ەلوردادا «Nur Otan» پارتياسىنىڭ قولداۋىمەن قازاقستان مۇگەدەكتەر كونفەدەراسياسى ۇيىمداستىرعان ءداستۇرلى «جان شۋاق» قوعامدىق سىيلىعىنىڭ جەڭىمپازدارى ماراپاتتالدى. اتالعان سىيلىق ەلدىڭ مادەني، سپورت جانە قوعامدىق ومىرىنە بەلسەنە ارالاسقان مۇمكىندىگى شەكتەۋلى جاندارعا، سونداي-اق، ەرەكشە قاجەتتىلىگى بار ازاماتتاردىڭ تۇرمىسىن جاقسارتۋعا ۇلەس قوسقاندارعا بەرىلەدى.
جەڭىمپازداردىڭ ءبىرىن ماراپاتتاعان «Nur Otan» پارتياسى ءتوراعاسىنىڭ ءبىرىنشى ورىنباسارى باۋىرجان بايبەك ەلباسى تاپسىرماسىنا سايكەس قولعا الىنعان «كەدەرگىسىز كەلەشەك» جوباسى اياسىندا سوڭعى ءۇش جىلدا 20 مىڭنان استام الەۋمەتتىك ماڭىزى بار نىساننىڭ مۇمكىندىگى شەكتەۋلى جانداردىڭ قاجەتتىلىكتەرىنە قاراي جابدىقتالعانى، زاڭدارعا 78 تۇزەتۋ ەنگىزىلىپ، قۇرىلىس تالاپتارى مەن ەرەجەلەرى قايتا قارالعانى تۋرالى ايتتى.
«بۇگىن وسى زالعا كۇش-جىگەرى مۇقالماعان، ومىرگە قۇشتار جاندار جينالىپ وتىر. «Nur Otan» بيلەۋشى پارتيا رەتىندە ەرەكشە قاجەتتىلىگى بار ازاماتتارعا قاشان دا قولداۋ ءبىلدىرىپ كەلەدى. وسى جىلدىڭ وزىندە پارتيامىزدىڭ قوعامدىق قابىلداۋ بولمەلەرىنە 2 مىڭنان استام ايرىقشا قاجەتتىلىگى بار ازامات وتىنىشپەن كەلدى. ءار ءتورتىنشى ماسەلە سول جەردە بىردەن شەشىمىن تاپتى. قازاقستان مۇگەدەكتەر كونفەدەراسياسىنىڭ پرەزيدەنتى جانات وماربەكوۆا – ءبىزدىڭ ماجىلىستەگى فراكسيامىزدىڭ وكىلى. بۇگىندە وسىنداي ادامداردىڭ دەپۋتاتتىق قىزمەت اتقارۋى، وسى ساناتتاعى ازاماتتاردىڭ قۇقىقتارىن قورعايتىن ءتيىستى زاڭداردىڭ قابىلداناتىندىعىن جانە ولاردىڭ ماسەلەلەرىنىڭ شەشىمىن تاباتىنىن كورسەتەدى. «Nur Otan» پارتياسى مۇنى جان-جاقتى قولدايدى. ونىڭ ۇستىنە، پارتيانىڭ 13 مىڭ مۇشەسى ەرەكشە قاجەتتىلىگى بار ادامدار ەكەنىن ءبىز ۇنەمى قاپەرىمىزدە ۇستايمىز» - دەپ اتاپ ءوتتى باۋىرجان بايبەك.
قازاقستان مۇگەدەكتەر كونفەدەراسياسىنىڭ پرەزيدەنتى جانات وماربەكوۆانىڭ ايتۋىنشا، «جان شۋاق» سىيلىعى تاعايىندالعاننان بەرى، ەلىمىزدىڭ تۇكپىر-تۇكپىرىنەن كەلگەن 60-تان استام قازاقستاندىق ونىڭ جەڭىمپاز اتاندى.
