«سامۇرىق-قازىنا» اق ادام رەسۋرستارىن باسقارۋ جونىندەگى باس ديرەكتورى دەنيەل كريۋسبەرگ قوردىڭ كادر ساياساتىن ترانسفورماسيالاۋدىڭ العاشقى ناتيجەسى تۋرالى ايتتى.

ونىڭ ايتۋىنشا، قورداعى ۇيىمداستىرۋ مادەنيەتىن، باسقارۋ جانە كوشباسشىلىق ءستيلىن وزگەرتىپ، جۇمىسشىلاردىڭ قۇزىرەتى مەن داعدىسىن دامىتۋ كەرەك. سوندىقتان دا ءىس جۇزىندە مەريتوكراتيا قاعيدالارىن ۇنەمى دامىتىپ وتىرۋعا نازار اۋدارىلادى.
دەنيەل كريۋسبەرگ «قورعا جۇمىسشى الۋ ارقىلى ۇدەرىستى جەتىلدىرىپ، الدىمىزعا جاڭا ماقسات-مىندەت قويامىز. 2014 جىلى جۇمىسقا الىنعان مامانداردىڭ 85 پايىزى اعىلشىن ءتىلىن بىلەدى. 2012 جىلى ولاردىڭ ۇلەسى نەبارى 30 پايىز بولىپتى. بىلتىر قابىلدانعان مامانداردىڭ 90 پايىزى قازاقشانى مەڭگەرگەن. ولاردىڭ ۇلەسى 2012 جىلى 50 پايىز ەدى. 2014 جىلى قابىلدانعان ۇمىتكەرلەردىڭ 70 پايىزى شەتەل ديپلومىن العان. 2012 جىلى بۇل كورسەتكىش 30 پايىز دەڭگەيىندە بولاتىن. وتكەن جىلى مامانداردىڭ 60 پايىزى حالىقارالىق كومپانيادان كەلگەن.  ءبارى ويداعىداي دەپ ايتا المايمىن. الايدا قاراپايىم حالىقارالىق ستاندارتتى ەنگىزۋ ارقىلى جەتىلدىرىپ كەلەمىز. بىزدە ءبارى جاريا تۇردە جۇرگىزىلەدى. بوس ورىندى جاريالاپ، جۇمىسقا العان ادامنىڭ قىسقاشا تۇيىندەمەسىن سايتقا ورنالاستىرامىز. 
وسى جىلى قىزمەتكەرلەردىڭ رەيتينگىن انىقتاۋ باستالعان. وسى ماقساتتا دامۋدىڭ جەكە جوسپارى ازىرلەندى. قور دارىندىلاردى جۇمىسقا تارتۋدىڭ ۇزدىك جوباسىن جۇزەگە اسىرۋمەن اينالىسىپ جاتىر. ساراپتاما كورسەتكەندەي، جاۋاپكەرشىلىگىنە، اتقاراتىن مىندەتتەرىنىڭ ەرەكشەلىگىنە قاراماستان، ۇلتتىق كومپانياداعى ديرەكتورلاردىڭ جالاقىسى بىردەي. 
ءبىز قوردىڭ كومپانيالار توبىنىڭ بارلىق قىزمەتىنە گرەيدەرلىك ءتاسىل قولدانامىز. العاشقى باستاما رەتىندە بارلىق كومپانيالار توبىنىڭ 32 مىڭ قىزمەتكەرى ءۇشىن بەلگىلى ءبىر ءتارتىپ جۇيەسىن ەنگىزدىك. بۇل جۇمىستىڭ ماقساتى – قازاقستان، تمد جانە الەم نارىعىندا جۇمىس اتقارۋ مەن ونىڭ مازمۇنىن سالىستىرۋ. وسىلاي ءبىز دارىندىلاردى الماستىرۋدىڭ تۇعىرناماسىن جاسايمىز. «قازاقستان تەمىرجولى» (قتج) قىزمەتكەرى نەگە ءومىر بويى سول كومپانيادا جۇمىس ىستەۋگە ءتيىس؟ جاڭا تاجىريبە الۋ ءۇشىن جۇمىسىن نەگە اۋىستىرماسقا؟ ەلىمىزدە ۇزدىك تۇعىرناما قالىپتاستى. بۇل الەمدە مويىندالعان «بولاشاق» باعدارلاماسى. الايدا ءبىز «بولاشاق» تۇلەكتەرىن جۇمىسقا ورنالاستىرا الماي وتىرمىز. ولار نارىقتان جوعالىپ كەتەدى. ءبىز جاڭا بۋىننىڭ كوشباسشىلارى لەگىن قالىپتاستىرۋدى قولعا الماقشىمىز. وسى ءۇشىن ارنايى باعدارلاما ازىرلەندى. بۇل باعدارلاما باسىم جوباعا باستاماشىل مامانداردى تارتۋدى كوزدەيدى. ءبىزدىڭ كوشباسشىلارىمىز لايىقتى ەمەس. سوندىقتان ولاردى جوعارى دەڭگەيدەن باستاپ باعالايمىز. كوشباسشىلارىمىز مىنا سۇراققا جاۋاپ بەرۋگە ءتيىس: ولار ءوز قاراماعىنداعىلارىنىڭ تالابىنا لايىقتى ما؟» – دەيدى. 
 

