استانادا «نۇر وتان» پارتياسى ءتوراعاسىنىڭ ءبىرىنشى ورىنباسارى اسقار مىرزاحمەتوۆتىڭ توراعالىعىمەن جاڭا ەڭبەك كودەكسىنىڭ جوباسىنا قاتىستى كەزەكتى كەڭەس ءوتتى. ءىس-شاراعا ق ر پارلامەنتى ءماجىلىسىنىڭ دەپۋتاتتارى، ق ر دەنساۋلىق ساقتاۋ جانە الەۋمەتتىك دامۋ ءمينيسترى ت.دۇيسەنوۆا، ق ر كاسىپ-وداقتار فەدەراسياسىنىڭ ءتوراعاسى ءا.قۇسايىنوۆ جانە «اتامەكەن» ۇكپ باسقارما ءتوراعاسىنىڭ ورىنباسارى ن.التايەۆ  قاتىستى.

ەلباسىنىڭ بەس ينستيتۋسيونالدىق رەفورما، «100 ناقتى قادام» ۇلت جوسپارىن جۇزەگە اسىرۋ ماقساتىندا دايىندالعان قۇجاتتا ءالى دە تولىقتىراتىن تۇستار جوق ەمەس. ويتكەنى  حالىقتىڭ تاراپىنان قىزۋ تالقىلانعان زاڭ جوباسىنا ءتۇرلى ۇسىنىس-پىكىر بىلدىرۋشىلەردىڭ قاراسى قالىڭ.

ستاتيستيكالىق مالىمەتكە سۇيەنسەك، ەلىمىزدە ەڭبەككە ارالاسىپ جۇرگەندەردىڭ سانى 5،9 ميلليون ادامدى قۇرايدى. بۇل رەتتە زاڭ بويىنشا داۋ تۋعىزاتىن نورمالار مەيلىنشە رەتتەلىپ، بارلىق تاراپقا ءتيىمدى ەتىپ بەكىتىلسە، ەڭبەك داۋلارى ازايىپ، ەڭبەككەرلەردىڭ قۇقىقتارى ساقتالماق. «نۇر وتان» پارتياسى ءتوراعاسىنىڭ ءبىرىنشى ورىنباسارى ا.مىرزاحمەتوۆ: ««نۇر وتان» پارتياسى قاراپايىم حالىقتىڭ مۇددەسىن قورعاي وتىرىپ، جۇمىسشىلار مەن جۇمىس بەرۋشىلەردىڭ اراسىنداعى ەڭبەك قاتىناستارىندا ادىلەتسىزدىكتەردىڭ ورىن الۋىنا جول بەرمەيدى. ەلباسى ن.نازاربايەۆتىڭ ۇلت رەفورماسىن ىسكە اسىرۋ اۋقىمىندا پارتيا بىرنەشە زاڭ جوبالارىن دايىنداپ جاتىر. سونىڭ ءبىرى ەڭبەك كودەكسى. تاياۋدا ءبىرقاتار وبلىستاردى ارالاپ، جۇرتشىلىقپەن كەزدەسۋلەر وتكىزىپ قايتتىق. اسىرەسە، جامبىل مەن اتىراۋ وبلىستارىنداعى ەڭبەك ازاماتتارى كودەكستىڭ كەيبىر تۇستارىنا قاتىستى سىني كوزقاراستارىن ءبىلدىرىپ جاتتى. اتاپ ايتقاندا، جۇمىسشىلاردىڭ ەڭبەك مەرزىمىنەن تىس ۋاقىتتا، مەرەكەلىك، دەمالىس جانە تۇنگى اۋىسىمداعى جۇمىسى ءۇشىن قوسىمشا اقى مولشەرىنە قاتىستى نورماعا كوڭىلدەرى تولمايدى. سوندىقتان دا زاڭ جوباسىن تياناقتاۋ كەزىندە ولاردىڭ ۇسىنىسى ەسكەرىلۋى كەرەك. ويتكەنى كودەكستىڭ جاڭا جوباسى – الەۋمەتتىك قورعانىس پەن ەكونوميكالىق تيىمدىلىكتىڭ اراسىنداعى ۇتىمدى تەپە-تەڭدىكتى قالىپتاستىرۋ جولىنداعى ماڭىزدى قادام بولىپ تابىلادى»، – دەيدى. پارتيا ءتوراعاسى ءبىرىنشى ورىنباسارىنىڭ ايتۋىنشا، جاقىندا وڭىرلەرگە جاساعان ساپارىندا اتىراۋداعى فوسفورلىق زاۋىت جۇمىسشىلارى ەڭبەك مەرزىمىنەن تىس ۋاقىتتاعى جۇمىسى ءۇشىن تولەماقىنى 2-دەن 1،25-كە دەيىن قىسقارتۋدىڭ ورىنسىز ەكەندىگىن جەتكىزگەن. جوباعا سايكەس تولەمنىڭ وسى كولەمىن بەكىتىپ، قالعانى ۇجىمدىق كەلىسىمشارت اياسىندا تاراپتاردىڭ كەلىسىمىمەن قوسىلاتىندىعى جازىلعان. ال بۇل جاعدايدى دەنساۋلىق ساقتاۋ جانە الەۋمەتتىك دامۋ ءمينيسترى تامارا دۇيسەنوۆا بىلايشا تۇسىندىرەدى: «قۇجاتتى ازىرلەۋ بارىسىندا ءۇش جاقتىڭ – مەملەكەتتىڭ،  جۇمىس بەرۋشىنىڭ جانە جۇمىسشىنىڭ  ءوزارا مىندەتتەرىن ناقتىلاپ، ايقىنداپ بەردىك.  اسىرەسە، قاراپايىم ەڭبەككەرلەردىڭ مۇددەسىن بارىنشا ەسكەردىك. ەڭبەكاقىنى تولەۋدىڭ بارلىق ەرەكشەلىكتەرىن ۇمىتپاي، الەۋمەتتىك جاردەمدەردى دە ءتيىمدى ەتىپ، ەنگىزدىك. ارينە، بۇل زاڭ جوباسى قوعامنىڭ ەڭ بەلسەندى توبىنا تىكەلەي تيەسىلى بولعاندىقتان، قىزۋ تالقىلاۋ دا، سىن دا بولادى. ەندى مەملەكەت نەگىزگى مىندەتتەردى بەكىتەدى. اتاپ ايتقاندا، كۇنىنە 8 ساعاتتىق، اپتاسىنا 40 ساعاتتىق جۇمىستان اسپاۋ، ەڭبەك قاۋىپسىزدىگىن قامتاماسىز ەتىپ جىلىنا 24 كۇننەن كەم ەمەس ەڭبەك دەمالىسىن بەرۋ سىندى ستاندارتتاردى بەلگىلەپ بەردىك. ارى قارايعى ەڭبەك جۇمىس بەرۋشى مەن جۇمىسشىنىڭ اراسىنداعى كەلىسىمشارتپەن رەتتەلەدى. ال ونىڭ ورىندالۋىن مەملەكەتتىك بيلىك قاداعالايدى»، ̶ دەيدى.

