استانادا «تۇلپار» ادەبي سىيلىعىنىڭ يەگەرى، تانىمال اقىن، جازۋشى، ەتنوگراف باۋىرجان شورماق ۇلىنىڭ 60 جىلدىق مەرەيتويىنا وراي «توبىلعى تورى تولعاۋىم» اتتى ادەبي-سازدى شىعارماشىلىق كەشى ءوتتى. اتالعان كەشكە جىر سۇيەر قاۋىم جانە قوعام قايراتكەرلەرى، ادەبيەتتانۋشى-زەرتتەۋشىلەر، زيالى قاۋىم مەن ب ا ق وكىلدەرى قاتىستى.

اتالمىش جىر كەشىن اقىن، رەسپۋبليكالىق «تۇركىستان» گازەتىنىڭ باس رەداكتورى باۋىرجان باباجان ۇلى تىزگىندەدى. باۋىرجان شورماق ۇلىنىڭ شىعارماشىلىعىنا نەگىزدەلگەن  «ءمىردىڭ وعى» كىتابى، اقىننىڭ تاياۋدا عانا باسپادان جارىق كورگەن «وي تۇبىندە جاتقان ءسوز»، «قايران شەشەم» جىر جيناقتارىنىڭ تۇساۋى كەسىلدى. اقىن، قازاقستان جازۋشىلار وداعى ءتوراعاسىنىڭ ورىنباسارى قاسىمحان بەگمانوۆ،  اقىن، اباي اتىنداعى مەملەكەتتىك سىيلىقتتىڭ يەگەرى عالىم جايلىباي، اقىن سۇراعان راقمەت ۇلى، جازۋشى ءقۇرمانالى ءجۇنىسقان ۇلى اتالعان كىتاپتاردىڭ تۇساۋكەسەر ءراسىمىن جاساپ، ىزگى تىلەكتەرىمەن ءبولىستى. اقىن باۋىرجان شورماق ۇلى ق ر پارلامەنتى سەناتىنىڭ ءتوراعاسى ماۋلەن اشىمبايەۆتىڭ، ق ر مادەنيەت جانە اقپارات ءمينيسترى ايدا بالايەۆانىڭ العىس حاتىمەن ماراپاتتالدى. قاسىمحان بەگمانوۆ باۋىرجان شورماقۇلىن قازاقستان جازۋشىلار وداعىنىڭ مۇشەلىگىنە وتكەندىگىن حابارلاپ، كەش يەسىنە جازۋشىلار وداعىنىڭ مۇشەلىك كۋالىگىن تابىستادى.

باۋىرجان شورماق ۇلى 1962 جىلى 26 مامىردا قحر، شىڭجاڭ ولكەسى، ىلە قازاق اۆتونوميالى وبلىسى، كۇنەس اۋدانى، ايگىلى نارات قالاشىعىنىڭ شالكودە ەلدى مەكەنىندە اعارتۋشى، زيالى وتباسىندا دۇنيە ەسىگىن اشقان.      1982 جىلدان 2005 جىلعا دەيىن سان رەت الامان ايتىستارعا قاتىسا ءجۇرىپ، كۇنەس اۋدانىنان بۇكىل شىڭجاڭعا تانىمال بولعان اقىن-تەرمەشىلەر، جىرشىلار مەن قيساگەرلەر قوسىنىن قالىپتاستىرىپ، جۇزگە جۋىق شاكىرت تاربيەلەدى. ءتۇرلى سالادا، ءار جانردا قالام تەربەپ، حالىقتىق مۇرالاردى جيناپ، زەرتتەپ-زەردەلەگەن سان قىرلى تالانت يەسى باۋىرجان شورماق ۇلىنىڭ شىعارمالارى مەن جيناپ-قۇراستىرعان ەڭبەكتەرى 20 عا جۋىق كىتاپ بولىپ جارىققا شىقتى. «قورامساققا قول سالدىم»، «قولامتا»، «قانداۋىر» جىر جيناقتارى مەن «تاعدىر» اتتى پروزالىق كىتابى وقىرماندار قولىنان تۇسپەي، 20 مىڭ دانامەن تارالعان.  وقىرمانى ەڭ كوپ قالامگەر رەتىندە تانىلعان شورماق ۇلىنىڭ شىعارمالارىندا ءور رۋح، ۇلتتىق قۇندىلىق، ازاماتاتتىق بولمىس، نازىك ءيىرىم، استارلى وي، ءپالسالىق ۇعىمدار مەن تەرەڭ پايىمدار كورىنىس تابادى.

حالىقتىق مۇرالاردىڭ جاناشىرى رەتىندە الاششىل اقىن تاڭجارىق جولدى ۇلىنىڭ مۇرالارىن جيناپ، «تاڭجارىقتىڭ باسىلىم كورمەگەن شىعارمالارى» جانە «شىن تىلەك» اتتى كىتاپ شىعاردى. ەل ىشىندە ساقتالعان ايتىستار، اڭىز-اڭگىمە، ولەڭ-جىرلار، قيسسا-داستاندار، ماقال-ماتەلدەر مەن ازىلدەردى جيناپ «ادۋىنگەر»، «ۇكىلى ىرعاي»، «كۇنەس حالىق ولەڭ-جىرلارى»، «كۇنەس ءازىل-قالجىڭدارى»، «ءبىر كەم دۇنيە»، «شەجىرە»، «بابا مۇراسى» اتتى كىتاپتاردى قۇراستىرىپ وقىرمان قاۋىمعا ۇسىندى. ەلەۋلى ەڭبەكتەرى ءۇشىن 2001 جىلى شىجاڭ جازۋشىلار وداعىنىڭ قازاق-قىرعىز ادەبيەتىنە ارنالعان «تۇلپار» ادەبي سىيلىعىن الدى. قىسقاسى، باۋىجان شورماق ۇلى قىتايداعى قازاق ادەبيەتى مەن مادەنيەتىنىڭ دامۋىنا ەرەكشە ەڭبەك سىڭىرگەن، جۇڭگو قازاقتارى اراسىندا ەڭ كوپ وقىلعان، تانىمالدىعى جوعارى اقىن، جازۋشى، ەتنوگاف، قوعام قايراتكەرى. اقجۇرەك اقىن 2019 جىلى اتا جۇرتقا ات باسىن بۇرىپ، استاناعا قونىستاندى.

اتالمىش كەشتە ەسىمى ەلگە بەلگىلى انشىلەر تولعانباي سەمبايەۆ، ەركىن شۇكىمان، گۇلميرا سارينا، داۋرەنبەك اركەنوۆ، ساۋلەجان تاعزيا، ەسحات نۇرالي، ت،ب ونەرپازدار اقىننىڭ سوزىنە جازىلعان اندەردى اۋەلەتە ورىندادى. اقىن باۋىرجان شورماق ۇلى جۇرەكتى تەربەتەر وتتى ولەڭدەرىن وقىپ، جىردان شاشۋ شاشتى. كۇمبىرلى كۇي ورىندالىپ، ويلى وقىرماندار كەزەك-كەزەگىمەن ساحناعا كوتەرىلىپ، اقىننىڭ اسەرلى جىرلارىن جاتقا وقىپ، كەشتىڭ مارەسىن اسىردى. جەمىستى جىلدار جالعاسىپ، جۇرەك تەربەر عاجاپ جىرلار جازىلا بەرەتىنىنە سەنىم مول!

الاش ءتۇرسىنالى
اقىن، جۋرناليست