قارجىلىق مونيتورينگ اگەنتتىگىنىڭ دەرەگىنشە، ءتۇرلى كۇماندى ماقساتتارعا اقشا جيناۋعا تارتىلعان 138 بانكتىك كارتا اشكەرەلەندى. جالعان كومەك سۇراۋشىلارعا 660 مىڭنان استام قازاقستاندىق ساداقا اۋدارىپ، ادال اقشالارىن بىلمەي جولداعان.

بيىلعى ناۋرىزداعى جاعداي بويىنشا ساداقا، جىلۋ، كراۋدفاندينگ تۇرىندە جينالعان قارجىنىڭ جالپى سوماسى 6 ميلليارد تەڭگەنى قۇرادى، سونىڭ 33%-ىنىڭ نەمەسە 2 ميلليارد تەڭگەسىنىڭ "الاياقتىق بەلگىلەرى بار" دەپ تانىلعان. ءبىراق بۇل تەك رەسمي انىقتالعانى عانا. الاياقتىقتىڭ شىنايى اۋقىمى بىرنەشە ەسە زور بولۋى مۇمكىن.

اگەنتتىك ءتوراعاسى دميتريي مالاحوۆتىڭ ايتۋىنشا، زالىمدار سول ميللياردتاردى ارى قاراي قىمبات اۆتوكولىكتەر، جىلجىمايتىن مۇلىكتەر ساتىپ الۋعا، تۇرمىستىق شىعىندارىنا، بۋكمەكەرلىك كەڭسەلەردە ءباس تىگۋگە، شەتەلدەگى قىمبات اپارتامەنتتەردى جالعا الۋعا جانە باسقاسىنا جۇمسايدى.

جاناشىر ازاماتتاردىڭ جاقسى نيەتى مەن ادال اقشاسى ىزگى ىستەرگە باعىتتالۋى ءۇشىن قارجىلىق مونيتورينگ اگەنتتىگىنىڭ، "استانا" قارجى ورتالىعىنىڭ، قۇزىرلى ورگانداردىڭ جانە ەكىنشى دەڭگەيلى بانكتەردىڭ وكىلدەرى "كراۋدفاندينگتىك قىزمەتتى رەتتەۋ بويىنشا زاڭنامالىق شارالاردى ازىرلەۋ" تۋرالى ۇسىنىس ەنگىزدى.

"ءارتۇرلى پلاتفورمالاردا كومەك سۇراعان وتىنىشتەر مەن حابارلاندىرۋلار قاپتادى جانە بارعان سايىن كوبەيۋدە. حالىق ونىڭ ارتىندا الاياقتار تۇر ما دەپ، اقشا اۋدارۋدان قورقاتىن بولدى. وزدەرى جاريا ەسەپ بەرمەسە، ەلدەن جيعان قاراجاتتى قايىرىمدىلىق قورلارىنىڭ قايدا جۇمسايتىنى بەيمالىم. قازاقستاندا بۇل سالادا ءبىرىڭعاي رەتتەۋشى ورگان جوق. ۇيىمدار ايقىندىق تانىتىپ، قوعام الدىندا ەسەپ بەرۋگە قۇشتار ەمەس. ولار ءۇشىن اقشا جينايتىن ۆولونتەرلەردىڭ قاۋىپسىزدىگى دە الاڭداتادى. ونىڭ ۇستىنە بۇل سالا جەتكىلىكتى تۇردە زاڭنامالىق رەتتەلمەگەن. ناعىز قايىرىمدىلىق قورلارى مەن ەرىكتىلەردىڭ ادال اتىن، اسىل ءىسىن الاياقتاردان قورعاۋ ءۇشىن بۇل سالاداعى ارامزا تىرلىكتەرگە تەگەۋرىندى توسقاۋىل قوياتىن شارالار قابىلدانۋى كەرەك"، – دەيدى ماجىلىسمەن دينارا ناۋموۆا.