«تابىستى ادام – ول مول اقشا تاپقان ەمەس، كوپ يگى ىستەر جاساعان ادام. بۇل ءراسىمدى حالىقارالىق مۇگەدەكتەر كۇنى مەن وسى ماراپاتتىڭ باستاماشىسى - يران وماربەكوۆتىڭ تۋعان كۇنى قارساڭىندا وتكىزۋ جاقسى داستۇرگە اينالدى. «Nur Otan» پارتياسىنىڭ اتىنان سايلانعان دەپۋتات رەتىندەگى زاڭشىعارۋشىلىق قىزمەتىمىزدە ەلىمىزدىڭ مۇمكىندىگى شەكتەۋلى جاندار ءۇشىن ەشقانداي كەدەرگىلەرى جوق، ينكليۋزيۆتى جانە دامىعان مەملەكەت بولۋى جولىندا جۇمىس ىستەيمىز. وسىلايشا، قوعام ەرەكشە قاجەتتىلىگى بار ادامداردى تەڭ دارەجەدە قابىلدايتىن بولادى» - دەدى ول.
سالتاناتتى شارا بارىسىندا «ەرەكشە قاجەتتىلىگى بار ازاماتتارعا دەگەن قوعامدىق سانانىڭ وڭ وزگەرىسىنە قوسقان ۇلەسى ءۇشىن» جۇلدەسىنە جادىراسىن سادۋاقاسوۆ يە بولدى.
«ەرىكتىلەر قوزعالىسىن دامىتۋداعى جەتىستىكتەرى ءۇشىن» اتالىمى بويىنشا سىيلىققا قوستاناي قالاسىنان كەلگەن يۋليا زاۆودچيكوۆا لايىق دەپ تانىلدى. ونىڭ «28 ىلمەك» كلۋبىنىڭ ەرىكتىلەرى شالا تۋعان نارەستەلەرگە ارناپ جۇننەن ارنايى كيىم-كەشەكتەر توقيدى.
«سپورت سالاسىنداعى جەتىستىگى ءۇشىن» اتالىمى بويىنشا جاسوسپىرىمدەر اراسىندا توكيودا وتكەن ازيا پاراليمپيادا ويىندارىندا 4 مەدال جەڭىپ العان نۇر-سۇلتان قالاسىنىڭ تۇرعىنى سيازبەك دالييەۆ ماراپاتتالدى.
«مۇمكىندىگى شەكتەۋلى جانداردىڭ ماسەلەلەرى مەن ءومىرىن جاريالاۋعا قوسقان ۇلەسى ءۇشىن» سىيلىعىنا ششۋچينسك قالاسىنان كەلگەن قانات بايبۇروۆ لايىق دەپ تانىلدى.
«كاسىپكەرلىك قىزمەتتى دامىتۋعا قوسقان ۇلەسى ءۇشىن» دينا ەردىلدينوۆا ماراپاتتالدى. ونىڭ مۇگەدەكتەر ارباسىن جوندەيتىن ورتالىعى مەديسينالىق جانە الەۋمەتتىك مەكەمەلەردە تەحنيكالىق قىزمەت كورسەتەدى.
«مۇمكىندىگى شەكتەۋلى جانداردى جۇمىسقا ورنالاستىرۋ ءۇشىن جاسالعان ۇزدىك جۇمىس ورنى ءۇشىن» سىيلىعىن ەربول نۇرقاتوۆ جەڭىپ الدى. ول اقىل-ەسىندە اۋىتقۋشىلىعى بار ادامدارعا ارنالعان ەمدەۋ-وندىرىستىك شەبەرحانالاردا وندىرىستىك جانە قالپىنا كەلتىرۋ جۇمىستارىن اشىپ، ونى جولعا قويۋ جۇمىستارىن اتقارادى.
«ونەر جانە مادەنيەت سالاسىنداعى جەتىستىكتەرى ءۇشىن» وسكەمەندىك ەكاتەرينا فەدورەنكو ماراپاتتالدى. ول – اربامەن بي بيلەۋ بويىنشا ەل بىرىنشىلىگىنىڭ جەڭىمپازى. سونداي-اق، ەكاتەرينا بي بيلەۋدەن بولەك مۇگەدەكتەرگە، جالعىز باستى زەينەتكەرلەرگە، ۇوس ارداگەرلەرىنە، مۇگەدەك بالالاردى تاربيەلەپ وتىرعان كوپ بالالى وتباسىلارعا اقىسىز كولىك قىزمەتىن ۇسىناتىن «اۆتو-ەرىكتىلەر» جوباسىنا دا بەلسەندى تۇردە ات سالىسىپ كەلەدى.
پىكىر قالدىرۋ