6 جەلتوقساندا ءبىر توپ بەلسەندى نۇر-سۇلتان قالالىق پوليسيا دەپارتامەنتىنە بارىپ، 16 جەلتوقسان قارساڭىندا وزدەرىن قۋدالاماۋدى، سول كۇنى جەلتوقسان جانە جاڭاوزەن وقيعاسى قۇرباندارىن ەسكە الۋعا مۇمكىندىك بەرۋدى تالاپ ەتتى دەپ جازادى Qamshy.kz اقپارات اگەنتتىگى ازاتتىقتىڭ دەرەگىن نەگىزگە الىپ. 

بەلسەندىلەردىڭ ايتۋىنشا، ولار 16 جەلتوقساندا كونستيتۋسيالىق قۇقىقتارىن پايدالانىپ، ميتينگىگە شىققىسى كەلەدى. الايدا "ميتينگ قارساڭىندا بەلسەندىلەردىڭ ءۇيىن اڭدىپ، ولاردى كوشەدەن ۇستاۋ - پوليسيانىڭ ادەتى".

- 1986 جىلعى جەلتوقسان جانە 2011 جىلعى جاڭاوزەن وقيعاسى قۇرباندارىن ەسكە الۋعا قۇقىعىمىز بار. نەگە سۇتكە، نانعا، دارىگە شىققان جەرىمىزدەن الىپ كەتەسىڭدەر؟ مەنىڭ تۋىستارىمنىڭ بالالارى ءولدى، تانىس-دوستارىمنىڭ جاقىندارى ءولدى. گۇل شوعىن قويۋ - مەنىڭ پارىزىم. قۇران وقۋعا مۇددەلىمىن. 16 جەلتوقساندا بىزگە تيىسپەڭدەر! - دەدى نارازى ايەلدەردىڭ ءبىرى پوليسەيلەرگە.

پوليسيا عيماراتىنىڭ فويەسىندە نارازى بەلسەندىلەر "وزدەرىن قۋدالاعان" پوليسەيلەردى ايىپتاپ، قۋدالاۋدى توقتاتۋدى تالاپ ەتتى. ولار قولدارىندا بىرنەشە سۋرەت ۇستاپ تۇردى. بەلسەندىلەردىڭ تۇسىندىرۋىنشە، بۇل - "وزدەرىنىڭ ۇيلەرىن اڭدىپ، ىزىنە تۇسكەن پوليسيا قىزمەتكەرلەرىنىڭ سۋرەتى".

سالدەن سوڭ ولاردىڭ الدىنا قالالىق پوليسيا دەپارتامەنتى ءتوراعاسىنىڭ ءبىرىنشى ورىنباسارى باقىتجان مالىبايەۆ شىقتى. ول نارازى ايەلدەرگە كىرە بەرىس جولدى بوگەمەۋىن سۇراپ، ماسەلەلەردى ىشكە كىرىپ تالقىلاۋعا شاقىردى. الايدا بەلسەندىلەردىڭ كوبى بۇل ۇسىنىسقا كەلىسكەن جوق.

قازاقستان قوعامى ءۇشىن مەملەكەت تاۋەلسىزدىگىن جاريالاعان مەرەكە كۇنى رەتىندە اتاپ وتىلەتىن جەلتوقساننىڭ 16-سى قازاقستان تاريحىندا بولعان تاعى ەكى وقيعامەن ماڭىزدى. 1986 جىلى جەلتوقساندا ماسكەۋدىڭ شەشىمىنە نارازىلىق تانىتىپ، الماتىدا بەيبىت شەرۋگە شىققان ستۋدەنت جانە جۇمىسشى قازاق جاستارىن بيلىك كۇشپەن تاراتىپ، كەيىن جۇزدەگەن ادامدى قۋعىنعا سالعان. 2011 جىلى ماڭعىستاۋ وبلىسىنىڭ جاڭاوزەن قالاسىندا بىرنەشە ايعا سوزىلعان مۇنايشىلار ەرەۋىلىنە پوليسيا وق اتقان. رەسمي دەرەك بويىنشا، جاڭاوزەن مەن شەتپەدەگى وقيعالاردا 17 ادام قازا تاپقان.