16 ساۋىردە وتكەن سوت وتىرىسىندا بيشىمبايەۆتىڭ ادۆوكاتى قۇسايىنوۆا ماسكەۋ قالاسىنداعى "ن.ي.پيروگوۆ اتىنداعى رەسەي ۇلتتىق زەرتتەۋ مەديسينالىق ۋنيۆەرسيتەتىنىڭ" رەسەيلىك سوت-مەديسينالىق ساراپشىلارىنىڭ قورىتىندىسىن بايانداعان ەدى.
الايدا جابىرلەنۋشى تاراپ پەن مەملەكەتتىك ايىپتاۋشى بۇل ساراپتامانىڭ جالعان قۇجات ەكەنىن جانە ءتۇرلى زاڭبۇزۋشىلىقتارمەن راسىمدەلگەنىن مالىمدەدى. دالىرەك ايتقاندا، ول ماماننىڭ ءوزى اقتوبەدە، ال رامازانوۆا استانادا بولعان.
سونىمەن قاتار مەملەكەتتىك ايىپتاۋشى ايجان ايماعانوۆا ساراپشىلار ءمايىتتى كورمەي قاشىقتان ساراپتاما جاساي المايتىنىن، تەك تاحير حاليمنازاروۆ سياقتى قوسىمشا تولىقتىرۋ ەنگىزە الاتىنىن مالىمدەدى.
“ساراپتاما ساراپشىلاردىڭ قۇزىرەتىنەن تىس جاسالعان. ساراپشى گيستولوگيا جانە نەيروحيرۋرگيا مامانى بولماسا دا، سول سالاعا قاتىستى قورىتىندى شىعارعان. بۇل ساراپتاما قورىتىندىسىن زاڭسىز دەپ تانيمىز”، – دەدى سۋديا ايجان كولبايەۆا.
سۋديا پروكۋرور مەن جابىرلەنۋشى تاراپتىڭ ءوتىنىشىن قاناعاتتاندىرىپ، رەسەيلىك ماماننىڭ قورىتىندىسىن ىسكە قوسپاۋ تۋرالى شەشىم شىعاردى.
بۇعان دەيىن بيشىمبايەۆتىڭ ادۆوكاتى جالعان قۇجات جاسادى دەگەن كۇدىككە ىلىنگەنىن حابارلاعان ەدىك. رەسەيلىك ساراپشىلار سالتانات نۇكەنوۆانىڭ ءولىمىن "ەسكى جاراقاتى سالدارىنان كوز جۇمدى" دەپ قورىتىندىلاعان.
بۇرىنعى ۇلتتىق ەكونوميكا ءمينيسترى قۋاندىق بيشىمبايەۆ ايەلى سالتانات نۇكەنوۆانى ءولتىردى دەگەن كۇدىكپەن ۇستالعان. كەيىننەن قىلمىستى جاسىردى دەگەن ايىپپەن سالتانات نۇكەنوۆا كوز جۇمعان مەيرامحانانىڭ ديرەكتورى دا تۇتقىندالدى.
سونداي-اق ەكس-مينيستر قۋاندىق بيشىمبايەۆقا قىلمىستىق كودەكستىڭ 110-بابى 2-بولىگى ("ازاپتاۋ")، قىلمىستىق كودەكستىڭ 99-بابى 2-بولىگى 5-تارماعى ("اسا قاتىگەزدىكپەن ادام ءولتىرۋ") بويىنشا جاڭا ايىپتار تاعىلعان ەدى. ال ونىڭ تۋىسى باقىتجان بايجانوۆ قىلمىستى جاسىرعانى جانە حابارلاماعانى ءۇشىن ايىپتالعان.
پىكىر قالدىرۋ