ادام قۇقىقتارىن قورعاۋ بيۋروسىندا وتكەن جيىنعا ءبىر توپ قوعام بەلسەندىلەرى قاتىسقان. ولاردىڭ قاتارىندا ساياساتكەر رىسبەك سارسەنباي ۇلى، ايگەرىم تىلەۋجاننىڭ ادۆوكاتى اينارا ايدارحانوۆا، قۇقىق قورعاۋشى مارجان اسپاندياروۆا مەن "ساياسي تۇتقىن"، جۋرناليست دۋمان مۇحاممەدكارىمنىڭ اكەسى الماس تىلەپوۆتەر بار. 

جيىن بارىسىندا رىسبەك سارسەنباي ۇلى پرەزيدەنت قاسىم-جومارت توقايەۆقا ارنالعان ۇندەۋدى وقىدى. ول "قاندى قاڭتاردان" كەيىن ناعىز جاۋاپتى ادامدار جازالانباي، قاراپايىم حالىق جازالانعانىن ايتا وتىرىپ،  ۇندەۋدە قاڭتار كەزىندە الماتى «اۋەجايىن باسىپ الماق بولدى» دەگەن ايىپپەن ءتورت جىلعا سوتتالعان ساياسي بەلسەندى ايگەرىم تىلەۋجان «ەكسترەميزمدى قارجىلاندىرۋ» جانە «تىيىم سالىنعان ۇيىم جۇمىسىنا ارالاسۋ» باپتارى بويىنشا ءىستى بولىپ، ءقازىر سوتى ءوتىپ جاتقان تاۋەلسىز جۋرناليست دۋمان مۇحاممەدكارىمدەردى  بوساتۋدى تالاپ ەتتى. 

سونداي-اق bureau.kz مالىمەتىنشە، 6 ناۋرىزدا ادۆوكاتى اينارا ايدارحانوۆا تۇرمەدە جانجال بولعانىن، سوعان بايلانىستى ايگەرىم تىلەۋجاننىڭ ۇستىنەن «دەنساۋلىققا قاساقانا اۋىرلىعى ورتاشا زيان كەلتiرۋ» (107-باپ) بابى بويىنشا ءىس قوزعالعانىن حابارلاعان. 

بۇگىن، 14 ناۋرىزدا ادۆوكاتى ايگەرىم تىلەۋجاننىڭ ۇستىنەن ارىز جازعان ادام ەكسپەرتيزادان وتۋدەن باس تارتقانىن ايتتى. قىلمىستىق ءىس قوزعاۋعا جەدەل جاردەم قىزمەتكەرىنىڭ انىقتاماسى سەبەپ بولعان. انىقتامادا جابىرلەنۋشىنىڭ «ساۋساعى سىنعانى» جازىلعان. ال تىلەۋجان ادۆوكاتقا تۇرمە كامەراسىندا سوزگە كەلىپ قالعانىن، ەشكىمگە قول كوتەرمەگەنىن ايتقان. 

باسپا ءسوز جيىنىنا قاتىسقان قازاقستانداعى پارلامەنتاريزمدى دامىتۋ قورىنىڭ پرەزيدەنتى زاۋرەش باتتالوۆا مۇنى ساياسي تاپسىرىس دەپ سانايدى. ول دەپۋتاتتاردى، ادام قۇقىعىن قورعاۋ ۇيىمدارىن بەلسەندىنىڭ جاعدايىنا نازار اۋدارۋعا شاقىردى. 

بەلسەندى ءالنۇر ىلياشيەۆ تا ايگەرىم تىلەۋجانعا قىسىم جاسالىپ جاتىر دەپ ەسەپتەيدى. ول بەلسەندىگە بايلانىستى اشىلعان ءىس ادەيى ۇيىمداستىرىلعان دەپ ەسەپتەيدى. 

ادۆوكات اينارا ايدارحانوۆانىڭ ايتۋىنشا، بۇل ءىس تىلەۋجاننىڭ نەگىزگى ءىسى بويىنشا جوعارعى سوتقا شاعىمدانعان كەزىندە كەدەرگى بولادى.

– ونىڭ ۇستىنەن ارىزدانعان ادام جاۋعاشتى تۇرمەسىنە ارىز جازىپ ۇلگەرمەستەن قىلمىستىق ءىس قوزعالىپ، بەلسەندى تۇردە تەرگەۋ باستالىپ كەتكەن. ولاردىڭ مۇنداي جىلدامدىعى ءبىزدى تاڭعالدىردى. مۇنى ايگەرىمنىڭ جازاسىن وتەۋ مەرزىمىن ۇزارتۋ ماقساتىندا ادەيى جاسالعان دەپ ويلايمىز. بۇل ونىڭ نەگىزگى ءىسى بويىنشا كاسساسيالىق ارىزدى قاراۋعا كەدەرگى كەلتىرەدى، – دەدى ادۆوكات باسپا ءسوز جيىنىندا. 

بەلسەندى، جۋرناليست، اۋدارماشى ايگەرىم تىلەۋجان بىلتىر 2022 جىلعى قاندى قاڭتار كەزىندە «الماتى اۋەجايىن باسىپ الماق بولدى» دەپ ايىپتالىپ، 4 جىلعا سوتتالعان. ول وزىنە تاعىلعان ايىپپەن كەلىسپەي، بۇنى ساياسي تاپسىرىس دەپ باعالاعان.