الەۋمەتتىك ماڭىزى بار ازىق-تۇلىك باعاسىن اسپانداتۋعا جول جوق. الايدا، نارىققا سىلتەپ، قولدان شارىقتاتاتىن جاعدايلار جوق ەمەس. مىنە، وسىعان توتەپ بەرەتىن توتە جول - قور قۇرىپ، ازىقتى قويمادا ساقتاۋ. بۇل رەتتە ايماقتا كوتەرمە تاراتۋ ورتالىقتارىن سالۋ قولعا الىنعان. ايماق باسشىسى اسقار مىرزاحمەتوۆ وڭىردەگى وسىنداي الىپ ەكى نىساننىڭ جوباسىمەن تانىسۋعا ارنايى باردى. سونىڭ العاشقىسى - بايزاق اۋدانى، ءۇش بۇلاق بەكەتى ماڭىنداعى «بازا-SERVIS» ءجشس-نىڭ كوتەرمە-تاراتۋ ورتالىعى. بۇگىندە مۇندا ءارقايسىسى 250 توننا ازىق-تۇلىك، جەمىس-جيدەك ساقتايتىن 16 قويما جاساقتالعان. قىتاي-بەلورۋسسيا ەلدەرىنەن جەتكىزىلگەن جوعارى تەحنولوگيامەن جاراقتالعان جوبا قۇنى قۇنى 1 ملرد تەڭگە. وبلىس اكىمى ەندىگى كەزەكتە قۇرىلىس جۇمىستارىنا قارقىن قوسىپ، قاراشاعا دەيىن نىساندى قولدانىسقا بەرۋدى قاتاڭ ەسكەرتتى.

كەلەسى نىسان «اۋىل بەرەكە» ماڭىنداعى ءدال وسىنداي كوتەرمە تاراتۋ ورتالىعى بولدى. مۇندا قۇرىلىس جۇمىستارى كەزەڭ-كەزەڭىمەن جۇزەگە اسپاق. ءار كەزەڭدە سىيىمدىلىعى ءتورت مىڭ توننادان اساتىن ساقتاۋ جانە ساۋدا قويمالارى سالىناتىن بولادى. ولاردىڭ جالپى كولەمى 2 مىڭ شارشى مەتردەن اسادى. بۇگىندە قۇرىلىسى ءجۇرىپ جاتقان ورتالىقتىڭ ءبىرىنشى كەزەڭى بيىل اياقتالۋى ءتيىس بولسا، قالعان كەزەڭدەرى كەلەر جىلعا تيەسىلى. بۇل قويمانىڭ باستى ماقساتى دا سول، ارزان كەزدە كوكونىستى كوپ جيناقتاپ، جىل ون ەكى اي قاجەتىنشە ءتيىمدى باعامەن ساتۋ. سول ارقىلى تاۋار باعاسىن تىزگىندەپ وتىرۋ. ايتا كەتەر جايت، بوي كوتەرەر قويمالار ادام اياعى كوپ ءھام بارىس-كەلىسكە قولايلى بولۋى ءۇشىن، بىرەۋى كۇرە جول بويىندا، ءبىرى بازار ماڭىندا كوپكە ىڭعايلى بولۋى ماقساتىندا تاڭدالعان.

سونداي-اق، اسقار مىرزاحمەتوۆ بازار ماڭىنا بارىپ تۇرىپ بازار نارقىن بىلە كەتتى. ساتۋشىلارمەن تىلدەسىپ، جەمىس-جيدەك پەن كوكونىستىڭ ساتىلىم بارىسىن بارلاپ شىقتى.