«ديپلوممەن – اۋىلعا!» باعدارلا­ماسىنىڭ ۇزدىكسىز جۇزەگە اسىرىلىپ كەلە جاتقانىنا بيىل 10 جىلعا جۋىقتادى. پرەزيدەنت قاسىم-جومارت توقايەۆ جاقىندا جاريالاعان جولدا­ۋىندا باعدارلاماعا بولىنەتىن قاراجاتتى 20 ملرد تەڭگەگە ۇلعايتۋدى تاپسىردى. ونىڭ بىردەن-بىر سەبەبىن اۋىلدىق مەكتەپتەردە پەداگوگ كادر­لاردىڭ جەتىسپەۋشىلىگىمەن بايلانىستىردى.

اتالعان باعدارلاما وسى جىلدار ارالىعىندا مەملەكەتكە دە، جاس ماماندارعا دا ءتيىمدى ەكەنىن دالەلدەپ وتىر. ءتيىمدىسى سول، جوعارى وقۋ ورنىن بىتىرگەن، قولىندا ديپلومى بار جاس ماماندار اۋىلدارعا بارىپ مەملەكەت ەسەبىنەن ءبىرجولعى كوتەرمەاقى، سودان سوڭ از پايىزبەن نەسيە الىپ، سول قارجىعا جەرگىلىكتى جەردەن تۇرعىن ءۇي ساتىپ الادى. ءسويتىپ ارى قاراي ءوز سالاسى بويىنشا ماماندىعىمەن جۇمىسىن جالعاستىرا بەرەدى. «باسپانا – باقىت شامى» دەمەكشى، وقۋدى جاڭا عانا ءبىتىرىپ كەلگەن جاس ماماندارعا بۇل ۇلكەن كومەك بولماق.

باعدارلاما اياسىندا جۋالى اۋدانىنا اتتاناتىن جاستاردىڭ قاراسى قالىڭ. اۋدان اكىمدىگى اۋىل شارۋاشىلىعى ءبولىمى ماماندارىنىڭ بەرگەن مالىمەتىنشە، 2019 جىلعا تۇرعىن ءۇي ساتىپ الۋ نەمەسە سالۋ ءۇشىن 18 مامانعا رەسپۋبليكالىق بيۋدجەتتەن بارلىعى 68 175 مىڭ تەڭگە جانە كوتەرمە جاردەماقىعا 43 مامانعا جەرگىلىكتى بيۋدجەتتەن بارلىعى 7 600،3 مىڭ تەڭگە قاراستىرىلعان.

جالپى، بيۋدجەتتىك نەسيە الۋعا جىل باسىنان 33 مامان قۇجات تاپسىرىپ، ناتيجەسىندە 15 مامانعا ءتيىستى نەسيە بەرىلگەن. ءتورت مامان بولىنگەن قارجىنىڭ جىلدىق تولەمدەر جوسپارىنا سايكەس قازان ايىنا كەزەكتىلىككە قالىپتاستى. ونىڭ ىشىندە، ءبىلىم سالاسىنان 11، دەنساۋلىق ساقتاۋ سالاسىنان ءتورت، مادەنيەت سالاسىنان ءبىر، سپورت سالاسىنان ءبىر، اگروونەركاسىپتىك كەشەن سالاسىنان ەكى مامان بار.

كوتەرمە جاردەماقى الۋعا جىل باسىنان 51 مامان قۇجات تاپسىرىپ، ناتيجەسىندە 43 مامانعا كوتەرمە جاردەماقى بەرىلدى. ونىڭ ىشىندە، ءبىلىم سالاسىنان 24 مامان، دەنساۋلىق ساقتاۋ سالاسىنان 10 مامان، الەۋمەتتىك قامسىزداندىرۋ سالاسىنان ءبىر مامان، مادەنيەت سالاسىنان ءۇش مامان، سپورت سالاسىنان ءبىر مامان، اگروونەركاسىپتىك كەشەن سالاسىنان ءتورت مامان.

باعدارلاما اياسىندا ءبىلىم، دەنساۋلىق ساقتاۋ سالالارىنا باسىمدىق بەرىلەتىنى بەلگىلى. «ديپلوممەن – اۋىلعا!» باعدارلاماسى بويىنشا جۇمىسقا ورنالاسىپ، مەملەكەت قاراجاتى ارقىلى تۇرعىن ۇيگە قول جەتكىزگەن جاس ماماننىڭ ءبىرى – اقەركە قويشييەۆا. اقەركە قايرات قىزى اقباستاۋ اۋىلىنداعى №14 ب.مايلين اتىنداعى ورتا مەكتەپتە اعىلشىن تىلىنەن ۇستازدىق ەتەدى.

– مەن قىزىلوردا وبلىسىنىڭ تۇلەگىمىن. جوعارى وقۋ ورنىن بىتىرگەن سوڭ جۋالىلىق بەكجان ەسىمدى جىگىتكە تۇرمىسقا شىعىپ، ماماندىعىم

بويىنشا وسىندا جۇمىسقا ورنالاستىم. ەلىمىزدىڭ جارقىن بولاشاعى سانالاتىن جاس بۋىنعا ۇستازدىق ەتىپ جۇرگەنىمە قۋانىشتىمىن. بيىلعى جىلى «ديپلوممەن – اۋىلعا!» باعدارلاماسى بويىنشا جەڭىلدەتىلگەن نەسيە الىپ، تۇرعىن ۇيگە قول جەتكىزدىم،- دەيدى ول.