وتكەن اپتا باسىندا «نۇر وتان» پارتياسىنىڭ پارلامەنت ماجىلىسىندەگى فراكسيا ءتورالقاسىنىڭ وتىرىسىندا ەڭبەك كودەكسى تالقىعا سالىنىپ، ءبىرقاتار تۇستارىنا تۇزەتۋلەر ەنگىزىلگەن بولاتىن. اتاپ ايتقاندا، ايماقتاردا جۇمىسشىلاردىڭ كەلىسپەۋشىلىگىن تۋعىزعان باپتارىنا بارىنشا كوڭىل بولىنگەن. ناتيجەسىندە، دەپۋتاتتار ەڭبەككە مەرزىمدىك اقى تولەنەتىن جاعدايدا جۇمىسشىنىڭ ءبىر كۇندىك تولەمى 1،5 مولشەرلەمەسىنەن كەم بولماي، كەسىمدى ەڭبەكاقى تولەنەتىن جاعدايدا جۇمىسشىنىڭ بەكىتىلگەن كۇندىزگى تولەمىنىڭ ەلۋ پايىزىن  تولەۋ كەرەكتىگى تۋرالى باستاماعا قولداۋ كورسەتۋ تۋرالى شەشىم دە قابىلدانعان. ءوز كەزەگىندە مەملەكەت مينيمالدى ستاندارتتاردى بەكىتىپ، ەڭبەك قاتىناستارىنىڭ بارلىق سۋبەكتىلەرى تاراپىنان مىندەتتەمەلەردىڭ ورىندالۋىنا قاتاڭ قاداعالاۋدى قامتاماسىز ەتۋگە ءتيىس. ال كاسىپكەرلەردىڭ «اتامەكەن» ۇلتتىق پالاتاسى مەن كاسىپوداقتار فەدەراسياسىنىڭ وكىلدەرى دە كودەكسكە تۇزەتۋ ەنگىزۋ باستاماسىن قولدايتىندارىن مالىمدەدى. ايتا كەتەرلىگى، زاڭ اياسىندا اۋىر وندىرىستە ەڭبەك ەتەتىندەر زەينەتكە 63 ەمەس، 55 جاسىندا شىقپاق. ەڭبەك كودەكسىنىڭ جاڭا جوباسى ءقازىر پارلامەنتتە قارالىپ جاتىر. قاراپايىم ەڭبەككەرلەردىڭ مۇددەسىن كوزدەگەن ماسەلە بويىنشا تۇششىمدى وي-پىكىر ايتقان قاتىسۋشىلار جيىن سوڭىندا ورتاق ۇيعارىمعا كەلىپ، «نۇر وتان» فراكسياسى مۇشەلەرىنىڭ ۇسىنىسى ۇكىمەتكە جولداناتىن بولدى.

دەرەككوز: "تۇركىستان" گازەتى