"اۋليە-اتا" حالىقارالىق اۋەجايىنىڭ حالىقارالىق اۋە جۇك تاسىمالى سالاسىنداعى الەۋەتى ارتپاق. جۋىردا اتالعان اۋەجايعا Mongolian Airlines اۋە كومپانياسىنىڭ جۇك تاسىمالدايتىن ۇشاعى كەلىپ قوندى دەپ جازادى Qamshy.kz اقپارات اگەنتتىگى. 

سىيىمدىلىعى 20 توننا بولاتىن اۋە كەمەسى «اۋليە-اتا» اۋەجايىنىڭ بازاسىنا الىنىپ، جەرگىلىكتى كاسىپكەرلەردىڭ حالىقارالىق جۇك تاسىمالى بويىنشا تاپسىرىستارىن ورىنداماق. بۇل جوبا Mongolian Airlines پەن SCAT اۋە كومپانيالارى اراسىنداعى ءوزارا كەلىسىم نەگىزىندە جۇزەگە اسىرىلىپ وتىر.

تارازداعى اۋەجاي بازاسىنا موڭعوليالىق اۋە كومپانياسىنان جۇك تاسىمالداۋعا ارنالعان ۇشاقتى جالعا الۋ وڭىردە ءىرى اۋە جۇك تاسىمالى حابىن قۇرۋدىڭ العىشارتى سانالادى. ءارى بۇل اۋە رەيسى رەسپۋبليكانىڭ وڭتۇستىك ايماعىنداعى كاسىپكەرلەردىڭ دە تاپسىرىسىن ورىنداۋ قابىلەتىنە يە.

– بۇل اۋە رەيسى وڭتۇستىك وڭىرلەردەگى اۋىل شارۋاشىلىعى تاۋارىن وندىرۋشىلەردىڭ ونىمدەرىن الەمنىڭ كەز كەلگەن نۇكتەسىنە جەتكىزۋ بويىنشا تاپسىرىستاردى ورىندايدى. سايكەسىنشە تاپسىرىسقا ساي شەتەلدەردەن يمپورتتىق تاۋارلار دا تاسىمالداناتىن بولاتىن. جەرگىلىكتى كاسىپكەرلەرمەن جۇرگىزىلگەن كەلىسسوزدەرگە ساي بىرەر كۇندە جۇك ۇشاعى سۋىتىلعان ەت ونىمدەرىن يران، يراك، كۋۆەيت ەلدەرىنە الىپ ۇشپاق. الداعى ۋاقىتتا تاپسىرىستار بويىنشا جۇك اۋە رەيسىنىڭ «اۋليە-اتا» حالىقارالىق اۋەجايىنان ۇشىپ شىعۋدىڭ ناقتى كەستەسى تۇزىلەدى،–دەيدى «اۋليە-اتا» حالىقارالىق اۋەجايى اكسيونەرلىك قوعامىنىڭ باسقارما ءتوراعاسى داۋلەت حامزين.

ال Mongolian Airlines اۋە كومپانياسىنىڭ باس ديرەكتورى حورانسۋرەن چينباد بيىلعى جىلدىڭ قازاقستان-موڭعوليا اراسىنداعى اۋە تاسىمال سالاسى ءۇشىن جەمىستى بولعانىن تىلگە تيەك ەتتى.

–بيىلعا دەيىن نۇر-سۇلتان مەن ۇلان باتىر اراسىندا تىكەلەي اۋە رەيسى بولماعان. اينالما جولدىڭ ەسەبىنەن ۇشاقپەن ەكى قالا اراسىنا جول ءجۇرۋ ۇزاقتىعى 9 ساعات بولاتىن. ال بيىل جاڭادان اشىلعان نۇر-سۇلتان-ۇلان باتىر اۋە رەيسى بۇل جولدى 3،5 ساعاتقا دەيىن قىسقارتتى. ەندى جۇك تاسىمالى سالاسىندا SCAT اۋە كومپانياسىمەن اۋقىمدى جوبانى قولعا الىپ وتىرمىز،– دەدى حورانسۋرەن چينباد.

ايتا كەتۋ كەرەك «اۋليە-اتا» حالىقارالىق اۋەجايى جۇك تاسىمالداۋعا ارنالعان ۇشاقتى Mongolian Airlines كومپانياسىنان جالعا الادى. بۇعان دەيىن مۇنداي تاپسىرىستاردى ورىنداۋدا اۋەجاي يراندىق اۋە كومپانيالارعا يەك ارتىپ كەلگەن.