الماتى قالاسىنا بلوكبەكەتتەر ارقىلى كىرۋ/شىعۋعا رۇقسات ەتىلگەن ازاماتتاردىڭ ءتىزىمى كەڭەيتىلدى. بۇل تۋرالى قالا اكىمدىگىنىڭ باسپا ءسوز قىزمەتى حابارلادى.

"الماتى قالاسى اكىمدىگى جانىنداعى توتەنشە جاعداي رەجيمىن قامتاماسىز ەتۋ جونىندەگى جەدەل شتاب الماتى قالاسىنان/قالاسىنا دەنساۋلىعىنا بايلانىستى وزدىگىنەن قوزعالۋ مۇمكىندىگى جوق جانە شۇعىل تۇردە ەمدەلۋگە باعىتتالعان ازاماتتارعا جانە ولاردى الىپ جۇرەتىن ادامداردىڭ قوزعالىسىنا (ءجۇرىپ-تۇرۋىنا) رۇقسات ەتەتىن شەشىم قابىلدادى. مۇنداي رۇقسات مەديسينالىق مەكەمەنىڭ حات تۇرىندەگى جولداماسى بولعان جاعدايدا ناۋقاستى الىپ ءجۇرۋشى ءبىر ادامعا بەرىلگەن جانە ولار ءبىر اۆتوكولىكپەن جۇرۋلەرى ءتيىس" دەلىنگەن اكىمدىك تاراتقان حابارلامادا.

اتالاعان شارالار سوزىلمالى اۋرۋلاردى ەمدەۋدە، جوسپارلى وپەراسيالاردى جاساۋدا دەر كەزىندە قىزمەت كورسەتۋگە مۇمكىندىك بەرەدى.