بيىل الداعى شىلدە ايىندا ماڭعىستاۋ وبلىسىنداعى ءتۇپقاراعان اۋدانىندا ءىرى قۇس فابريكاسى ىسكە قوسىلادى. بۇل تۋرالى قوعامدىق كوممۋنيكاسيا ورتالىعىندا وتكەن بريفينگتە ماڭعىستاۋ وبلىسى اكىمىنىڭ ورىنباسارى باقىتجان قاشاقوۆ مالىمدەدى.

بۇگىندە ايماققا قۇس ەتى تولىق سىرتتان، قوستاناي وبلىسى مەن الماتى قالالارىنان جانە وزگە ەلدەردەن تاسىمالدانادى. جەكە ۇيىندە قۇس وسىرەتىن تۇرعىنداردى قوسپاعاندا بارلىعى سىرتقى ءونىمدى تۇتىنادى. «ال، ءتۇپقاراعان اۋدانىنداعى «اقتاۋ اگرو» قۇس فابريكاسى ىسكە قوسىلعان سوڭ، ءوڭىر حالقىنىڭ 1 جىلدىق قاجەتتىلىگىنىڭ 50 پروسەنتىن قامتاماسىز ەتەدى. كاسىپورىننىڭ جىلدىق قۋاتى 5 مىڭ توننا»،-دەيدى ب.قاشاقوۆ.

ينۆەستيسيالىق جوبانىڭ قۇنى – 4،5 ملرد تەڭگە. ءقازىر مۇنداعى قۇستى سويۋ سەحى 80 % دايىن تۇر. قاجەتتى قۇرال-جابدىقتار يراننان كەلدى. مونتاجداۋ جۇمىستارى جاسالىپ جاتىر. ينكۋباتور سەحى 75 % دايىن. وسى ايدا قۇرال-جابدىعى كەلىپ مونتاجداۋ جۇمىستارى باستالادى. قۇس قورالارى، اكىمشىلىك عيماراتتارى مەن گاراج سىندى 16 عيماراتتان تۇراتىن كاسىپورىن قۇرىلىسى اياقتالۋعا جاقىن. گاز، توق، سۋ قۇبىرلارىن تارتۋ جۇمىستارى دا الداعى ماۋسىم ايىندا اياقتالادى. ءقازىر قۇرىلىس باسىندا 60 ادام، كاسىپورىن ىسكە قوسىلعان سوڭ 120 ادام تۇراقتى جۇمىسقا ورنالاسادى. فابريكا باستاپقىدا 30 % جۇمىستى بايتايدى دا، كەزەڭ-كەزەڭىمەن 100 % قۋاتتا جۇمىسقا كىرىسەدى.