كەشەگى "قازاقستان بارىسى" بالۋاندار دوداسىندا قارىن اشتىراتىن سۇرقاي كورىنىستەر از بولمادى. ارينە، ايتۋلى الىپتار ايقاسىن مۇلدە جوققا شىعارۋعا بولماس. ءبىراق، ءاۋ باستا وسى دودانى ۇلتتىق رۋحىمىزعا ساي ەتىپ ۇيىمداستىرۋ كەرەك ەدى. "بارىس" - ەلباسىنىڭ 2030 باعدارلاماسىنان كەيىن قۇلاققا ءسىڭىستى بولا باستاعانىمەن، نەگىزىنەن بۇل ۇعىم قالماقتارعا ءتان. ال، قازاق قاشاننان الىپتاردىڭ كۇرەسىن "تۇيە بالۋان" دەپ اتاعان. الدىن-الا جاساعان جارنامادا تاۋ بارىستارىنىڭ ءبىر-بىرىن تىرنالاعان توبەلەسىن كورسەتىپ جاتتى. قاتىندارشا تىرنالاسقان بۇل كورىنىس - قازاق كۇرەسىنىڭ رۋحىن اسقاقتاتاتىن ەمەس، كەرىسىنشە تومەنشىكتەتەتىن سيۋجەت سەكىلدى كورىندى ماعان. وسى سەبەپتەن دە، دودانى "قازاقستان بارىسى" دەگەننەن كورى، "الىپتار ايقاسى" دەپ اتاعان دۇرىس سياقتى. سەبەبى، "الىپ" ىرلىكپەن بىرگە رۋح كەمەلدىلىگىن (الىپ-ەرەن) بىلدىرەتىن ۇعىم. قازاق "بالۋان شالقايا بەرى ءبورى، ەڭكەيە بەرى تۇلكى" دەپ كۇرەس ونەرىنىڭ ورشىلدىك پەن اسقان سەزىمتالدىقتى قاجەت ەتەتەتىنىن تۇسپالداعان. سوندىقتان، "قازاقستان بارىسى" دەگەندى "الىپتار ايقاسى" نەمەسە ودان دا ءتاۋىر اتاۋمەن (تابىلىپ جاتسا) اتاعان ءجون دەپ بىلەمىن. بۇنى ءبىر دەپ قويىڭىز. ەكىنشىدەن، كىلەمگە ءاربىر وبلىستان 2 بالۋاننان عانا قاتىستى. الدىن-الا ىرىكتەۋ باسەكەلەرىندە تالاي بالۋان باعىن سىناپ، كىل مىقتىلار عانا شەشۋشى ساتتە ونەرىن كورسەتكەنىمەن، ات توبەلىندەي از بالۋان ءبارىبىر بوز كىلەمنىڭ كوركىن قىزدىرا العان جوق. وتىز كۇن ويىن بولماسا دا، جىلىنا ءبىر رەت وتەتىن وسى دودانى ەڭ كەمىندە ءۇش كۇن ۋلاتىپ-شۋلاتىپ وتكىزۋگە بولادى عوي. ول ءۇشىن ايماقتاردان 2 بالۋاندى عانا ەمەس، كەمىندە 5 بالۋاندى قاتىستىرۋ شارت. ءتىپتى، شەتەلدىكتەردى قاتىستارماساق تا، شەتتە جۇرگەن قازاق بالۋاندارىنا دا بەلگىلى ءبىر كۆوتا بەرۋگە بولادى دەپ ويلايمىن. مىسالىعا، جۇڭگو، رەسەي، موڭعوليا، وزبەكستان سەكىلدى الىس-جاقىن شەتەلدەردە كۇرەستى كاسىپ قىلعان قانشاما قاراكوز باۋىرلارىمىز بار. ەندەشە، ەنشىسى بولىنبەگەن قازاقتى بوتەگەمىز بۇلكىلدەپ "الىپتار ايقاسىنان" نەگە شەتتەتۋىمىز كەرەك؟ ۇشىنشىدەن، بالۋاندارىمىز بىر-بىرىمەن ايقاسقا تۇسكەندە، باسىم كوپشىلىگى مىسقالداي عانا مىسپەن، بۇك-مۇك دەگەن تۇسىنىكسىز ۇپايلارمەن مەرەيى ۇستەم بولىپ جاتتى. ءوزىمىز دە اۋىلدا بالا كۇنىمىزدە كۇرەسىپ وستىك (مەنىڭ ەكى اعام كۇرەستەن سپورت شەبەرى). ءبىراق، كۇرەسكەندە مىناداي شاتپاق ۇپاي بەرۋدى كورگەن ەمەسپىز. قازاقتا "بۇك" دەگەن ۇعىم الىپ جىقتى دەگەن ماعىنانى ەمەس، "بۇك ءتۇسىپ" الۋ دەگەن وكپەلەگەندى بىلدىرەدى. ارى-بەرىدەن سوڭ اتانداي اقىرتىپ الىپ ۇرماعان سوڭ الىپتاردىڭ قيمىلىن "بۇك-شىك" دپ باعالاۋ ۇساقتىق سياقتى. ناعىندا، قازاق كۇرەسىنىڭ ەرەجەسىنەن الەيىم جۇرتشىلىق تەكتىلىكتىڭ، ىرىلىكتىڭ بەلگىسىن كورۋى كەرەك دەپ ويلايمىن. سوندىقتان، ەرەجەنى وزگەرتۋ كەرەك دەپ بىلەمىز. تورتىنشىدەن، قازىلار ءپرينسيپشىل بولۋ كەرەك. كەشەگىدەي (شىنكەيەۆ پەن ىستىبايەۆتىڭ ايقاسى) ەكىۇداي شەشىم شىعارىپ جاتسا، ياعني، الىپتار ايقاسىندا بۇلت ەتىپ اينىپ، ءبىر توقتامعا كەلمەسەك، وڭگەگە ءقايتىپ ونەگە بولا الامىز، وزگەگە ءقايتىپ تەكتى ەلدىڭ تۇقىمى ەكەنىمىزدى ايگىلەمەكپىز. ءيا، ايتا بەرسەڭ، مونشاقشا جىپكە ءتىزىپ، سىنايتىن تۇستار جەتەرلىك. بار-جاعى ءۇشىنشى رەت ساۋىن ايتىپ، وتكىزىپ وتىرعان "الىپتار ايقاسىنا" قىزۋ قولداۋ ءبىلدىرىپ، الداعى ۋاقىتتا مۇناندا تارتىستى، تارتىمدى وتۋىنە تىلەكتەستىك بىلدىرەمىز!

مۇحان يساحاننىڭ فەيسبۋكتەگى پاراقشاسىنان الىندى