تىڭ باستاما تۇرمىستى تۇزەلتەدى

«سامۇرىق-قازىنا» اق بيزنەستى ترانسفورماسيالاۋ جونىندەگى باس ديرەكتورى اداماس يلكياۆيچيۋس قوردىڭ نەگىزگى باستامالارى تۋرالى ايتىپ بەردى.
اداماس يلكياۆيچيۋستىڭ مالىمدەۋىنشە، قورداعى اكتيۆتەردىڭ قۇنىن ەسەلەۋ كەرەك. بۇرىن تەك قوردىڭ قۇنىن جيناقتادى، بۇل ونىڭ جۇمىسىنا اسەر ەتتى. اداماس يلكياۆيچيۋس «ءقازىر بىرگە ءبىردى قوسىپ، ناتيجەسىندە ءۇشتى بەرۋىمىز كەرەك. حيميادا رەاگەنتتەردى قوسۋ ارقىلى ءتۇرلى رەاكسيانى الۋعا بولادى. ءبىز وسى نەگىزدە باسقارۋىمىز كەرەك. اشىق نارىقتا ءبىزدىڭ بارلىق كومپانيا ويىنشى ەمەس ەكەنىن ءتۇسىنۋىمىز كەرەك. سوندىقتان ءبىز ولاردىڭ نارىقتىق باعاسىن انىقتاي المايمىز. ءبىز ولاردى ءوز ادىستەمەمىز بويىنشا باعالايمىز. بۇل ءوزىمىزدىڭ جەكە پىكىرىمىز. ۇلتتىق كومپانيالاردى ناعىز نارىققا شىعارۋعا مۇمكىندىك بولادى. سوندا ينۆەستورلار ونىڭ كۇش-قۋاتىنا قالاي قارايتىنىن كورۋ كەرەك. ستراتەگيانى جاڭارتۋعا كەلسەك، بۇل زامان تالابىنىڭ قاجەتتىلىگى بولىپ تۇر. ءبىزدىڭ كومپانيالار ۇنەمى قۇبىلىپ تۇراتىن ورتادا جۇمىس ىستەيدى. ءبىز نەگىزگى كورسەتكىشتى قايتا قاراپ جاتىرمىز. ولار قاعاز جۇزىندە كەرەمەت كورىنەتىنىن مويىنداۋىمىز كەرەك. اسىرەسە، ءوندىرىس سالاسىندا جۇمىس ىستەيتىن جۇمىسشىنىڭ ۇلەسىن ولشەۋ قيىن. بۇل بىزگە كەرەك. ول دەگەنىڭىز ىنتالاندىرۋ عوي. كورپوراتيۆتى باسقارۋدىڭ جاڭا كودەكسى قابىلداندى، ديرەكتورلار كەڭەسىنىڭ وكىلەتتىگى قايتا قارالدى. جاۋاپكەرشىلىكتى ءبولۋدىڭ ناقتى جۇيەسى قۇرىلدى. بۇل دەگەنىڭىز كەڭەس زامانىنان مۇراگەرلىككە قالعان كوماندالىق جۇيەدەن باس تارتۋدىڭ جولى. قوردىڭ قۇرىلىمدىق جۇيەسى وزگەرەدى. وسى ءۇشىن قارجىلاندىرۋدىڭ جولى ەنگىزىلۋدە. قوردىڭ باستى رولدەرىنىڭ ءبىرى – جاڭا يندۋستريانىڭ قۇرىلىسى. ءبىز نارىق ويىنشىلارى بارا بەرمەيتىن جولداردى قاراستىرامىز. قۇقىقتىق فورمانىڭ قۇرىلىمىن جەڭىلدەتەمىز. ءبىزدىڭ كومپانيالاردىڭ ىشىندە اكسيونەرلىك قوعامدار بار، ولاردىڭ سانى 15-كە جەتەدى. سولار بىزدەن كوللەگيالىق ورگان، ديرەكتورلار كەڭەسىن، پروسەدۋرانى تالاپ ەتەدى. وسىنىڭ ءبارى ۇدەرىستى كادىمگىدەي باياۋلاتادى. وسىلاي باسقارۋدى قىمباتقا تۇسىرەدى. ءبىز باسقا جولىن قاراستىرۋدامىز. بۇل نەگىزگى باستامالار. ءبىز ولاردى وپەراسيالىق ترانسفورماسيالاۋدىڭ جول كارتاسىنا توپتاستىردىق. بۇل ۇدەرىستە ءاربىر باسشىنىڭ جاۋاپكەرشىلىگى مەن ءرولىن انىقتادىق. ويتكەنى، جول كارتالارى سورەلەردە قالاتىن «ادەمى» قۇجاتتار كۇيىندە قالىپ وتىر. باستامانىڭ سوڭى ديرەكتورلار كەڭەسى مەن باسقارماعا دەيىن جەتەدى. ءبىز ولارعا تەك مىندەت جۇكتەپ وتىرعان جوقپىز. ءاربىر باسقارما ءتوراعاسى وسىلاي ءوزىنىڭ جۇمىسىن جۇرگىزۋ بارىسىندا جەكە قىزىعۋشىلىعى مەن جاۋاپكەرشىلىگىن ارتتىرادى، ءوز قىزمەتكەرلەرىن وزگەرىسكە ۇمتىلۋعا بەيىمدەيدى» – دەيدى. 
 

