«2013 جىلعى تامىزدىڭ 5-ىنەن 9-نا دەيىن تاۋەلسىز قازاقستان تاريحىندا العاش رەت جەرگىلىكتى بيلىك ورگاندارى باسشىلارىنىڭ سايلاۋى تابىستى ءوتتى. بارلىعى 7 ميلليون 632 مىڭ قازاقستاندىق تۇراتىن اۋداندىق ماڭىزداعى قالالاردىڭ، سەلولىق وكرۋگتەردىڭ، پوسەلكەلەر مەن سەلولاردىڭ 2454 اكىمى سايلاندى. وزدەرىڭىز بىلەتىندەي، وسى سايلاۋدى وتكىزۋ تۋرالى باستامانى مەن «قازاقستان-2050» ستراتەگياسى تۋرالى حالىققا جولداۋىمدا كوتەردىم. سايلاۋ جاس قازاقستاندىق دەموكراتيانىڭ ماڭىزدى جەتىستىگىنە اينالدى»،- دەدى مەملەكەت باسشىسى نۇرسۇلتان نازاربايەۆ اۋداندىق ماڭىزداعى قالالار، سەلولىق وكرۋگتەر، ولاردىڭ قۇرامىنا كىرمەيتىن پوسەلكەلەر مەن سەلولار اكىمدەرى سايلاۋىنىڭ قورىتىندىسى بويىنشا قازاقستاندىقتارعا جولداعان ۇندەۋىندە. پرەزيدەنت اتاپ ايتقانداي، بۇل سايلاۋ اشىق، ءمولدىر بولىپ، قولدانىستاعى زاڭنامالىق نورمالار مەن قازىرگى زامانعى دەموكراتيالىق تاجىريبەگە تولىقتاي سايكەستى.

سونداي-اق، مەملەكەت باسشىسى 2012 جىلى ءوزىنىڭ «قازاقستاندى الەۋمەتتىك جاعىنان جەتىلدىرۋ: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا 21ء-شى عاسىردىڭ سىناقتارىنا جاۋاپ بەرەتىن تولىققاندى اكىمشىلىك رەفورمانى ۇسىنعان ەدى. بۇل باستاما ءبىزدىڭ قوعامدا تولىق قولداۋعا يە بولدى. سونىڭ ءبىر مىسالى – اۋىل اكىمدەرىنىڭ سايلاۋى. ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆتىڭ ايتۋىنشا، بارلىعى 7173 ادام ۇسىنىلىپ، سونىڭ ىشىنەن 6738ء-ى اكىم قىزمەتىنە ۇمىتكەر بولىپ تىركەلگەن. ورتاشا العاندا ءبىر ورىنعا 2-3 ۇمىتكەر تالاسقان. ال 37 اكىمشىلىك-اۋماقتىق بىرلىكتە اكىم بولۋعا ۇمىتكەرلەر قارسىلاستارىن بار-جوعى 1 داۋىس باسىمدىقپەن جەڭىسكە جەتكەن. بۇل سايلاۋدىڭ اشىق، باسەكەلەستىك جاعدايدا وتكەنىنىڭ ءبىر دالەلى - 3 اۋىلدىق وكرۋگتە سايلاۋشىلاردىڭ داۋىستارى ەكى ۇمىتكەرگە دە تەڭ ءبولىنىپ، جەڭىمپازداردى انىقتاۋ مۇمكىن بولماعان. ول جەرلەردە قايتادان سايلاۋ ءوتتى.

