ازيانىڭ جۇرەگى، توعىز جولدىڭ تورابىنداعى قازاق جەرىندە ەتنيكاارالىق كەلىسىم مەن ءوزارا سىيلاستىقتى، تولەرانتتىلىقتى قالىپتاستىرعان، ءتۇرلى مادەنيەتتەر مەن وركەنيەتتەردىڭ بەيبىت تىرشىلىك كەشۋىنىڭ باي، تاريحي تاجىريبەسى جيناقتالعان. ال وسى ىشكى تۇراقتىلىققا نەگىز بولىپ وتىرعان تاتۋلىقتى ساقتاپ قالۋ – وسكەلەڭ ۇرپاقتىڭ مىندەتى. ايتار ۇلاعاتىن ونەگە قىلىپ كورسەتكەن حالقىمىز بۇل ەستى ەسكەرتۋدى جاستارعا ەندى قالاي جەتكىزەدى؟ جامبىل وبلىستىق قازاقستان حالقى اسسامبلەياسىنىڭ قولداۋىمەن وبلىس اكىمى اپپاراتىنىڭ «قوعامدىق كەلىسىم» مەكەمەسى «زاماناۋي مەديا مادەنيەت كەڭىستىگىندەگى ەتنيكالىق يميدج» تاقىرىبىندا پىكىرتالاس الاڭدارىن ۇيىمداستىرىپ، كوكەيدەگى كوپ سۇراققا جاۋاپ ىزدەدى دەپ جازادى Qamshy.kz اقپارات اگەنتتىگى. 

قازاقستاندىق بىرەگەيلىكتى، سونداي-اق رۋحاني-ادامگەرشىلىك قۇندىلىقتاردى قالىپتاستىرۋدى، جاستارعا وتانشىلدىق پەن ازاماتتىققا تاربيەلەۋدى كوزدەگەن شارا ون اۋداندا جانە تاراز قالاسىندا وتكىزىلدى. پىكىرتالاس الاڭدارىنا ەتنومادەني بىرلەستىكتەردىڭ وكىلدەرى، انالار كەڭەسى جانە عىلىمي-ساراپتامالىق توپتىڭ مۇشەلەرى، ايماقتىق ەتنومادەني بىرلەستىكتەردىڭ جاستارى جانە وبلىستىق، قالالىق، اۋداندىق ب ا ق وكىلدەرى شاقىرتىلدى. ۇيىمداستىرۋشىلار بۇل شارا ايماقتاعى سەكسەننەن استام ەتنوستىڭ مادەنيەتى، وركەنيەتى، ادەبيەتى، ءتىلى، ءدىلى سىندى ۇلتتىق قۇندىلىقتارىن جانداندىرا تۇسەدى دەيدى. سەبەبى اشىق ديالوگ الاڭىندا وسى ماسەلەلەردىڭ شەشۋ، دامىتۋ جولدارى قاراستىرىلىپ، ءتۇرلى ۇسىنىستاردىڭ جاي-جاپسارى تالقىلانۋدا. ءار ەتنوستىڭ وكىلدەرى ءوز سالت-داستۇرلەرى تۋرالى ساۋالناما تولتىرىپ، ۇسىنىستار جاساۋ ارقىلى دا بۇل جوباعا بەلسەندى تۇردە اتسالىسۋدا.

– بۇل شارانى قولعا العانداعى ماقساتىمىز – ءارتۇرلى ۇلتتاردىڭ داستۇرلەرىنىڭ ەرەكشەلىكتەرىن، اسىرەسە قازاقستان حالقى اسسامبلەياسىنىڭ بىرىكتىرۋشى ميسسياسىنىڭ ماڭىزدىلىعىن تالقىلاۋ. ەلباسىمىز نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ۇلتتىق كود، ۇلتتىق مادەنيەتتى ساقتاپ قالۋ كەرەكتىگى تۋرالى انىق ايتىلعان. ءبىز دە وسى باعىتتا ءتيىستى جۇمىستار اتقارۋدامىز. ەلىمىزدى مەكەندەگەن بارشا ەتنوستىڭ مادەنيەتىن تيىسىنشە كەلەشەكتىڭ ساناسىنا سىڭىرسەك دەيمىز، – دەيدى جوبانىڭ جەتەكشىسى، اتالعان مەكەمەنىڭ باس ساراپشىسى البينا مارات قىزى.