وڭتايلاندىرۋ وڭ ناتيجە بەرەدى

«قازپوشتا» اق ورتاق قىزمەت كورسەتۋ ورتالىعىن قۇرادى. بۇل تۋرالى كومپانيانىڭ باسقارما ءتوراعاسى باعدات مۋسين حابارلادى. 
ونىڭ بايانداۋىنشا، «قازپوشتا» 300-گە جۋىق باستاما كوتەرگەن. باعدات مۋسين «ونىڭ ىشىنەن ءبىز تەك از قارجى قۇيۋ ارقىلى تەز تابىس اكەلەتىنىن تاڭداپ الامىز. باستى جوبانىڭ ءبىرى – back-وفيس قىزمەتى ارقىلى ورتاق قىزمەت كورسەتۋ ورتالىعىن قۇرۋدى قولعا الىپ وتىرمىز. «قازپوشتا» بولىمشەلەرى ساتۋ ورتالىقتارىنا اينالادى. ءقازىر «قازپوشتا» بولىمشەلەرىندە 834 بۋحگالتەر-ەكونوميست جۇمىس ىستەيدى. بۇل تىم كوپ. بەنچماركينگ كورسەتكەندەي، بۇل مامانداردىڭ سانىن 120-130 ادامعا دەيىن قىسقارتۋ كەرەك. ادامداردى قىسقارتۋ كەرەك دەپ وتىرعان جوقپىز. قىزمەتكەرلەرگە قايتا وقۋ مۇمكىندىگى تۋادى. اۆتوماتتاندىرۋ جانە ۇدەرىستىڭ اشىقتىعى ەسەبىنەن وڭتايلاندىرۋ ماسەلەسىن ايتىپ وتىرمىز. ينۆەستيسيانى قاجەت ەتپەيتىن جوبالار بار. ولاردى ىسكە قوسۋ ءۇشىن ۇيىمداستىرۋ شارالارى مەن بەيىمدەلۋ ءۇشىن ۋاقىت قاجەت. ماسەلەنى، جەتكىزۋ بەكەتتەرى. جۇمىس كۇندەرى پوشتاشىلار جابىق ەسىكتى قاعىپ تۇرادى. تۇتىنۋشىعا جەكسەنبى كۇنى قىزمەت كورسەتكەنى ىڭعايلى. وعان سونشا كۇش قاجەت ەمەس، تەك بەيىمدەلۋ كەرەك. تاعى ءبىر مىسال: سۇرىپتاۋ مەن جەتكىزۋ قىزمەتىن ەكى ءتۇرلى بولىمشە اتقارادى. نەگە؟ بۇل ەكەۋى ءبىر-بىرىنىڭ قىزمەتىن تولىقتىرىپ تۇر ەمەس پە؟» – دەيدى. 

دەرەككوز: "جاس قازاق" گازەتى