تارتۋ جوسپارلانسا، ەسەپتى كەزەڭگە 7 مىڭعا جۋىق (62 پايىز) جاس تارتىلدى.

«ديپلوممەن اۋىلعا» باعدارلاماسى اياسىندا 344 مامانعا 61 ميلليون تەڭگە كوتەرمە جاردەماقى، 123 مامانعا تۇرعىن ءۇي ساتىپ الۋعا 445 ميلليون تەڭگە نەسيە بەرىلدى.

سپورت سالاسىندا دا جەتىستىگىمىز از ەمەس. وبلىستىڭ 893 سپورتشىسى ۇلتتىق قۇراما كومانداسى مۇشەلىگىنە ەندى.

جارتى جىلدا حالىقارالىق جانە رەسپۋبليكالىق جارىستاردا 267 التىن، 196 كۇمىس، 233 قولا مەدالدارىن يەلەندى.

اتاپ ايتساق، دزيۋدودان ەلدوس سمەتوۆ انتاليا جانە بۋداپەشت قالاسىندا وتكەن الەمدىك گران-پري ءتۋرنيرىنىڭ جەڭىمپازى اتانسا، نەاپول قالاسىندا وتكەن ۋنيۆەرسيادا ويىندارىندا قىرىقباي عالىمجان التىن مەدالدى يەلەندى.

تاراز قالاسىنداعى «جاستار» ستاديونى كۇردەلى جوندەۋدەن وتكىزىلۋدە. تارازدا 3 دەنە شىنىقتىرۋ كەشەنىن سالۋعا جسق دايىندالدى.

تۇرعىنداردىڭ سپورتپەن شۇعىلدانۋىنا اۋلالاردا جانە ساياباقتاردا بيىل 210 سپورت الاڭشاسىن سالۋ جوسپارلانسا، بۇگىنگە ونىڭ 25ء-ى قولدانىسقا بەرىلدى، – دەدى اسقار يسابەك ۇلى.

قۋانىش كەۋىلىمجاي