بۇگىن قورداي اۋدانى ءالجان انا اۋىلىنىڭ مادەنيەت ۇيىندە قازاقستان رەسپۋبليكاسى تۇڭعىش پرەزيدەنتى – ەلباسى كىتاپحاناسىنىڭ كوشپەلى ەكسكۋرسياسى ءوتتى دەپ جازادى Qamshy.kz اقپارات اگەنتتىگى. 

ونىڭ شىمىلدىعىن اشقان ەلباسى كىتاپحاناسىنىڭ ديرەكتورى، ساياسي عىلىمداردىڭ دوكتورى، پروفەسسور ءامىرحان راحىمجانوۆ جەرگىلىكتى تۇرعىنداردى «ن. نازاربايەۆ: ءداۋىر، تۇلعا، قوعام» كورمە جوباسىمەن قىسقاشا تانىستىردى:

– ەلباسى كىتاپحاناسىنىڭ قىزمەتكەرلەرى «تۇڭعىش» ەكسكۋرسيالىق كونسەپسياسىنىڭ اياسىندا سىزدەرگە ارناپ «تاريحي تاڭداۋ» عىلىمي-ەكسپوزيسيالىق جوباسىنا تاقىرىپتىق ەكسكۋرسيالار دايىندادى. سىزدەرگە ارنايى ەلباسى نۇرسۇلتان ءابىش ۇلى مەن تاۋەلسىز قازاقستاننىڭ دامۋ تاريحىنان سىر شەرتەتىن دەرەكتى فيلمدەردىڭ كورسەتىلىمى وتەدى. اۋدان تۇرعىندارىنىڭ نازارىنا ەلباسى كىتاپاحاناسىنىڭ مۋزەي قورى مەن ەلباسىنىڭ جەكە ارحيۆىنەن جاساقتالعان «ەلباسى جانە جاڭارعان جامبىل ولكەسى» فوتوسۋرەتتەر كورمەسى دە ۇسىنىلىپ وتىر.

ءىس-شاراعا جامبىل وبلىسى اكىمىنىڭ ورىنباسارى سۇلۋشاش قۇرمانبەكوۆا دا قاتىستى.

– جامبىل وبلىسىنا جول تارتىپ كەلگەن كورمە جوباسى سيرەك كەزدەسەتىن، قۇندى جادىگەرلەرىن اۋەلى اۋدان تۇرعىندارىنىڭ نازارىنا ۇسىنىپ وتىر. بۇل باستامانىڭ جەرگىلىكتى حالىققا دەگەن قۇرمەتتىڭ بەلگىسى ەكەنى ءسوزسىز. ونى تاماشالاۋعا جينالعان ازاماتتار ءۇشىن مۇنداي سىي – ۇلكەن ابىروي. ۇلت تاريحىن قاستەرلەيتىن جاندار ەلدىڭ ەرتەڭىن دە ويلايدى. سول سەبەپتى سىزدەر مەن بىزدەردىڭ ماڭگىلىك ەل تىزگىنىن ۇستاۋدى پارىز ساناۋىمىز ورىندى، - دەدى ول. ءوز سوزىندە اكىم ورىنباسارى ەلباسى كىتاپحاناسىنىڭ ۇجىمىنا العىس ءبىلدىرىپ، قىزمەتىنە ساتتىلىك تىلەدى.

ەلباسى كىتاپحاناسىنىڭ ديرەكتورى ءامىرحان راحىمجانوۆ قورداي اۋدانى اكىمىنىڭ ورىنباسارى ب.جامانگوزوۆكە العىس حات پەن «ن.نازاربايەۆ. ءومىربايان»، «نازاربايەۆ مودەلى» كىتاپتارىن تابىستاپ، مادەنيەت ءۇيىنىڭ كىتاپحاناسىنا قۇندى باسىلىمداردىڭ جيناعىن تارتۋ ەتتى.