سايلاۋدىڭ قالاي وتكەنى جونىندە ءبىر وبلىستى مىسالعا الساق تا جەتەدى. مىسالى، قاراعاندى وبلىسىندا قالالىق جانە اۋداندىق ءماسليحاتتاردىڭ 215 دەپۋتاتى ەكى قالانىڭ – قارقارالى مەن ابايدىڭ، سونداي-اق اۋىلدار مەن پوسەلكەلەردىڭ 200 اكىمىن سايلادى. جوعارى باسەكەلەستىكتىڭ بولعانى سونشالىق، 202 ورىنعا 601 ۇمىتكەر ب ا ق سىنادى. ايتپاقشى، اۋەلدە ولاردىڭ سانى 602 ادام بولاتىن. ءبىراق، سوڭعى ساتتە نۇرا اۋدانىنداعى مايوروۆكا اۋىلىنىڭ بۇرىنعى اكىمى كۇللى ەلگە تاراعان ۇلكەن جانجالدىڭ سەبەبىنەن ءوز كانديداتۋراسىن الىپ تاستادى. جەرگىلىكتى تۇرعىنداردىڭ ايتۋىنشا، بۇرىنعى اكىمنىڭ ۇلى مەن حالىقتىڭ اراسىنداعى تەكەتىرەس تراۆماتيكالىق قارۋدان وق اتىلعان جانجالعا ۇلاسىپ، ودان 20 ادام زارداپ شەككەن. كەيىنىرەك بۇل وقيعاعا قاتىستى قۇزىرلى ورگاندار قىلمىستىق ءىس قوزعادى. ال، ءوز ۇلىنىڭ جاساعان قىلمىسىنا قاتتى ۇيالعان اكىم ساياسي مانسابىن جالعاستىرۋدان باس تارتتى. الايدا، بۇل اكىمدەر سايلاۋىنا قاتىستى بولعان ەلىمىزدەگى جالعىز جاعىمسىز وقيعا. كوپ ۇزاماي، قاراعاندى وبلىسىنداعى ەكى قالانىڭ، 35 پوسەلكەنىڭ، 34 اۋىلدىڭ جانە 131 اۋىلدىق وكرۋگتىڭ جاڭا اكىمدەرىنىڭ ەسىەمدەرى بەلگىلى بولدى. ماسەلەن، اباي اۋدانىن باسقارۋعا بۇعان دەيىن بۇقار جىراۋ اۋدانىنداعى بوتاقارا پوسەلكەسىنىڭ اكىمى بولعان ساپار ساتايەۆ سايلاندى. ال، بۇرىن قالالىق اكىمدىكتە جەمىستى جۇمىس ىستەگەن نۇرلان باتىربەكوۆ قارقارالىنىڭ اكىمى بولدى. اتاپ ايتارلىعى، سايلاۋعا دەيىن اكىم قىزمەتىن اتقارعاندار  دوداعا قاتىسقان جوق. جالپى العاندا، وبلىستاعى 161 اكىم ءوز ورنى ءۇشىن باسەكەگە ءتۇسىپ، سونىڭ ىشىندە 137ء-سى بۇرىنعى قىزمەتتەرىن ساقتاپ قالدى. قاراعاندى وبلىسىندا سايلانعان 202 اكىمنىڭ تەك 16-سى عانا – ايەلدەر.

سونىمەن، جاڭادان سايلانعان اكىمدەردىڭ كورپۋسىندا ەلىمىزدەگى 23 ۇلتتىڭ وكىلى بار. ال، ولاردى ماماندىق تۇرلەرى بويىنشا بولەتىن بولساق، 627ء-سى (25،6 پايىزى) – پەداگوگتار، 501ء-ى  (20،4 پايىزى) – اۋىل شارۋاشىلىعى ماماندارى، 417ء-سى (17 پايىزى) – ينجەنەرلەر، 367ء-سى (14،5 پايىزى) – ەكونوميستەر، 281ء-ى (11،5 پايىزى) – زاڭگەرلەر جانە 271ء-ى (11 پايىزى) – باسقا ماماندىقتاردىڭ وكىلدەرى. 2454 اكىمنىڭ 280ء-ى، ياعني، 11،4 پايىزى – ايەلدەر. بۇل بۇرىنعى كورسەتكىشتەن 32-گە كوپ. ستاتيستيكالىق مالىمەتتەردەن پاۆلودار، وڭتۇستىك قازاقستان جانە اقتوبە وبلىستارىندا ايەل-اكىمدەردىڭ سانى 6 پايىزعا دەرلىك ۇلعايعانىن كوردىك. ايەلدەر قاۋىمى مەملەكەتتىك، قوعامدىق باسقارۋ ىسىنە بەلسەندى تارتىلا باستادى. ويتكەنى، مەملەكەت باسشىسىنىڭ ءوزى «قازاقستان 2050 ستراتەگياسى: قالىپتاسقان مەملەكەتتىڭ جاڭا ساياسي باعىتى» اتتى حالىققا جولداۋىندا: «ءبىز بۇدان ءارى دە ەلىمىزدە ايەلدەردىڭ ءرولى ارتۋى ءۇشىن بارلىق جاعدايدى جاسايتىن بولامىز. قازىرگى زامانداعى قازاقستاندىق ايەل قىزمەت ىستەۋگە ۇمتىلۋى كەرەك. ايەلدەردى مەملەكەتتىك جانە قوعامدىق باسقارۋ ىسىنە بەلسەنە تارتقان ءجون، اسىرەسە، جەرگىلىكتى دەڭگەيدەگى وڭىرلەردە. ولاردىڭ بيزنەس اشىپ، ونى جۇرگىزۋىنە دە قولايلى جاعداي جاساعان ابزال» دەپ اتاپ ايتقان.

