«قامشى» پورتالىنىڭ حات قورجىنىنا كەلىپ تۇسكەن ماتەريالدى وقىرمان نازارىنا ۇسىنۋدى قۇپ كوردىك. ەركىن اقپارات الاڭى ءوز وقىرماندارى مەن اۆتورلارىنىڭ اراسىن بايلانىستىرۋ ماقساتىندا كەلگەن حاتتارعا ءمان بەرەتىنىن جەتكىزگىمىز كەلەدى.

ايتۋلى اقىن، بەلگىلى ءتىل جاناشىرى، «ۇلتتىق كەڭەس» قوعامدىق ۇيىمىنىڭ ءتوراعاسى م.شاحانوۆ 12-قازان كۇنى الماتى قالاسىندا اتالمىش ۇيىم باسشىلارى مەن بىرنەشە قوعام مۇشەلەرنىڭ باسىن قوسىپ، جيىن وتكىزدى.

          جيىن بارىسىندا بۇگىنگى كۇنى قوردالانىپ قالعان بىرنەشە ماسەلەلەر كوتەرىلدى. م.شاحانوۆ وزدەرى قۇرعان «حالىق رۋحى» پارتياسىنىڭ بىرنەشە جىلدان بەرى تىركەلمەي كەلە جاتقاندىعىنا توقتالىپ، سوعان وراي ءوزى سەنىم بىلدىرگەن كەي جىگىتتەردىڭ وزگە پارتيالاردى تونىرەكتەي باستاعانىنا الاڭداۋشىلىق ءبىلدىردى. «جاسىلدار» پارتياسىن قۇرۋعا نيەت بىلدىرگەندەردىڭ قاسىنان ءوز ورىنباسارى ج.اكىمنىڭ بوي كورسەتۋىنە مۇلدە كەلىسپەيتىندىگىن اشىق ايتتى. «جاسىلدار» پارتياسىن قازاق ۇلتىن ماسقارالاپ جۇرگەن م. تەلىبەكوۆ دەگەننىڭ دە توڭىرەكتەپ جۇرگەندىگىنەن-اق ول پارتيانىڭ بولاشاعى جوق ەكەندىگىن اڭعارۋعا بولاتىندىعىن تىلگە تيەك ەتتى. وكىنىشكە قاراي قازاقتى ءتىلى جەتكەنشە قورلاپ جۇرگەن م.تەلىبەكوۆتىڭ دەڭگەيىنە دەيىن قۇلدىراۋ «ۇلتتىق كەڭەسكە» ابىروي اپەرمەيتىندىگىن، سوندىقتان ءوز ورىنباسارىن ونداي ارانداتۋشىلاردان اۋلاق بولۋعا شاقىردى. 

          م.شاحانوۆ سونىمەن قاتار، سول م.تەلىبەكوۆتىڭ قازاق حالقىن قورلاعان ازعىندىققا تولى «ۆەتەر س ۋليسى» دەگەن كىتابىن س.مامبەتاليننىڭ دە ينتەرنەتتەگى ءوز پاراقشاسىندا قولداپ، ناسيحاتتاپ جۇرگەندىگىنە توقتالىپ، ونىڭ بۇل ىس-ارەكەتى مۇلدەم اقىلعا سىيمايتىندىعىن، سوندىقتان ونىڭ مۇنداي تەرىس باعىتتان قايتۋىن تالاپ ەتتى. بۇلاي كەتە بەرسە مۇنداي كەلەڭسىزدىكتەردىڭ وزىنە جانە قوعامنىڭ اتىنا كولەڭكە تۇسىرەتىندىگىن ايتا كەلە، قوعام مۇشەلەرىن بايسالدى، پاراساتتى جولۋعا شاقىردى.

          مۇحاڭدى «ۇلتتىق كەڭەس» ءتوراعاسىنىڭ ورىنباسارى ە.راقىشيەۆتى قولداپ، م.تەلىبەكوۆتىڭ كىتابىن ازعىندىققا بالادى. ول «جاس جەتكىنشەكتەر ساناسىن ۋلاپ، ازعىندىق كىتاپ جازعان م.تەلىبەكوۆكە «ۇلتتىق كەڭەس» اتىنان توسقاۋىل قويۋىمىز قاجەت» دەدى. ە.راقىشيەۆ سونىمەن قاتار، «ۇلتتىق كەڭەس» قولداماعان ماسەلەردى كوتەرىپ جۇرگەندەردىڭ قاسىنان تابىلاتىنداردى دا باتىل ايىپتادى. بۇل تۇرعىدا ول س.مامبەتالين مەن ە.نارىمبايەۆتىڭ م.تەلىبەكوۆتىڭ ناسيحاتتاعاندىقتارىن ازعىندىقتى قولداۋ دەپ  س.مامبەتاليننىڭ بەتىنە باستى.

          ارىپتەستەرى سىنىنا ىلىنگەن س.مامبەتالين ءوزىنىڭ م.تەلىبەكوۆتى قولدامايتىنىن، قايتا ونى سوتقا بەرگەندەردى قولداۋ ءۇشىن كىتابىن ايعاق رەتىندە جاريالاعاندىعىن ايتىپ، اقتالدى.

          ماسەلە ءمانىن سارالاي كەلە «ۇلتتىق كەڭەس» م.تەلىبەكوۆتىڭ بۇل ءىس ارەكەتىنە جانە دە باسقا ۇلتتىق ماسەلەلەرگە قاتىستى مالىمدەمە جاساۋعا ۋاعدالاستى. جيىن بارىسىندا وزگە دە ماسەلەلەر قارالدى.