«تاريحي تاڭداۋ. باستاۋ»، «تاريحي تاڭداۋ. ورلەۋ»، «قازاقستاننىڭ سپورتتىق داڭقى» تاقىرىپتىق ەكسكۋرسيالارى «تۇڭعىش» ەكسكۋرسيالىق كونسەپسياسىنا نەگىزدەلەدى. ولاردىڭ اياسىندا قورداي اۋدانىنىڭ تۇرعىندارى سيرەك كەزدەسەتىن بەينەماتەريالداردىڭ، فوتوسۋرەتتەر مەن ارحيۆ قۇجاتتارىنىڭ، جادىگەرلەردىڭ بىرەگەي كەشەنىن تاماشالادى. بۇل ماتەريالدار كەزىندە قازكسر مينيسترلەر كەڭەسىنىڭ ءتوراعاسى، قازاقستان كپ وك ءبىرىنشى حاتشىسى، جوعارعى كەڭەس ءتوراعاسى بولعان ن.ءا.نازاربايەۆتىڭ ەڭبەك جولىن كومسومول-مەتاللۋرگ كەزىنەن باستاپ ق ر تۇڭعىش پرەزيدەنتى اتانعان كەزەڭىنە دەيىن باياندايدى. كەلۋشىلەر وتاندىق جانە شەتەلدىك سپورتشىلاردىڭ ن.ءا.نازاربايەۆقا تارتۋ ەتكەن سىيلىقتارى مەن ماراپاتتارىمەن دە تانىستى.

ولاردىڭ قاتارىندا بولعان ارايلىم قاسىموۆا ەكسكۋرسيالاردىڭ قۇندىلىعىن جوعارى باعالادى:

– ەل تاۋەلسىزدىگى نەگىزىن قالاعان تۇلعانىڭ دارا جولى كەز كەلگەن قىرىنان ماڭىزدى وقيعالار مەن پاراساتتى شەشىمدەرگە تولى. مۇنى بەينەلەيتىن

بۇگىنگى كورمە وتكەنگە ساياحات جاساپ، كوپكە ءمالىم بولا بەرمەيتىن دەرەكتەردى ۇسىنادى. مەكتەپ ءمۇعالىمى رەتىندە بىرەگەي قۇجاتتاردىڭ، بەينەماتەريالدار مەن سۋرەتتەردىڭ ارقاسىندا ءبىلىمىن تولىقتىرعان وقۋشىلارىم ءۇشىن ريزامىن. شالعاي جەردىڭ تۇرعىندارىنا دەگەن بۇل قامقورلىققا العىسىمىز مول، - دەپ ءبولىستى ول.

اتالمىش ەكسكۋرسيالارمەن شۋ اۋدانىنىڭ تۇرعىندارى 4 قىركۇيەكتە، ساعات 11.00. -دە تانىسا الادى. ءىس-شارا شۋ قالاسىنىڭ س.سەيفۋللين اتىنداعى ورتا مەكتەبىندە ۇيىمداستىرىلادى.

كوشپەلى ەكسكۋرسيالار ەلباسى كىتاپحاناسى كورمە جوباسىنىڭ اياسىندا ۇيىمداستىرىلادى. اۋقىمدى جوبا ءعىلىمي-بىلىم بەرۋ، مادەني-اعارتۋشىلىق ءىس-شارالاردى قامتيدى. تاۋەلسىز قازاقستاننىڭ قالىپتاسۋ تاريحىنداعى ەلباسىنىڭ شەشۋشى ءرولىن جۇيەلى باياندايتىن «ن. نازاربايەۆ: ءداۋىر، تۇلعا، قوعام» قور كورمەسى بۇل جوبانىڭ ەڭ ماڭىزدى ءىس-شاراسى بولىپ وتىر.

2017 جىلعى قاراشادان باستاۋ العان «ن. نازاربايەۆ: ءداۋىر، تۇلعا، قوعام» كوشپەلى كورمە جوباسىمەن الماتى، شىمكەنت قالالارى مەن الماتى، تۇركىستان، اتىراۋ، اقتوبە، قىزىلوردا وبلىستارىنىڭ 900 مىڭعا جۋىق تۇرعىنى تانىسىپ ۇلگەردى.

«ن. نازاربايەۆ: ءداۋىر، تۇلعا، قوعام» كورمەسى جامبىل وبلىسىندا 2019 جىلعى قازان ايىنىڭ سوڭىنا دەيىن جالعاسپاق.