ۇلتتىق قاۋىپسىزدىك كوميتەتى ءتوراعاسىنىڭ ورىنباسارى، شەكارا قىزمەتىنىڭ ديرەكتورى ەرلان الداجۇمانوۆ سەرىك كۇدەبايەۆتىڭ قاشىپ كەتۋىنە بايلانىستى پىكىر ءبىلدىردى.
"كۇدەبايەۆتىڭ تاۋ جاقتا شارۋا قوجالىعى بار. جول كورسەتەتىن ادامدارى دا بولعان شىعار. ءبىز تاۋ ارقىلى شەكارادان شىعىپ كەتكەن دەپ كۇدىكتەنىپ وتىرمىز"، – دەدى شەكارا قىزمەتىنىڭ ديرەكتورى.
ۆەدومستۆو باسشىسىنىڭ ايتۋىنشا، قازىرگى تاڭدا ۇقك تەرگەۋ جۇمىستارىن جۇرگىزىپ جاتىر، باس پروكۋراتۋرا قىلمىستىق ءىس قوزعاعانىمەن، ونىڭ جاي-جاپسارى ايتىلمادى.
سونىمەن قاتار، ەرلان الداجۇمانوۆ قازاقستاننىڭ شەكارا قىزمەتى قىرعىزستانداعى ارىپتەستەرىنەن اقپارات سۇراعانىن ايتتى. قىرعىزستاندا دا بۇل فاكت بويىنشا قىلمىستىق ءىس قوزعالعان.
ەسكە سالا كەتەيىك، سەرىك كۇدەبايەۆ قاڭتار وقيعاسى كەزىندە كومەندانت رەتىندە پوليسيا دەپارتامەنتىنىڭ عيماراتىنان كەتىپ، تارتىپسىزدىككە قاتىسۋشىلاردىڭ قارۋ ۇرلاۋىنا مۇمكىندىك بەردى دەپ ايىپتالۋدا.
ول سوت وتىرىسىنا كەلمەي قاشىپ كەتكەن بولاتىن. كەيىن كۇدەبايەۆتىڭ قىرعىزستانمەن شەكارانى كەسىپ ءوتىپ، بىشكەكتەن ىستامبۇلعا ۇشقانى بەلگىلى بولدى. وعان حالىقارالىق ىزدەۋ جاريالاندى.
پىكىر قالدىرۋ