سۋرەتتە ەر ادامنىڭ كوزىن بىرەۋ قولىمەن كۇشتەپ اشىپ تۇرعانىن بايقاۋعا بولادى. ءبىراق ەر ادام وسى قالپىندا سايكەستەندىرۋدەن ءساتتى وتكەن.

ادۆوكات ەلەنا يگناتەنكونىڭ ايتۋىنشا، ميكروقارجى ۇيىمى ونلاين نەسيە بەرگەن سۋرەتتەگى ەر ادام وتكەن جىلى كوز جۇمعان. ونىڭ ارتىندا ايەلى مەن ەستۋ قابىلەتى ناشار قىزى قالعان. وتباسى پەتروپاۆل قالاسىنىڭ شەتىندە ەسكى جەكە ۇيدە تۇرادى. ەگەر ولار كۇيەۋى مەن اكەسىنەن قالعان مۇرانى قابىلداسا، كوللەكتورلىق اگەنتتىككە 800 مىڭ تەڭگەگە جۋىق قارىزىن تولەۋگە ءماجبۇر بولادى، بۇل ولار ءۇشىن تىم ۇلكەن سوما.

ەر ادامعا نەسيە 2021 جىلى  راسىمدەلگەنى انىقتالدى. نەسيە ونىڭ ەركىنەن تىس راسىمدەلگەن. ەر ادام دوسىمەن تەمىرجول وتكەلىندە جۇمىس ىستەپ جۇرگەندە، ولارعا بوتەن جىگىتتەر كەلەدى. وزدەرىن رەسەيلىكتەر دەپ تانىستىرعان ولار قازاقستان ازاماتتارىنىڭ كومەگىمەن سيم-كارتا العىلارى كەلەتىنىن ايتقان. وسى وقيعادان كەيىن ەكى ادامعا دا نەسيە راسىمدەلگەنى بەلگىلى بولعان: بىرەۋىنە 785 مىڭ تەڭگە، ەكىنشىسىنە ميلليونعا جۋىق.

ول قاتتى ماس بولدى ما، الدە باسقا جولمەن بە، ايتەۋىر، قوناقتاردىڭ ءبىرى ونىڭ قاباعىن كوتەرىپ، سۋرەتكە ءتۇسىرىپ العان، بۇل فوتوسۋرەتتە انىق كورىنەدى. دەگەنمەن، مقۇ ادامنىڭ سۋرەتىنە قاناعاتتانىپ، سۋرەت بيومەتريالىق سايكەستەندىرۋدەن وتكەن. بۇل فوتوسۋرەت قىلمىستىق ءىس بويىنشا دا، سوتتا دا كورسەتىلدى»، – دەيدى ادۆوكات.

پوليسيا وسى جاعدايعا بايلانىستى 2022 جىلى قىلمىستىق ءىس قوزعاعان، الايدا الاياقتار تابىلمادى. ال كوللەكتورلىق كومپانيا ءوندىرىپ الۋ ءۇشىن سوتقا شاعىم تۇسىرگەن. الماتى اۋداندىق سوتى اتالعان تالاپ ارىزدى قاناعاتتاندىرعان.

ەر ادام كوز جۇمعان سوڭ 2023 جىلدىڭ جەلتوقسان ايىندا اپەللياسيالىق ساتىداعى سوت ازاماتتىق ءىس بويىنشا ءىس جۇرگىزۋدى «جاۋاپكەردىڭ» مۇراگەرى انىقتالعانعا دەيىن توقتاتا تۇرۋ تۋرالى شەشىم قابىلداعان.