قازاقستاننىڭ «اق جول» دەموكراتيالىق پارتياسى ماڭعىستاۋ وبلىستىق فيليالى جانىنداعى «اق جول-جاستار» جاستار قاناتىنىڭ جاستارى، «جاستار جىلى» مەن «رۋحاني جاڭعىرۋ» اياسىندا، نۇر-سۇلتان قالاسى مەن ەرەيمەنتاۋ اۋدانىندا بىرنەشە شارا وتكىزدى دەپ جازادى Qamshy.kz اقپارات اگەنتتىگى. 

الدىمەن جاستار،  الاش يدەيالارى مەن مۇراتىن كوزدەگەن، اعارتۋشىلىق ءىسىن قولعا الىپ، باستارىن قاتەرگە تىككەن جانە باتىر بابالارىنىڭ سالعان سارا جولىنان اينىماعان، سول ءۇشىن اۋىزبەن ايتىپ جەتكىزە المايتىن اۋىر جازالاردى باستان كەشكەن جاستاردىڭ قايسارلىعى مەن ەسىمدەرىن ۇمىتتىرماي، جاسوسپىرىمدەرگە ناسيحاتتاۋ ماقساتىندا، ۇمبەتەي جىراۋ اتىنداعى ەرەيمەنتاۋ اۋداندىق مادەنيەت ۇيىندە «قىرشىن» اتتى تاريحي درامالىق قويىلىمىن ساحنالادى.

«ۇل بوپ تۋدىم، ەر بوپ ولسەم قۇربانى بوپ ەلىمنىڭ»، - دەگەن جاس الاش قۇرباندارىنىڭ رۋحىنا ارنالعان شىعارما اۆتورى دراماتۋرگ، ۇستاز وتەن احمەت، سپەكتاكلدىڭ رەجيسسەرى عازيزا باقتيار قىزى.

سپەكتاكلگە، عالىم، مەملەكەت جانە قوعام قايراتكەرى. ق ر جوعارعى مەكتەبى عىلىمي اكادەمياسىنىڭ اكادەميگى، پەداگوگيكا عىلىمدارىنىڭ كانديداتى، تاريح عىلىمدارىنىڭ دوكتورى، پروفەسسور، «ارداگەرلەر ۇيىمى» رەسپۋبليكالىق قوعامدىق بىرلەستىگى ورتالىعى ءتوراعاسىنىڭ ءبىرىنشى ورىنباسارى ءومىرزاق وزعانباي ۇلى، دراماتۋرگ، جازۋشى شىعارما اۆتورى وتەن احمەت، «اق جول» قدپ ءتوراعاسى پەرۋاشيەۆ ازات تۇرلىبەك ۇلى، اقىن، پارتيا ءتوراعاسىنىڭ ورىنباسارى، ۇلتتىق كەڭەستىڭ مۇشەسى قازىبەك يسا، اقتوبە وبلىسى قوعامدىق كەڭەس ءتوراعاسى بايماعامبەتوۆ باعلان اۋەلباي ۇلى، ءاليحانتانۋشى-عالىم، حالىقارالىق جۋرناليست سۇلتانحان اققۇل ۇلى، ەرەيمەنتاۋ اۋدانىنىڭ ورىنباسارى الدىبەكوۆ ناريمان قازبەك ۇلى، اۋداندىق مادەنيەت ءبولىمىنىڭ باسشىسى جىلقىبايەۆ سايلاۋ قابىكەن ۇلى، پەرۋاش كارىم ۇلى اتىنداعى ورتا مەكتەپ ۇجىمى جانە ەرەيمەنتاۋ اۋدانىنىڭ تۇرعىندارى قاتىستى.  

ەلدىڭ قامىن ويلاپ، جاستارعا ءبىلىمنىڭ شامشىراعىن مازداتىپ جاققان الاش ارىستارى ءمىرجاقىپ دۋلات ۇلى، ماعجان جۇماباي، سۇلتاناماحمۇت تورايعىر ۇلىنىڭ جالىن شاشقان ۋىتتى ولەڭدەرى، تاعىلىمدى سوزدەرى سول كەزدەگى جاستاردى جاقسى-جاماندى اجىراتا بىلۋگە قالاي ۇيرەتسە، ىزگىلىككە قالاي تاربيەلەسە، بۇگىنگى جاستار ءۇشىن دە سونداي تەرەڭ ءمانى بار.  

قۋعىنداۋ مەن جالعان جالا، جاعىمپازدىق پەن اسىرا سىلتەۋشىلىك كوپشىلىك كوزىنە جاس الدىرىپ، كوڭىلىن بوساتپاي قويمادى.

ءبىر ادامنىڭ، ءبىر وتباسىنىڭ باسىنداعى قاسىرەت ارقىلى حح عاسىرداعى قازاق ەلى تاريحىنداعى جەكە ادامداردىڭ تاعدىرلارى تالكەك ەتىلگەن، تاپتاپ جانشىلعان قارالى كەزەڭى جانە ۇلتتىق رۋحتىڭ ءنارىن، ار-نامىستىڭ ازىعىن بيىك قويعان ەلىم دەپ ەڭىرەگەن بوزداقتاردىڭ جان ايقايى جان-جاقتى كورىنىستى كورسەتتى.

بۇل تاريحي درامانى جاستار ءوزىنىڭ قىزىعۋشىلىعىمەن، اۋەسقويلىعىمەن جانە تابيعي دارىندىلىعىمەن سومداسا، كەلگەن كورەرمەن ءبىر دەممەن قاراپ، تاريحپەن سۋسىندادى.

سپەكتاكل سوڭىندا ەرەيمەنتاۋ اۋدانى اكىمىنىڭ ورىنباسارى الدىبەكوۆ ناريمان قازبەك ۇلى، «اق جول-جاستار» جاستار قاناتىنىڭ ونەرپازدارىن قويىلىمنىڭ ءساتتى وتۋىمەن قۇتتىقتاپ، «العىس حات» تابىستادى.

سونداي-اق، اقتوبە وبلىسى قوعامدىق كەڭەس ءتوراعاسى بايماعامبەتوۆ باعلان اۋەلباي ۇلى، شىعارما اۆتورى وتەن احمەتكە «قاباق اتا» مەدالىن تابىستادى.