اكىمدەردىڭ ورتاشا جاسى – 47. ولاردىڭ ىشىندە كوپشىلىگى 55 جاسقا دەيىنگى ادامدار، ولار اكىمدەر كورپۋسىنىڭ 80،3 پايىزىن قۇرايدى. «جالپى العاندا، اكىمدەر قۇرامى ءبىرشاما جاساردى. بۇعان دەيىن 55 جاسقا دەيىنگى اكىمدەر 74،5 پايىزدى قۇراعان بولاتىن. ال، جاڭادان سايلانعان اكىمدەردىڭ ىشىندەگى ەڭ جاسى 25 جاستا»، - دەدى قۋاندىق تۇرعانقۇلوۆ سايلاۋ قورىتىندىسى بويىنشا وتكەن جيىندا. ايتا كەتەلىك، بۇعان دەيىن پاۆلودار وبلىسى ۋسپەن اۋداندىق كاسىپكەرلىك جانە اۋىل شارۋاشىلىعى ءبولىمىنىڭ باس مامانى بولىپ كەلگەن 25 جاستاعى تيمۋر جانعازينوۆ قايتا داۋىس بەرۋدىڭ ناتيجەسىندە اتالعان اۋدانداعى قوزىكەتكەن اۋىلدىق وكرۋگىنىڭ اكىمى بولىپ سايلاندى. سونداي-اق، ماڭعىستاۋ وبلىسى ماڭعىستاۋ اۋدانىنداعى تۇششىقۇدىق اۋىلدىق وكرۋگىنىڭ اكىمى بولىپ 28 جاستاعى ازامات قويسارين سايلاندى. ول بۇرىن اۋداندىق جەر قاتىناستارى مەن كاداستر ءبولىمىنىڭ باس مامانى قىزمەتىن اتقارعان. بۇل ايماقتىق ساياساتتا مەملەكەتتىڭ جاستارعا ۇلكەن ءۇمىت ارتىپ، سەنىم بىلدىرگەنىنىڭ ءبىر كورىنىسى.

