تاراز قالاسىندا قالاىشىلىك جولداردىڭ جابىندارىن جاڭارتۋ جۇمىستارى قارقىندى جۇرۋدە. ناتيجەسىندە، قالاداعى 55 كوشە مەن 85 بۇرىلىستىڭ ورتاشا جوندەۋ جۇمىستارىنا 1 ملرد 471،1 ملن تەڭگە، كوشەلەردىڭ شۇڭقىرلارىن قالىپقا كەلتىرۋ جۇمىستارىنا 360،0 ملن تەڭگە ءبولىنىپ، جوندەۋ جۇمىستارى جۇرگىزىلۋدە. ونىڭ ىشىندە مەكتەپتەر مەن بالاباقشالارعا باراتىن 30 كوشەنى ءىشىنارا جانە 32 جاياۋ جۇرگىنشىلەرگە ارنالعان جولداردى جوندەۋ ءۇشىن مەملەكەتتىك ساتىپ الۋ كونكۋرسىنا حابارلاما بەرىلگەن دەپ جازادى Qamshy.kz اقپارات اگەنتتىگى. 

اتالعان جۇمىستار جولداردىڭ جالپى تەحنيكالىق جاعدايى باقىلاۋعا الۋ ماقساتىندا جۇزەگە اسۋدا. جىل باسىنداعى مالىمەتكە سايكەس شاھاردا كوممۋنالدىق مەنشىكتە تىركەلگەن ۇزىندىعى 996 شاقىرىمدى قۇرايتىن 576 كوشە بار بولسا، جولداردىڭ تەحنيكالىق تۇگەندەۋىنەن كەيىن جالپى ۇزىندىعى 1 531،09 شاقىرىمدى قۇرايتىن 1 330 كوشە انىقتالعان.

سونىمەن قاتار، قالا بويىنشا كوشەلەردىڭ جول جابىندىسىنىڭ اعىمداعى تەحنيكالىق جاعدايىن انىقتاۋ ماقساتىندا تۇگەندەۋ جۇمىستارى جۇرگىزىلىپ قورىتىندىسى بويىنشا جالپىقالالىق «جول» باعدارلاماسى قابىلداندى. ءبىرىنشى كەزەكتە الەۋمەتتىك ماڭىزى بار نىساندار ورنالاسقان جانە قوعامدىق كولىك وتەتىن كوشەلەر تارتىپكە كەلتىرىلمەك. بيۋدجەتتىك قارجىلاندىرۋ مۇمكىندىگىنە بايلانىستى قاجەتتى جۇمىستاردى الداعى 3-5 جىل كولەمىندە اتقارۋ بەلگىلەنگەن.

سونىمەن قاتار، قالادا كوممۋنالدىق مەكەمەلەر گاز جانە سۋ قۇبىرلارىن جۇرگىزۋ بارىسىندا بۇلدىرىلگەن جولدارىن قالپىنا كەلتىرۋ جۇمىستارى قولعا الىنعان.

سونداي-اق، وبلىس ورتالىعىندا تۇنگى جارىقتاندىرۋ شامدارىن ەلەكتر قۋاتىن ۇنەمدەيتىن ۇلگىلەرىنە اۋىستىرۋ جۇمىستارى قارقىندى جۇرۋدە. اتاپ ايتقاندا، اعىمداعى جىلى 2 داڭعىل مەن 27 كوشەدە تەمىر-بەتون باعانالاردى مەتالل باعانالارعا اۋىستىرۋ، سۆەتوديود شامدار ورناتۋ جانە كابەلدەردى جەر استىمەن جۇرگىزىلۋدە.

جۇمىستار بارىسىندا قالاداعى كولىك كەپتەلىسىن ازايتۋ جانە كولىك قوزعالىسىن ىڭعايلاندىرۋ ماقساتىندا، تەحنيكالىق قاداعالاۋ ينسپەكسياسىنىڭ قىزمەتكەرلەرىمەن بىرلەسە، قالاداعى بىرنەشە كوشەنىڭ قيىلىستارىنداعى باعدارشامدار ۋاقىتشا وشىرىلگەن.

سونىمەن قاتار، قالا جولدارىنداعى اشىق قۇدىق ماسەلەسىن شەشۋگە دەن قويىلۋدا. بۇگىنگى تاڭدا قالادا بارلىق كوممۋنالدىق مەكەمەلەردىڭ تەڭگەرىمىندە 40 مىڭنان اسا يرريگاسيالىق، سۋ، كارىز، بايلانىس، جىلۋ قۇدىقتارى بار ەكەن. ولاردى تۇرعىنداردىڭ ۇرلاپ،تەمىر قالدىقتارىن قابىلداۋ پۋنكتەرىنە وتكىزۋىن توقتاتۋ ماقساتىندا تەمىر قۇدىق قاقپاقتارى بەتون مەن پلاستماسسادان جاسالعان قاقپاقتارعا الماستىرىلۋدا.