كەيىنگى جىلدارى جامبىل وبلىسنىڭ ورتالىعى-تاراز قالاسى ادام تانىماستاي اجارلانىپ كەلەدى. ءساندى ساياباقتار مەن كەلىستى كوشەلەر شاھار تۇرعىندارى مەن قوناقتارى ءۇشىن جايلى اتموسفەرا قالىپتاستىراتىندىعى داۋسىز. وسى ورايدا جەرگىلىكتى بيلىك تاراپىنان جىلۋ جۇيەلەرى مەن كوشە جولدارىن جوندەۋ جۇمىستارىنىڭ ساپاسىنا دا ايرىقشا نازار اۋدارىلۋدا.

ءدال ءقازىر وبلىس ورتالىعىنىڭ باستى كوشەلەرىنىڭ ءبىرى – اباي داڭعىلىنىڭ بويىندا جول جوندەۋ جۇمىستارى قايتا قولعا الىنىپ وتىر. قاۋىرت جۇمىستىڭ جۇرگىزىلىپ جاتقانىن كورگەن تۇرعىنداردىڭ كوكەيىندە سۇراق كوپ. مۇنىڭ ءمانىسىن تۇسىنبەي جاتقاندار دا بار. وسى ورايدا تاپسىرىس بەرۋشىلەر تالابىنىڭ ناتيجەسىندە مەردىگەر كومپانيا ءوز مىندەتتەرىن ورىنداۋعا ءماجبۇر بولعان.

ناقتىلاپ ايتساق، بىلتىر كوكتەمدە اباي داڭعىلىنىڭ تولە بي مەن دۋلاتي كوشەلەرى اراسىنداعى 1،1 شاقىرىمدىق بولىگىندە جىلۋ ماگيسترالى اۋىستىرىلعان. مەردىگەرى – «ارايسترويماركەت» جاۋاپكەرشىلىگى شەكتەۋلى سەرىكتەستىگى.

– مەملەكەتتىك ساتىپ الۋ تۋرالى 2018 جىلعى 30 ناۋرىزداعى №30 كەلىسىمشارتقا سايكەس «ارايسترويماركەت» ج ش س اباي كوشەسىنىڭ بويىنا 628 635 546 تەڭگەگە جىلۋ جۇيەلەرىن جوندەگەن. جوندەۋ جۇمىستارىنىڭ مەرزىمى – 2018 جىلعى 30 مامىر مەن 2019 جىلعى 30 قاڭتار ارالىعى. بۇل ۋچاسكەنىڭ قابىلداۋ اكتىسىنە سول 2018 جىلدىڭ 1 قازانىندا قول قويىلعان. ال بيىل مامىر، ماۋسىم ايلارىندا جولدىڭ اسفالت-بەتون قاباتىن قالپىنا كەلتىرۋ جۇمىستارى جۇرگىزىلگەن. ءبىراق، جول بەتى تومەن ءتۇسىپ كەتىپ، قايتا جوندەۋگە تۋرا كەلدى. وسىعان بايلانىستى وبلىس اكىمى اسقار يسابەك ۇلىنىڭ تىكەلەي قاداعالاۋىمەن ءارى كەلىسىمشارتتىڭ 7.2-پۋنكتىنە سايكەس مەردىگەر كومپانيا جۋىردا جولدى قايتا جوندەۋگە كىرىستى. كەلىسىمشارت بويىنشا كومپانيا ءۇش جىلعا دەيىن قازعان جەرىنە قىزمەت كورسەتەدى، – دەيدى «تارازترانسەنەرگو» مەملەكەتتىك كوممۋنالدىق كاسىپورنى ديرەكتورىنىڭ مىندەتىن اتقارۋشى جاقسىلىق جوگىبايەۆ.

جاقىندا بۇل ماسەلەنى وبلىس باسشىسى اسقار مىرزاحمەتوۆ ءوزى تىكەلەي نازارعا الىپ، ءتيىستى مەكەمەلەرگە تاپسىرما بەرگەن بولاتىن. وتكەن سەنبىدەن بەرى مەردىگەر كومپانيانىڭ بىرنەشە تەحنيكاسى اباي داڭعىلىنىڭ بويىندا جۇمىسقا قىزۋ كىرىسىپ، اسفالت قاباتىنىڭ 6 سانتيمەترىن قايتا ارشىپ الىپ جاتىر. قۇرىلىسشىلار ەندى ءبىر اپتانىڭ ىشىندە جۇمىستى ءوز قارجىسى ەسەبىنەن اياقتايمىز دەپ وتىر.