قازاقستانداعى ەڭ جاس باسقارۋشىلاردىڭ  ءبىرى – پاۆلودار وبلىسىنداعى زاڭعار اۋىلدىق وكرۋگىنىڭ 25 جاسار جاڭا اكىمى حامزا ورازبەكوۆ. «ەلىمىزدەگى اۋىل اكىمدەرىن سايلاۋدىڭ دەموكراتيالىق جۇيەسىنىڭ ناتيجەسىندە 25 جاسىمدا ەلدى-مەكەندى باسقارۋ قۇقىعا يە بولدىم، - دەيدى حامزا «pavlodarnews.kz» سايتىنا بەرگەن شاعىن سۇحباتىندا. – ەندىگى جوسپارىم – اۋىلدا كاسىپكەرلىكتى دامىتىپ، بالاباقشا سالۋ». پاۆلودار اۋدانىندا تۋىپ-وسكەن حامزا ءوز اۋىلىنىڭ قانداي كۇردەلى ماسەلەلەرى بارىن بەس ساۋساعىنداي بىلەدى. مەملەكەتتىك قىزمەتتە 3،5 جىلدىق ءوتىلى بار جاس جىگىت سايلاۋعا دەيىن كاسىپكەرلىكتى دامىتۋ جانە اۋىل شارۋاشىلىعى بولىمىندە ەڭبەك ەتىپتى. اتاپ ايتارلىعى، اكىمدىك قىزمەتكە 7ء-شى تامىزدا حامزامەن بىرگە زاڭعار اۋىلىنداعى تاعى ەكى ادام كانديداتۋراسىن ۇسىنعان. ولاردىڭ جاسى دا، تاجىريبەسى دە، ەڭبەك ءوتىلى دە حامزادان ايتارلىقتاي اسىپ تۇرعان. الايدا، اۋىلداستارى جاس جىگىتتى تاڭداعان. «مەن دالاعا شىعىپ: «مەنى سايلاڭدارشى!» دەپ ۇرانداتقان جوقپىن. بار بولعانى تۋعان اۋىلىمدى قالاي وركەندەتۋ جونىندەگى ۇسىنىستارىمدى جەتكىزدىم. بۇعان دەيىن كاسىپكەرلىكتى دامىتۋ بولىمىندە جۇمىس ىستەگەندىكتەن، سايلاۋ ناۋقانىنداعى باعدارلامامنىڭ ءبىرىنشى باعىتى – شاعىن جانە ورتا بيزنەستى دامىتۋ بولدى. ويتكەنى، اۋىلدا بۇل سالادا بەلسەندىلىك تومەن. ەگەر دە جاڭا بيزنەس-جوبالار جاسالاتىن بولسا، وندا جاڭادان جۇمىس ورىندارى دا اشىلادى»، - دەيدى حامزا ورازبەكوۆ. سۇلتانماحمۇت تورايعىروۆ اتىنداعى پاۆلودار مەملەكەتتىك ۋنيۆەرسيتەتىن ءتامامداعان جاس اكىم ەكى بىردەي ماماندىق الىپ ۇلگەرىپتى: ءبىرى – زووتەحنيك، ەكىنشىسى – زاڭگەرلىك. سونىمەن بىرگە، 25 جاسىنا دەيىن كوپ نارسەگە قول جەتكىزگەن حامزا ءوز الدىنا وتاۋ كوتەرىپ، ەكى بالاسىن تاربيەلەپ وتىرعان مەيىرىمدى اكە. – مەنىڭ اكەم 10 جىلدان بەرى باسقا ءبىر اۋىلدىق وكرۋگتە اكىم بولىپ قىزمەت ەتەدى، - دەيدى ول. – سوندىقتان، ءوز اكەمنىڭ وكشەسىن باسىپ، تاڭداعان جولىمەن ءجۇرۋدى ءجون كوردىم. ءتىپتى، اكىم بولۋعا كانديداتۋرامدى ۇسىنعاندا دا اكەممەن اقىلداستىم. ءبىرىنشى بولىپ مەنى قولداعان ادام دا – سول، - دەيدى ح. ورازبەكوۆ. ال، حامزاعا دەيىن «جاسى جاعىنان» ەڭ ىسكەر، بەلسەندى بولىپ تانىلعان قوستانايلىق 23 جاسار تاتيانا نوۆيكوۆانىڭ دەپۋتات بولعانىن بىرەۋ بىلسە، بىرەۋ بىلمەيدى.  

