كانادانىڭ بايىرعى تۇرعىندار قالالاردى تاستاپ، جابايى تابيعاتقا كەتپەك. ولاردىڭ ايتۋىنشا، بايىرعى تۇرعىندار قارتتاردىڭ ومىرلىك تاجىريبەلەرىنە سۇيەنىپ، وسىلاي جاساۋدى شەشكەن، دەپ جازادى aljazeera.com.

پول پەترين ەسىمدى بايىرعى تۇرعىن كانادانىڭ سولتۇستىگىندە جابايى تابيعاتتا ءومىر سۇرۋگە داعدىلانعان. جيىرما جىلدان استام ۋاقىت بويى سولتۇستىك-باتىس ايماقتاعى ماككەنزي وزەنىنىڭ جاعاسىندا ءومىر سۇرگەن. بۇل شالعاي ايماققا كۇن جىلى ايلاردا قايىقپەن نەمەسە اركتيكالىق قىس ايلارىندا تەك شانامەن عانا جەتۋگە بولادى.

سوڭعى جىلداردان بەرى ينۋۆيك قالاسىندا ءومىر سۇرەدى. ەندى ولار ينۋۆيكتەگى ۇيىنەن كەتىپ، جابايى تابيعاتقا ورالۋعا دايىن. بۇل جولى ول كوروناۆيرۋس سەبەبىنەن كەتپەك.

– بارلىعى جابايى تابيعاتقا قايتۋعا دايىندالىپ جاتىر، – دەدى ول تەلەفون ارقىلى ءال جازيرا تەلەارناسىنا.

ينۋۆيك قالاسىندا كوبىنەسە ينۋۆيالۋيت (باتىس كانادالىق ينۋيت) حالقى تۇرادى. وندا بار-جوعى 3000-نان استام بايىرعى تۇرعىن بار. قازىرگە دەيىن ينۋۆيكتە كوروناۆيرۋس اۋرۋى تىركەلگەن جوق، قالا جەرگىلىكتى دۇكەندەردە الەۋمەتتىك وقشاۋلانۋ ەرەجەلەرىن ساقتاۋ ارقىلى ساقتىق شارالارىن جۇرگىزۋدە. سولتۇستىك-باتىس ايماق پروۆينسياسىنىڭ ۇكىمەتى 20 ناۋرىزدا پاندەمياعا بايلانىستى اۋماقتاعى بارلىق ماڭىزدى ەمەس ساپارلارعا تىيىم سالعان.

– ءبىز وندا ءوزىمىز قالاعان نارسەنى ىستەي الامىز. بالالار جابايى تابيعاتتا وينايدى. ءبىز اڭ اۋلايمىز، بالىق اۋلايمىز. جەر بىزگە جانۋارلارعا، وسىمدىكتەرگە جانە بارىنە ارنالعان. ول جاقتىڭ سۋى دا كەرەمەت، كوكتەمدە تۇپ-تۇنىق، – دەيدى پەترين.

ونىڭ ايەلى ەمي جانە 11 جاستاعى قىزى زوي، ەكەۋى دە جەر مەن رەسۋرستاردى پايدالانۋدى ۇيرەنگەن. پەتريننىڭ تۇسىندىرۋىنشە، زوي بالا كەزىنەن-اق ءبارىن ۇيرەنگەن، جابايى تابيعاتتا قالاي ءومىر سۇرۋگە بولاتىنىن جاقسى بىلەدى.

– زوي قاز پىسىرە الادى. ول مۋسكرات سويىپ، تەرىسىن سىپىرا الادى. وت جاعىپ، ىستاپ قۇرعاق ەت جاسايدى. ءبىز جيدەك تەرىپ، بالىق اۋلاۋعا بارامىز، – دەپ قوستى ول.

ولاردىڭ شاتىرلارى ىڭعايلى، شامامەن 15 ادامدى سىيعىزا الاتىنداي ۇلكەن. پەتريندەر وزدەرىمەن بىرگە بىرنەشە وتباسى مەن دوستارىن الىپ، COVID-19 قاۋىپ-قاتەرىنەن الىس كەتپەك. ولاردىڭ ايتۋىنشا، جۇزدەگەن تۇرعىن كوشۋگە دايىندالىپ جاتىر. كوزدەگەن جەرگە قايىقپەن بىرەشە كۇن بويى ءجۇزىپ بارادى.

ولاردىڭ ايتۋىنشا، مىڭداعان شاقىرىم الىستاعى وزگە بايىرعى تۇرعىندار دا سولاي ىستەمەككە دايىندالىپ جاتقان كورىنەدى.