قازاقستاننىڭ  «اق جول» دەموكراتيالىق پارتياسى ماڭعىستاۋ وبلىستىق فيليالى جانىنداعى «اق جول-جاستار» جاستار قاناتىنىڭ اۋەسقوي ارتىستەرى، «رۋحاني جاڭعىرۋ» باعدارلاماسى اياسىندا ۇلتتىق ادەبيەتىمىزگە وشپەس ءىز قالدىرعان تولەگەن ايبەرگەنوۆتىڭ  كەمەڭگەر تۇلعاسىن ەسكە الىپ، قازاق ادەبيەتىنىڭ پوەزياسىنا قوماقتى ۇلەس قوسقان قارىمدى قالامگەردىڭ ادەبي مۇراسىن  ناسيحاتتاۋ ماقساتىندا،   اقيىق اقىن ولەڭدەرىمەن ورنەكتەلگەن تاحاۋي احتانوۆتىڭ «ماحاببات مۇڭى» اتتى ليريكالىق قويىلىمىن  ل.ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە ساحنالادى.

سپەكتاكلگە ل.گۋميليەۆ اتىنداعى ەۇۋ-نىڭ الەۋمەتتىك جانە ازاماتتىق دامۋ دەپارتامەنتىنىڭ ديرەكتورى رۇستەم ءالقوجا، «اق جول» قدپ موف ءتوراعاسى جاڭبىرباي جانىبەك ۇلى، تولەگەن ايبەرگەنوۆ اتىنداعى №16 ورتا مەكتەپ ۇجىمى، ەۇۋ-نىڭ ستۋدەنتتەرى مەن نۇر-سۇلتان قالاسىنىڭ تۇرعىندارى قاتىستى.

قويىلىمدا تالانت تاعدىرى، ونەر ادامدارىنا ارتىلار جاۋاپكەرشىلىك، ماحاببات اتتى ءمولدىر سەزىمنىڭ پاكتىگى، جاستاردىڭ تاعدىر جولىندا قابىلداعان شەشىمدەرىنىڭ دۇرىستىعى مەن بۇرىستىعى، ءومىر اتتى ۇلكەن سوقپاقتىڭ قىزىعى مەن قيىندىعى تۋرالى سۋرەتتەلدى.

سونىمەن قاتار، ادام بويىنداعى ادالدىق پەن ارامدىق، دوستىق پەن ساتقىندىق تۋرالى سىر شەركەن سپەكتاكلدىڭ ءون بويىندا تولەگەن ايبەرگەنوۆتىڭ سوزىنە جازىلعان اندەرى مەن  ولەڭدەرى وقىلدى.بۇل سپەكتاكلدى «اق جول» جاستارى ءوزىنىڭ قىزىعۋشىلىعىمەن، اۋەسقويلىعىمەن تابيعي دارىندىلىعىمەن سومدادى.

سپەكتاكل سوڭىندا، ل.گۋميليەۆ اتىنداعى ەۇۋ-نىڭ الەۋمەتتىك جانە ازاماتتىق دامۋ دەپارتامەنتىنىڭ ديرەكتورى رۇستەم ءالقوجا جاستاردىڭ ونەرىنە ءوز ريزاشىلىعىمەن العىسىن ايتىپ، ۋنيۆەرسيتەت اتىنان ەستەلىك سىيلىقتار مەن گۇل شوقتارىن تابىستادى.