«سىرت كوز - سىنشىل» دەگەن ءسوز بار. سوڭعى كەزدەرى شەتەلدىك تۇلعالار بىزدەگى اكىمدەر مەن جوعارى لاۋازىمدى شەنەۋنىكتەردىڭ جاسىنا قاتتى تاڭ قالىپ ءجۇر. سولاردىڭ ءبىرى – تامىز ايىندا ەلىمىزگە كەلگەن تايلاندتاعى Amata يندۋستريالدىق كورپوراسياسىنىڭ باسشىسى، 60 جاستاعى جازۋشى، ىزگى نيەت ەلشىسى، «ازيا كەرۋەنى - 2013» ەكسپەديسياسىنىڭ كوشباسشىسى ۆيكروم كروماديت. الەمگە ايگىلى تاي ەلىنىڭ ساياحاتشىسىن قازاقستانداعى باسشى كادرلاردىڭ جاستاردان بولعانى قاتتى تاڭ قالدىرىپتى. ۆ. كروماديت وتاندىق باق-نىڭ بىرىنە بەرگەن سۇحباتىندا الەمنىڭ ەشبىر ەلىندە 35 جاستاعى ادامنىڭ قالا نە وبلىس اكىمى بولعانىن كورمەگەنىن مويىنداعان. ال، بىزدە بۇل قالىپتى نارسە. «مىسالى، قىتايدا جاس ماماندار وتە كوپ. ءبىراق، ولار باسشىلىق قىزمەتتە ەمەس. ستراتەگيا سالاسىن باسقارۋدى تاجىريبەسى مول، جاسى ۇلكەن ادامعا بەرگەن ءجون. تاكتيكالىق باعىتتارعا جاس، بەلسەندى، قايراتتى ادامداردى قويۋعا بولادى. ارينە، بۇل جەردە ەڭ باستىسى ىستەگەن ءىسىنىڭ ناتيجەسىنە قاراۋ كەرەك»، - دەيدى تايلاندتىق كاسىپكەر.

قۋاتتى مەملەكەتكە اينالۋىمىز ءۇشىن، ءىس جۇزىندەگى دەموكراتيانى جەرگىلىكتى جەرلەردەگى ءوزىن-وزى باسقارۋدان باستادىق. ءادىل سايلاۋ – قۋاتتى مەملەكەت قۇرۋداعى قادامدارىمىزدىڭ ءبىرى. ماسەلەن، اۋىل اكىمدەرىنىڭ سايلاۋى ەلىمىزدەگى اكىمدەر كورپۋسىنىڭ 91 پايىزدان استامىن قامتىدى. ياعني، ايماقتاردى دامىتۋعا تولىعىمەن بەتبۇرىس جاسادىق. وڭىرلەردى دامىتۋ مينيسترلىگىنىڭ قۇرىلۋى، ايماقتاردى دامىتۋ باعدارلامالارىنا (مونوقالالاردى دامىتۋ، شاعىن قالالار) بيۋدجەتتەن قوماقتى قارجى ءبولۋ – بۇلاردىڭ ءبارى قازاقستاننىڭ ايماقتىق ساياساتىن كۇشەيتۋىنىڭ بەلگىلەرى. «ەلىمىزدە جەرگىلىكتى جەرلەردەگى ءوزىن-وزى باسقارۋ رەفورماسى جۇرگىزىلدى. اۋىلدىق دەڭگەيگە قوسىمشا 5 مىڭ شاتتىق بىرلىك ءبولىنىپ، ولارعا 67 مەملەكەتتىك فۋنكسيا بەكىتىلدى. قازىرگى كەزدە اۋىل اكىمدەرى سالىق جيناۋعا، بيۋدجەتتى قالىپتاستىرۋعا، تۇرعىنداردىڭ قاتىسۋىمەن جەرگىلىكتى ماسەلەلەردى شەشۋ ءۇشىن قارجىلاندىرۋ قۇقىعىنا يە بولدى. بۇل بارلىق اكىمدەرگە ءوز وتانداستارى مەن مەملەكەت الدىندا اسا زور جاۋاپكەرشىلىك جۇكتەيدى. ءاربىر اكىم سول جاۋاپكەرشىلىكتى سەزىنىپ، ءوز مىندەتتەرىن لايىقتى اتقارۋى ءتيىس»، - دەدى مەملەكەت باسشىسى نۇرسۇلتان نازاربايەۆ 5ء-شى شاقىرىلعان پارلامەنتتىڭ ءۇشىنشى سەسسياسىنىڭ اشىلۋىندا سويلەگەن سوزىندە. ياعني، مەملەكەت وسى سايلاۋ ارقىلى ار-ۇجدانى تازا، اشىق، پاتريوت، حالىقشىل «جاڭا تيپتەگى» باسشىلاردىڭ بيلىككە كەلگەنىن قالاپ وتىر دەگەن ءسوز. ولارعا بىرىنشىدەن، ەلىنىڭ مۇددەسىنە قىزمەت ەتۋگە مۇمكىندىك بەرىلسە، ەكىنشىدەن، مانسابىن ءوسىرىپ، «ا» كورپۋسىنا وتۋىنەە جول اشىلادى. سونداي-اق، بۇل سايلاۋ سىبايلاس جەمقورلىققا قارسى ءىس-قيمىلدارىمىزدىڭ ءبىرى. جەرگىلىكتى جەرلەردە جۇرگىزىلگەن رەفورما تومەندەگى باسقارۋشىلاردىڭ قاتارىن جەمقورلىقتان تازالاۋعا كومەكتەسەتىنى ءسوزسىز. مۇنداي پىكىردى پارلامەنت دەپۋتاتتارى دا قولدايدى.

