جاقسىعا باسىن ايتۋ جەتەرلىك. مەنىڭ تىلەگىم مىناۋ:

1. نۇرەكەڭمەن ءتورتىنشى رەت دۇنيەجۇزى قازاقتارىنىڭ ءىV قۇرىلتايىندا كەزىگىپ، تۇڭعىش رەت ءبىر تالاپ قويعانىم بار. ول تالابىمنىڭ ءبىر بەتتىك جازبا نۇسقاسىن دا سول جولى تابىس ەتتىم. وندا بىلاي دەلىنگەن ەدى: «وزگە ەلدەگى ءبىز ءسىزدىڭ قازاقستاندا قازاق جازۋىن لاتىنشاعا قايتارامىز دەگەنىڭىزدى ەستىپ قۋانۋدامىز. ارينە، قازاقستاننىڭ لاتىنشاعا كوشۋى مۇنداعى ءتىل مارتەبەسىنىڭ مەملەكەتتىك دەڭگەيگە تولىق جەتۋىنەن سوڭ بولعانى پايدالى. ءبىراق بولاشاقتا كوشەتىن لاتىنشانىڭ جوباسىن جۋىقتا جاريالاپ جىبەرسەڭىزدەر، دياسپوراداعىلار سوعان اۋناي بەرەر ەدىك. بۇل ءار ەلدەگى قازاقتاردىڭ بەت-بەتىمەن لاتىنشانىڭ ءار ءتۇرلى جوباسىنا كەتىپ قالماۋى، بولاشاقتا دۇنيەدەگى قازاقتاردىڭ جازۋداعى بىرلىگى ءۇشىن وتە پايدالى».

وسى جۇمىس تەزدەتىلسە جاقسى بولار ەدى.

2. قۇلجا قالاسىنداعى كەزىگۋدە، نۇرەكەڭ: «ءبىز جۇڭگو قازاقتارىن تۇگەل كوشىرىپ الا قويايىق دەپ وتىرعانىمىز جوق. ءبىراق، بارام دەگەندەرگە قۇشاعىمىز اشىق» دەگەن-دى. «نۇرلى كوش» باعدارلاماسى سول اشىق قۇشاقتى ايگىلەگەن بولاتىن. ءقازىر قىتايدا قازاقستانعا بارام دەۋشىگە بوگەت جوق. دەي تۇرعانمەن جۇڭگو قازاقتارى قازاقستانعا قوتارىلا كوشكەلى دە وتىرعان جوق. 20 جىلدان بەرى قازاقستانعا بارعانداردىڭ سانى جۇڭگو قازاقتارىنىڭ ەكى-اق جىلدىق ءوسىمى ەكەنى بۇعان ايعاق. مەنىڭ ايتارىم – «نۇرلى كوش» نۇرلى بولا تۇسسە، قىتايداعى جىلى ورنىن تاستاپ بارعاندار جىلى قارسى الىنسا، وكىنىشتەن اۋلاق بولسا. بۇل ءۇمىت نۇرەكەڭ تىكەلەي نازارىنا العاندا عانا ىسكە اسادى.

3. قازاقستاننىڭ شىنايى تاۋەلسىزدىگى مەن قازاقستانداعى قازاق ءتىلىنىڭ مارتەبەسى – وزگە ەلدەردەگى قازاقتار قاتتى ءمان بەرەتىن ەڭ باستى تاقىرىپتار جانە بۇل ولاردى ەلگە تارتاتىن ەڭ كۇشتى «ماگنيت». قازاقستاننىڭ كوپۆەكتورلى ساياسات ديپلوماتياسىنا قۇرمەتپەن قارايتىن ولار الىپتارمەن اراسىنىڭ تەڭ قاشىقتىقتا بولۋىن كوكسەيدى جانە مەملەكەتتىك ءتىل ءۇشىن باتىل شارالار قولدانۋدى تىلەيدى.

سۇلتان جانبولاتوۆ

سۋرەت: i-news.kz