جامبىل وبلىسى اكىمى اپپاراتىنىڭ «قوعامدىق كەلىسىم» كمم-دە تاراز قالاسى اكىمدىگىنىڭ جۇمىسپەن قامتۋ جانە الەۋمەتتىك باعدارلامالار ءبولىمىنىڭ ۇيىمداستىرۋمەن «قازاقستاننىڭ 100 جاڭا ەسىمى» جوباسىنىڭ 1 كەزەڭىنىڭ جەڭىمپازى، جۇزۋدەن قازاقستان رەسپۋبليكاسىنىڭ ەڭبەك سىڭىرگەن سپورت شەبەرى، جۇزۋدەن 14 دۇركىن الەم رەكوردىن جاڭارتۋشىسى، ەل تاريحىندا تۇڭعىش رەت پاراوليمپيادا ويىندارىنىڭ جەڭىمپازى زۋلفيا گابيدۋللينانىڭ مۇمكىندىگى شەكتەۋلى جاندارمەن كەزدەسۋى ۇيىمداستىرىلدى.

ءىس-شاراعا مۇمكىندىگى شەكتەۋلى بالالار مەن ولاردىڭ اتا-انالارى، ەستۋىندە اقاۋى بار «مەيىرىم» مەكتەپ-ينتەرناتىنىڭ جانە كورۋ كەمىستىگى بار «بولاشاق» مەكتەپ-ينتەرناتىنىڭ بالالارى قاتىستى.

ءىس-شارا بارىسىندا جوبا جەڭىمپازى زۋلفيا راۋحات قىزى ءوزىنىڭ جەتىستىككە جەتۋ جولىنداعى ءومىر تاريحى، ومىرلىك ۇستانىمدارى تۋرالى ءوي ءبولىستى.

سونىمەن قاتار، 18 جاستان اسقان ادامدارعا ۇيدە الەۋمەتتىك كومەك كورسەتۋ ءبولىمىنىڭ مەڭگەرۋشىلەرى ج.جولدىبايەۆا مەن ش.اليبايەۆا اعىمداعى جىلى «قازاقستاننىڭ كيەلى جەرلەرىنىڭ گەوگرافياسى» جوباسىنىڭ باستاۋ العانى تۋرالى جانە جوبا اياسىندا 30 ەرەكشە بالالاردى قامتۋ كوزدەلىپ وتىرعانىن ايتىپ ءوتتى. جوبانىڭ ماقساتى: بالالارعا ءوڭىرىمىزدىڭ كيەلى جەرلەرى تۋرالى ماعلۇمات بەرۋ. جاس ۇرپاقتىڭ بويىندا تۋعان جەرىنە دەگەن سۇيىسپەنشىلىگى مەن قازاقستاندىق پاتريوتيزم سەزىمىن ارتتىرۋ، تاريحي جانە مادەني ەسكەرتكىشتەردى، كيەلى جەرلەردى تانىمال ەتۋ.

ءىس-شارا بارىسىندا شاعىن كونسەرتتىك باعدارلاما وتكىزىلىپ، شارا سوڭىندا «ءبىز بىرگەمىز» ەرىكتىلەر قوعامىنىڭ قولداۋىمەن «استانا cinema» كينوتەاترىندا مۋلتيفليكاسيالىق فيلمدەردى تاماشالاپ، «ulya.cakes» ءتاتتى بالىشتەر شەبەرحاناسىنىڭ ءتاتتى بالىشتەرى مەن سۋسىندارىنان ءدام تارتتى.

ايتا كەتەيىك، ز. گابيدۋللينا 1965 جىلى جامبىل وبلىسىندا دۇنيەگە كەلگەن. وكىنىشكە قاراي، كىشكەنتاي كەزىندە جان تۇرشىگەرلىك جول اپاتىنا تۇسكەن.

سوعان قاراماستان، ەرىك-جىگەرى مىقتى، باتىل قىز قازاقستانعا جازعى پاراليمپيادا ويىندارىنان تۇڭعىش رەت التىن الىپ بەرگەن سپورتشى. ول الەمنىڭ 12 مارتە رەكوردسمەنى ءارى عالامشاردىڭ ەڭ مىقتى 8 جۇزگىشتەرىنىڭ ءبىرى ەكەندىگىن بىرەۋ بىلسە، بىرەۋ بىلە بەرمەيدى. جالپى، زۋلفيا سپورتقا 1990-شى جىلى بەت بۇرعان. ال سۋعا جۇزۋمەن كاسىبي تۇرعىدا 2007 جىلدان باستاپ اينالىسا باستاپتى. اۋليەاتالىق باتىر قىز مۇمكىندىگىنىڭ شەكتەۋلىلىگىنە قاراماستان، ەلىمىزدىڭ اتىن دۇنيە جۇزىنە تانىتىپ جۇرگەن جىگەرلى تۇلعا.