مەملەكەت باسشىسى قاسىم-جومارت توقايەۆ حالىقتىڭ ءومىر ءسۇرۋ ساپاسىن ارتتىرۋ بارىسىندا جەرگىلىكتى اتقارۋشى ورگانداردىڭ الدىنا قويعان مىندەتتەرىن ويداعىداي ورىنداپ شىعۋ ماقساتىندا پارلامەنت سەناتىندا قابىلدانىپ جاتقان زاڭدار بويىنشا پىكىر الماسۋ، اۋداندىق ءماسليحاتتىڭ دەپۋتتارىمەن كەزدەسۋ، جالپى اۋداننىڭ تىنىس-تىرشىلىگىمەن تانىسۋدى تاپسىرعانى بەلگىلى. وسىعان وراي قازاقستان رەسپۋبليكاسى پارلامەنتى سەناتىنىڭ دەپۋتاتتارى جولداسبايەۆ مۇراتباي سماتاي ۇلى مەن نۇرالييەۆ ابدالى توقبەرگەن ۇلى مويىنقۇم اۋدانىندا بولدى دەپ جازادى Qamshy.kz اقپارات اگەنتتىگى. 

قوناقتاردى اۋدان اكىمى مادەن مۇسايەۆ پەن اۋداندىق ءماسليحاتتىڭ حاتشىسى شاھيكەرىم يسابەكوۆ قارسى الدى. ولار الدىمەن ايدارلى اۋىلىنداعى «بەكجان» شارۋا قوجالىعىنىڭ جۇمىسىمەن تانىستى.

- ءبىز بيىل 30 گەكتار جەرگە جۇگەرى، 20 گەكتار جەرگە ارپا ەگىپ، وسىرۋدەمىز. بيىل اۋداندا 25 جىلعا جۋىق ۋاقىتتان بەرى ەگىلمەي كەلگەن جۇگەرى ەگىلىپ، قۋانىپ وتىرمىز. سەبەبى، بىزگە بۇرىنعى جىلدارى سۋ كەلمەيتىن. اۋدان، وبلىس باسشىلارىنىڭ ىقپالىمەن بيىل كانالدار تازالانىپ، سۋ كەلدى. ەگىس ەگۋگە قاجەتتى تەحنيكالار، تۇقىممەن اۋدان اكىمى م.مۇسايەۆ كومەكتەستى. ەندى مىنە جۇگەرىنىڭ ءار گەكتارىنان 50 سن. ءونىم الۋدى جوسپارلاپ وتىرمىز،- دەدى قوجالىق جەتەكشىسى نيەتبەك الدابەرگەنوۆ.

ءيا، نيەتبەك ايتسا ايتقانداي 3 مارتە سۋارىلعان جۇگەرىنىڭ شىعىمى جاقسى، بىتىك وسكەن. كىسى بويىنان اساتىن جۇگەرىنى كورگەن سەناتورلار مۇنداعى جۇمىسقا ريزاشىلىقتارىن ءبىلدىردى.

بىرلىك اۋىلى جانىنداعى تاراز يننوۆاسيالىق-گۋمانيتارلىق ۋنيۆەرسيتەتىنىڭ 120 گەكتار القابىندا بولعاندا دا قوناقتار مۇنداعى اتقارىلىپ جاتقان جۇمىستارعا كوڭىلدەرى تولاتىندىعىن جەتكىزدى.

-جۇگەرى ەگۋگە بارلىق جاعدايلار جاسالىپتى. قاجەتتى تەحنيكالاردىڭ ءبارىن جاڭادان الىپسىزدار. ەندى ديقاندار الاڭسىز جۇمىس ىستەي بەرۋگە بولادى ەكەن. جاڭا عانا كانالداردان سۋدىڭ تولىپ اعىپ جاتقانىندا كوردىك،- دەدى سەنات دەپۋتاتى م.جولداسبايەۆ اۋداندىق بيۋدجەت ەسەبىنەن الىنعان بىرلىك اۋىلىنداعى اۋىل شارۋاشىلىعى تەحنيكالارىن كورىپ تۇرىپ.

كۇشامان اۋىلىنىڭ كۇنباتىس جاعىنداعى بەلدەن اسىپ كەتكەن تارى دا سەناتورلار نازارىنان تىس قالمادى. شىعىمى جاقسى، بىتىك وسكەن تارىدان بيىلعى جىلى مول ءونىم الىناتىنى شىندىعىندا دا كورىنىپ تۇر. ەندى ونى ەن باستىسى ۋاقىتىندا سۋارىپ، مالدان قورعاي ءبىلۋ قاجەت ەكەندىگى دە ايتىلماي قالمادى.

ساپار سوڭىندا دەپۋتاتتار اۋدان اكىمدىگىنىڭ ءماجىلىس زالىندا اۋداندىق ءماسليحاتتىڭ دەپۋتاتتارىمەن كەزدەستى. كەزدەسۋگە اۋداندىق ءماسليحات دەپۋتاتتارىمەن بىرگە اۋدان اكىمدىگىنىڭ ءبولىم، مەكەمە- ۇيىم باسشىلارى دا قاتىستى.

كەزدەسۋدى اۋدان اكىمى م.مۇسايەۆ اشىپ، جۇرگىزىپ وتىردى. وندا سەناتورلار م.جولداسبايەۆ پەن ا.نۇرالييەۆ ءسوز الىپ، پارلامەنتتە قابىلدانىپ جاتقان زاڭدار، ونداعى نەگىزگى ماقسات - جەرگىلىكتى اتقارۋشى ورگانداردىڭ جۇمىسىن

وڭتايلاندىرىپ ءبىر جۇيەگە ءتۇسىرۋ، سول ارقىلى حالىقتىڭ تابىسىن كوتەرۋ، ءال-اۋقاتىن جاقسارتۋ ەكەنىن اتاپ ءوتتى. جۇزەگە اسىرىلىپ جاتقان بارلىق مەملەكەتتىك باعدارلامالار ەڭ الدىمەن قاراپايىم حالىقتىڭ تۇرمىس ساپاسىن ارتتىرۋعا باعىتتالىپ وتىرعانىن جەتكىزدى. اۋدانداعى ەگىن سالاسىنداعى اقتارىلىپ جاتقان جۇمىستارعا ريزاشىلىقتارىن ءبىلدىردى.

كەزدەسۋدە وبلىستىق ءماسليحاتتىڭ حاتشىسى ب.قاراشولاقوۆ تا ءسوز سويلەدى. اۋداندىق ءماسليحاتتىڭ حاتشىسى ش.يسابەكوۆ سەناتورلارعا اسەرلى اڭگىمەلەرى ءۇشىن العىس ايتىپ، بۋرىل-بايتال-مەركى تاس جولىنىڭ ءوز ۋاقىتىندا، ساپالى سوعىلۋىن نازارعا الۋلارىن سۇراندى.

اۋدان اكىمى م.مۇسايەۆ كەزدەسۋ سوڭىندا وبلىس ورتالىعىنان شالعايداعى اۋدانىمىزعا ارنايى اتباسىن بۇرعاندارى ءۇشىن حالىق قالاۋلىلارىنا العىس ايتىپ، «راداي» وزەگىنە سۋ ۇستايتىن توسپا ورناتۋعا رەسپۋبليكالىق بيۋدجەتتەن قارجى بولدىرۋگە كومەكتەسۋلەرىن سۇراندى. ولاردىڭ الداعى جۇمىستارىنا تابىس تىلەدى.