بۇل جەردە بىرىنشىدەن، «سىبايلاس جەمقورلىقپەن كۇرەس تۋرالى» زاڭ بۇزىلماۋىن قاداعالاۋىمىز كەرەك، - دەيدى ءماجىلىس دەپۋتاتى گۇلجان قاراقۇسوۆا. - ەكىنشىدەن، حالىقتىڭ ءوزى جەمقورلىق ارەكەتتەردىڭ سۋبەكتىسىنە اينالماۋى ءتيىس. بىلايشا ايتقاندا، حالىق پارا بەرمەسە، اكىم ونى قايدان الادى؟ سوندىقتان، اۋىلدىق جەرلەردەگى تۇرعىنداردىڭ ءوزى بەلسەندى بولىپ، ءوز مەملەكەتىن قۇرۋعا ات سالىسۋى كەرەك. ويتكەنى، مەملەكەت دەگەن – حالىق ەمەس پە؟ ال، جاڭادان سايلانعان اكىمدەر سول حالىقپەن جۇمىس ىستەي ءبىلىپ، زار-مۇڭىن تىڭداپ، زاڭنىڭ اياسىندا شەتىن ماسەلەلەرىن دەر كەزىندە شەشىپ بەرىپ وتىراتىن بولسا، مەملەكەت تە داميدى. ول ءۇشىن ءاربىر اكىم ءوز ءىسىنىڭ بىلگىرى، ساۋاتتى، وتانشىل بولۋعا مىندەتتى. ەلباسى مەملەكەتتىك قىزمەتشىلەرگە نەگە جوعارى دەڭگەيدە تالاپ قويىپ وتىر؟ سەبەبى، بيلىك مىقتى بولماسا، حالىقتىڭ تاراپىنان قۇرمەت پەن قولداۋعا يە بولماسا، وندا مەملەكەت تە بولمايدى.

ءماجىلىس دەپۋتاتى، ەكونوميكالىق رەفورما جانە وڭىرلىك دامۋ كوميتەتىنىڭ مۇشەسى نادەجدا نەستەروۆانىڭ پىكىرىنشە، دەموكراتيانى دامىتۋداعى جاڭا قادامىمىزدىڭ اسا ماڭىزدى ەكەنىن حالىقتىڭ ءوزى تەرەڭ ءتۇسىنۋى ءتيىس. «جەرگىلىكتى ءوزىن-وزى باسقارۋ تۋرالى» زاڭعا ەنگىزىلگەن وزگەرىستەر حالىققا ءوز ومىرىنە قاتىستى ماسەلەلەردى شەشۋگە ارالاسۋعا مۇمكىندىك بەرەدى، - دەيدى نادەجدا دميترييەۆنا. – جەرگىلىكتى جەردەگى تۇرعىندار ءوز ءومىرى ءوز قولدارىندا ەكەنىن سەزىنەتىن بولادى. ولار اكىمدەرمەن بىرگە وتىرىپ: «ءارى قاراي قالاي ءومىر سۇرەمىز؟»، «اۋىلدى قالاي باسقارامىز؟»، «قانداي ماسەلەلەردى ەڭ الدىمەن شەشەمىز؟» دەگەن وزەكتى ساۋالدارعا جاۋاپ ىزدەيدى. مىسالى، قوعامدىق ءتارتىپتى ساقتاۋ – حالىقتىڭ ءوز مىندەتى. ال، اكىمنىڭ قالاي جۇمىس ىستەيتىنى ونىڭ ىسكەرلىگىنە، جاۋاپكەرشىلىگىنە، ءوز جەرلەستەرىنىڭ الدىنداعى ار-ابىرويىنا بايلانىستى بولماق. مەنىڭ ويىمشا، اۋىل اكىمدەرىن سايلاعان دەپۋتاتتار لايىقتى ادامداردى عانا تاڭدادى. ەندەشە، قازاقستاننىڭ جاڭا ايماقتىق ساياساتىنداعى بۇل قادامى – اسا ماڭىزدى تاريحي قادام. بۇل رەفورما ءجاي جۇرسە دە، قيىندىقتارعا تاپ بولسا دا، ەڭ باستىسى – دامۋ مەن وركەندەۋگە الىپ باراتىن باعدارىمىز ايقىن».

