اقتاۋ قالاسىندا ءوتىپ جاتقان كاسپيي ماڭى مەملەكەتتەرىنىڭ 1ء-شى ءپانارالىق ەندوحيرۋرگيالىق كونگرەسى اياسىندا فرانسيا، رەسەي، ۋكراينا جانە قازاقستاننىڭ ونكولوگ جانە گينەكولوگ دارىگەرلەرى عىلىمي – پراكتيكالىق سەسسيا بارىسىندا ءوزارا پىكىر الماسىپ، شەبەرلىك-كلاسىن وتكىزىپ، بىرنەشە وتانى ءساتتى باستاپ كەتتى.

اتاپ ايتقاندا، جاتىر مويىنى وبىرى حيرۋرگياسىنداعى لاپاروسكوپيانىڭ مۇمكىندىكتەرى مەن شەكتەۋلەرى، ونكوگينەكولوگياداعى يننوۆاسيالار تاقىرىبىندا ءسوز قوزعادى. ال وپەرايالاردى ترانسلياسيالاۋ كەزىندە 3D «جاتىر مويىنى وبىرى. ۆەرتگەيم وپەراسياسى» جانە «رەتروسەرۆيكالدى ەندومەتريوز – ىشەك كەسۋ» ءساتتى ءوتتى.

ۋكرايندىق جوعارى ساناتتاعى دارىگەر، حيرۋرگ سەرگەي بايدو انالىق بەزى وبىرىنىڭ تارالعان ءتۇرى كەزىندەگى لاپاروسكوپيالىق تولىق ءبىرىنشى سيتورەدۋكسيانىڭ دۇنيەجۇزىندەگى العاشقى تاجىريبەسىمەن ءبولىستى. ال رەسەيدىڭ سانكت-پەتەربور شاھارىنان كەلگەن مەديسينا عىلىمدارىنىڭ كانديداتى الەكساندر باسوس  ەلەكتروحيرۋرگيانىڭ فيزيكالىق نەگىزدەرى تۋرالى ايتىپ بەردى. «وبىر ەندومەتريا ICG» جانە «پارااورتالى، جامباس ليمفوديسسەكسيا» اتتى وتالار جۇرگىزىلدى. سونداي-اق، رەپرودۋكتيۆتىك جاستاعى ايەلدەردە جاتىر مويىنى پاتولوگياسىن ەمدەۋدىڭ قازىرگى زامانعى ادىستەرى مەن باستاۋىش ەندوسكوپيستتىڭ داعدىلارىن دامىتۋداعى Wetlab ءرولى جايلى ايتىلدى.

سونىمەن قاتار، بۇگىن گيستەروسكوپيا مەكتەبى ۇيىمداستىرىلدى. ونىڭ اياسىندا ماڭعىستاۋ وبلىستىق پەريناتالدىق ورتالىعى بازاسىندا، وڭىردەگى گينەكولوگيالىق ناۋقاستارعا مەديسينالىق كومەك ساپاسىن جاقسارتۋ جانە اكۋشەر-گينەكولوگتاردىڭ بىلىكتىلىگىن ارتتىرۋ ماقساتىندا «وپەراتيۆتى گيستەروسكوپيا» تاقىرىبىندا ءبىلىم جەتىلدىرۋدىڭ سيكلى ءوتتى.

وقۋعا وبلىستاعى مەملەكەتتىك جانە جەكە كلينيكالارىنداعى اكۋشەر-گينەكولوگ جانە حيرۋرگ ماماندار بەلسەندى قاتىستى. ءدارىس بەرۋشى لەكتور - ن.ي.پيروگوۆ اتىنداعى رەسەي مەملەكەتتىك مەديسينا ۋنيۆەرسيتەتىنىڭ پروفەسسورى، مەديسينا عىلىمىنىڭ دوكتورى لاۋرا كاپپۋشيەۆا بولدى. لەكسيا بارىسىندا جاتىر قۋىسى قابىرعالارىن گيستەروسكوپيا ءتاسىلى ارقىلى تەكسەرۋ، جاتىرىشىلىك پاتالوگيالاردى انىقتاۋ، تىندەر بيوپسياسىن الۋ، وبىر ساتىسىن انىقتاپ، ەمدەۋ ءتاسىلىن تاڭداۋ جانە ت.ب سۇراقتار قامتىلعان.

الدا رەسەيلىك مامانداردىڭ قاتىسۋىمەن گينەكولوگيالىق ناۋقاستاردى رەزەكتوسكوپيا، انالىق بەزدىڭ قاتەرسىز وسپەلەرى، جەڭىل ەندوسكوپيالىق وپەراسيالاردىڭ پرينسيپتەرى تالقىلانىپ، كۇردەلى ميومانى قالاي تەز ەمدەۋگە بولاتىنى، كۇردەلى جاعدايلاردى تالداپ، بەينەپرەزەنتاسيا جاسالماق. ال ءازىربايجاننان كەلگەن دارىگەرلەر لاپاروسكوپيالىق گيستەر – جانە ميومەكتوميا كەزىندە تۇيىندەر مەن جاتىر كولەمىنىڭ ۇلكەندىگىنىڭ ماڭىزدىلىعىن تۇسىندىرمەك.

اقتاۋلىق دارىگەرلەر دە قالىس قالعىسى جوق. سۋبمۋكوزدى ميوماتوزدى تۇيىندەردىڭ ءقاۋىپسىز جانە ءتيىمدى گيستەروسكوپيالىق رەزەكسياسىن جاساۋ پرينسيپتەرى جونىندە ءوز تاجىريبەسىمەن ءبولىسۋدى كوزدەيدى. فرانسيادان كەلگەن پروفەسسور ريەۆاز بوچوريشۆيلي اۋىر ەندومەتريوزدى ەمدەۋدىڭ زاماناۋي تاسىلدەرىن كەيىنەن ءتۇسىندىرۋدى كوزدەيدى.

سونداي-اق، جاتىر مويناعىنا بالا ءبىتۋ كەزىندەگى اعزالاردى ساقتاپ قالۋ تەحنولوگيالارى، پوليكيستوزدى انالىق بەزدەرىنىڭ اۋرۋى كەزىندە ەندوسكوپيالىق وپەراسيالاردىڭ ءاربىر تۇرلەرىنىڭ تيىمدىلىگىن سالىستىرمالى زەرتەۋ، پوستمەنوپاۋزاداعى سپەسيفيكالىق پروسەستەردىڭ دياگنوستيكاسى كەزىندەگى گيستەروسكوپيانىڭ ءرولى تۋرالى ايتىلادى دەپ كۇتىلۋدە.