ەرتىسبايەۆتاردىڭ داۋرەنى ءوتتى. ەرتىسبايەۆتاردىڭ زامانى ءوتتى. ءبىراق ول ونى سەزىنە الار ما ەكەن؟! ونىڭ لاقاپ اتى – "بۇلبۇل" ەدى.
"بۇلبۇل" 2001-2012 جىلدار ارالىعىندا ەلدە ەرەكشە سايرادى. پرەزيدەنتتىڭ ساياسي ماسەلەلەر جونىندەگى كەڭەسشىسى بولدى. مينيستر لاۋازىمىن اتقاردى. ونىڭ ايتقانىن ەرەكشە ىقىلاسپەن تىڭدايتىندار، جازعانىن تاپجىلماي وقيتىندار بولدى. ول ءبىر كەزدەردە قازاقستاننىڭ ساياسي بورومەترى قىزمەتىن اتقاردى. ونىڭ سول جىلدارداعى ساراپتاماسى مەن كوزقاراسىن ارينە باعالاۋ كەرەك، ونى ەشكىم جوققا شىعارا المايدى. ارينە، ساياسي ساراپتاماسى مىقتى بولدى. الداعىنى بولجادى، ەلدەگى ساياسي وقيعالارعا سول ۋاقىتتا كوزقاراسىن ناقتى ءبىلدىرىپ وتىردى. وپپوزيسياعا پوزيسياسىن اشىق ايتتى. قىسىلىپ، قىمتىرىلعان جوق، سۇحباتتان قاشقان جوق. ءتىپتى كەيدە وپپوزيسياعا دا اقىل ايتىپ، جول سىلتەپ وتىردى. ءبىراق 2013 جىلى ول ەلدەن كەتتى. گرۋزيادا 5 جىل، سوسىن بەلارۋسسيادا 2 جىل ەلشى بولدى. جالپى ەرمۇحامەد ەرتىسبايەۆتىڭ ساياسي باسپالداعى وسىمەن ءبىتتى دەۋگە بولادى. ونى نازاربايەۆ جۇيەسى كەزىندە جاقسى جانە وتە ءتيىمدى پايدالاندى. اسىرەسە، وپپوزيسيامەن ويىندا. ءبىراق توقايەۆ بيلىگىنە ەرتىسبايەۆتار كەرەك پە؟
...ول ەلگە كەلدى. زەينەتكەر جاسىنا ەكى اي قالعاندا ەرتىسبايەۆ ەلشى قىزمەتىنەن بوساتىلدى. ونى توقايەۆ بوساتتى. ءبىراق ونىڭ ەلگە كەرەگى بار ما؟ بار شىعار. قالاي؟ كەلە سالا سۇحبات بەردى. الماتىعا بۇرىنعى "الما-اتا" اتاۋىن قايتارىپ بەرۋ كەرەك"، – دەدى. تارازىعا سالساق، بۇل ەرتىسبايەۆقا ءتان ارەكەت. ناقتى ايتقاندا، قازاقستانعا قايتا ورالعانىن كورسەتۋ، بۇقاراعا بار ەكەنىن پوپۋليستىك جولمەن ءبىلدىرۋ. ءبىراق قازىرگى جۇيە نەمەسە بۇگىنگى بۇقارا ەرتىسبايەۆتى قابىلداي الا ما؟ ماسەلە سوندا. ول 63-كە كەلدى. قالاي ايتقاندا دا، ول قايتادان بيلىك لاۋازىمىنا بارمايدى. ءبىراق وسىلاي «ەجەلگى اتاۋلاردى قايتارۋ» جانە تاعى باسقا ماسەلەلەرمەن ءوز كوزقاراسى بويىنشا، تۇراقتى تۇردە اينالىسا بەرەدى.
ول بۇقارامەن جاقسى "وينايدى". ونىڭ پىكىرلەرى ءالى-اق قوعامدى ەكىگە جارادى. ماسەلە مىنادا: ول قاشانعا سوزىلۋى مۇمكىن؟ ويتكەنى ورىس تىلىندە ويلايتىندارعا ەرتىسبايەۆتار قاجەت. قاشان دا كەرەك. ال "ەرتىسبايەۆ ايتتى ەكەن" دەپ الماتى "الما-اتا" بولىپ ەندى ەشقاشان قايتادان جازىلمايدى. "الما-اتا" اتاۋى دا قايتارىلمايدى. زامان كوشى العا جىلجىدى. ءبىزدىڭ بيلىككە ەندى باسقا ساياسي ساراپشىلار كەرەك. ويتكەنى قوعام قازاقىلانىپ بارادى. ال ەرتىسبايەۆتار بازاردان قايتتى.
...ءبىراق "بۇلبۇل" ءبارىبىر سايراي بەرەدى.