«بيلەۋشىلەر حالىقتى پاتريوت ەمەسسىڭ دەپ ايىپتاماۋى كەرەك، كەرىسىنشە، ولار حالىق وتانشىل بولۋى ءۇشىن، ءوز قولدارىنان كەلەتىن ءىستىڭ ءبارىن جاساپ، ۇلگى كورسەتۋى كەرەك» دەپتى فيلوسوف-ويشىل ت. ماكولەي. ەلباسى مەن حالىق ءۇمىت ارتقان اكىمدەرگە پاتريوتتىقتىڭ ناعىز ۇلگىسىن كورسەتەتىن كەز كەلدى. جاڭا قازاقستاندىق پاتريوتيزم – بۇل پراگماتيكالىق پاتريوتيزم. «ازاماتتار مەملەكەتكە سەنۋى ءۇشىن، سول مەملەكەتتىڭ بولاشاعى جارقىن بولۋى ءتيىس، دامۋعا، جەكە ادامنىڭ كاسىبي تۇرعىدان وسۋىنە مۇمكىندىك بولۋى كەرەك»، - دەدى نۇرسۇلتان نازاربايەۆ. ال، جارقىن بولاشاققا باراتىن جول – قازاقستاننىڭ 2050 ستراتەگياسى. پرەزيدەنتتىڭ قاداپ ايتقانى، 30 دامىعان ەلدىڭ قاتارىنا قوسىلۋىمىز ءۇشىن، بارشا قازاقستاندىقتارعا ايرىقشا مىندەت جۇكتەلەدى. «ءبىز دامۋدىڭ ەڭ شەشۋشى ساتىسى – «قازاقستان 2050» ستراتەگيالىق داۋ جوسپارىن جۇزەگە اسىرۋ كەزەڭىنە اياق باستىق. بۇل ستراتەگيانىڭ نەگىزگى العا قويعان ماقساتى – 37 جىلدىڭ ىشىندە، مۇمكىن ودان دا بۇرىن الەمدەگى ەڭ دامىعان 30 مەملەكەتتىڭ توبىنا ەنۋ»، - دەدى مەملەكەت باسشىسى پارلامەنتتىڭ ءۇشىنشى سەسسياسىنىڭ اشىلۋىندا سويلەگەن سوزىندە. پرەزيدەنتتىڭ پىكىرىنشە، بۇل مەجەگە جەتۋ تەك قانا ىشكى ءونىمنىڭ وسۋىمەن باعالانبايدى. وندا ادامنىڭ دامۋى، الەۋمەتتىك جاعداي، ءبىلىم بەرۋ، دەنساۋلىق ساقتاۋ باعىتتارىنداعى قارقىندى ءوسۋ ماسەلەلەرىن ەسكەرۋ كەرەك. ولاي بولسا، ءبىزدىڭ بيلىك الىس ايماقتارداعى الەۋمەتتىك جاعدايدى جاقسارتۋعا قادام جاسادى. بۇل - بۇكىل حالىقتى، ۇلتتى، ەلدى بىرلىككە شاقىراتىن قادام. بۇل – دەموكراتيالىق قوعام قالىپتاستىرۋداعى، قۋاتتى مەملەكەت قۇرۋداعى تاڭداعان ستراتەگيالىق باعىتىمىزدىڭ ومىرشەڭدىگىن كورسەتەدى.

تاڭاتار تابىن ۇلى.